Azərbaycanda “Jurnalistika” ixtisası üzrə magistr təhsili almaq mümkün olacaq. Bu barədə Baş nazir Əli Əsədov qərar imzalayıb.
Qeyd olunub ki, hazırda ölkədə müxtəlif sahələr üzrə əsaslı biliklərə, bacarıq və səriştələrə malik olan, daha dərin təhlillər aparmağı bacaran jurnalistlərə olan tələbatı ödəmək məqsədilə magistratura səviyyəsində “Jurnalistika” ixtisaslaşmasının açılmasına ehtiyac duyulur. Bununla əlaqədar Nazirlər Kabinetinin qeyd olunan qərarı ilə ali təhsilin magistratura səviyyəsi üzrə mövcud ixtisaslaşmaların siyahısına "Jurnalistika” ixtisaslaşması əlavə edilib.
“Bu sərəncam cənab Prezidentin media sahəsində islahatların dərinləşdirilməsi ilə bağlı sərəncamından irəli gələn öhdəliklərin yerinə yetirilməsi üçün atılan bir addımdır”
Mövzuya şərh verən Mətbuat Şurası sədrinin müavini Müşfiq Ələsgərli “Bakı-Xəbər”ə bildirdi ki, Prezident İlham Əliyevin 12 yanvar 2021-ci il tarixində Azərbaycanda media islahatlarının daha da dərinləşdirilməsi ilə bağlı sərəncamı olub. O vurğuladı ki, bu sərəncama uyğun olaraq media sahəsində geniş şəkildə həm struktur, həm kadr, həm də digər yönlərdə islahatlar həyata keçirilir. “Sevindirici haldır ki, bu islahatlar, həyata keçirilən hərəkətlər müsbət nəticə verir. Sərəncama uyğun olaraq artıq Azərbaycanda “Media Haqqında” Qanun yeniləşdirilib və müasir dövrün tələblərinə cavab verən, bütövlükdə bu sahəni əhatə edən bir qanunvericilik formalaşıb. “Media Haqqında” Qanun artıq qüvvəyə minib. Əlavə olaraq, kadr və struktur islahatları həyata keçirilib, dövlətin informasiya siyasətinə cavabdeh olan kadrlar formalaşdırılır. Kifayət qədər potensiallı, media sahəsində qlobal prosesləri bilən şəxslər bu vəzifələrə təyin olunublar, uğurla çalışırlar. Eyni zamanda strukturların özündə dəyişiklik olub. Əsas məsələlərdən, hədəflərdən biri də media təhsili ilə bağlıdır. Açığı, etiraf etmək lazımdır ki, media peşəkarlığı baxımından kifayət qədər işlərin görülməsinə zərurət var. Bildiyimiz kimi, bu sahədə də artıq işlərə start verilib. Medianın İnkişafı Agentliyi ilə ADA universiteti birlikdə media təmsilçiləri üçün müəyyən kurslar, treninqlər, fəaliyyətlər həyata keçirib. Həm mətbuat xidmətlırinin rəhbərləri, həm KİV subyektlərinin rəhbərləri, həm də sıravi jurnalistlər üçün ən müxtəlif sahələrdə təlimlər keçirilib. Burada təhlükəsizlik təlimləri, etik standartlarla bağlı təlimləri və sair görmüşük”.
M.Ələsgərlinin vurğuladığına görə, təlimlərlə, kurslarla yanaşı jurnalistika üzrə təhsil də vacibdir. M.Ələsgərli hesab edir ki, jurnalistika, informasiya ilə iş üzrə təhsilin də təkmilləşdirilməsi günün tələbidir, zərurətdir: “Əlbəttə, bu təkmilləşdirməyə ehtiyac var. Hesab edirəm ki, bu sahədə müəyyən addımlar atılmalıdır. Əvvəla, jurnalistika, informasiya işi üzrə təhsil verən müəssisələrin özündə müəyyən yeniliklər aparılmalıdır, modernləşdirmə işi getməlidir. Eyni zamanda bunun hüquqi, qanuni tərəflərində də müəyyən fəaliyyətlərin həyata keçirilməsinə ehtiyac var. Baş nazirin “Jurnalistika” ixtisası üzrə magistr təhsili almaq sahəsində imzaladığı sərəncama münasibətim çox müsbətdir. Bu sərəncam cənab Prezidentin media sahəsində islahatların dərinləşdirilməsi ilə bağlı sərəncamından irəli gələn öhdəliklərin yerinə yetirilməsi üçün atılan bir addımdır. Bildiyimiz kimi, indiyə qədər Jurnalistika fakültəsini bitirənlər magistr təhsili alsalar da, elmi iş müdafiə edərkən müxtəlif sahələr üzrə elmi dərəcələr alırdılar. Qənaətimə görə, indiki sərəncam imkan verəcək ki, jurnalistika üzrə elmi bacarıqlarını inkişaf etdirən, pedoqoji fəaliyyətlə məşğul olan şəxslər yeni modern standartlara uyğunlaşsınlar və öz peşələrinə daha da dərindən mənimsəsinlər”.
M.Ələsgərlinin fikrincə, ali təhsilin magistratura səviyyəsi üzrə mövcud ixtisaslaşmaların siyahısına "Jurnalistika” ixtisaslaşması əlavə edilməsi bu sahədə həyata keçirilən islahatların davamıdır. “Hesab edirəm ki, bu həmin islahatlar paketinin daha da dərinləşməsi, uğurla icra edilməsi sahəsində atılan addımlardan biridir. İndiyə qədər atılan addımlar kimi bu yenilik də jurnalistika sahəsi üçün kifayət qədər uğurlu və faydalı olacaq”.
İradə SARIYEVA
