“Azərbaycanda məktəbli formasının qiymətini, maya dəyərini bazar müəyyənləşdirir. Bu, elm və təhsil mövzusu deyil. Lakin qiymətlərin şişirdilməsi halları varsa, Elm və Təhsil Nazirliyi bunu düzgün hesab etmir”. Bunu elm və təhsil naziri Emin Əmrullayev avqustun 23-də keçirdiyi brifinqdə deyib.
“Digər tərəfdən biz heç kəsi forma geyinməyə məcbur etmirik. Formanın elementləri təsdiq olunubsa, valideynlər bunu seçə bilər. Heç kim bu qaydanı poza bilməz. Konkret məktəb olmadıqda bu məsələləri araşdırmaq olmur. Lakin belə hallar varsa, həmin direktorlar düz etmir” deyə bildirən
nazir vurğulayıb ki, belə hallar varsa, həmin məktəblərin nömrələri Nazirliyə deyildikdən sonra aidiyyəti üzrə tədbir görüləcək.
Göründüyü kimi, nazir forma məsələsi ilə bağlı məktəblərin qərar verəcəyini bildirir və bu işi onların öhdəsinə buraxır.
Ümumiyyətlə, məktəblilər forma geyməyə məcbur edilməlidir, ya yox? Bu barədə məktəblər və ekspert nə düşünür?
19 nömrəli məktəb: “Həm yeni, həm də köhnə formadan istifadə ediləcək
19 №-li tam orta məktəbdən “Bakı-Xəbər”ə bildirdilər ki, yeni tədris ilində şagirdlər məktəbə məktəbli formasında gəlməlidir. Məktəbdən verilən məlumata görə, artıq Bakı Tikiş Evinin tikdiyi məktəbli formalarından biri seçilib və alınması valideynlərə tövsiyə edilib: “Yeni məktəbli formaları ilə bağlı qərar qəbul etdik. Bakı Tikiş Evinin tikdiyi formalardan birini seçmişik və o geyimləri təklif edirik, kimin köhnədən geyimi yoxdursa onlar alacaqlar. Amma hansı şagirdin keçən ildən məktəbli forması varsa onu geyə biləcək. Bir sözlə, həm yeni, həm də köhnə formadan istifadə ediləcək. Yəni bu tədris ilində şagirdləri məcbur etmirik ki, hamınız yeni məktəbli forması almalısınız. Amma gələn tədris ilindən bütün şagirdlər məktəbin müəyyən etdiyi formalarda gəlməlidir. Bu işdə hamıya anlayışla yanaşırıq”.
27 və 21 nömrəli məktəblər də bu qənaətdədir...
27 №-li tam orta məktəbdən də bildirdilər ki, şagirdlərə güzəştlə yanaşılacaq və həm köhnə formadan istifadəyə icazə veriləcək, həm də yeni forma geyiniləcək. Tam olaraq yeni formaya keçidə gəlincə, bildirdilər ki, bu şagirdlərdən asılıdır.
21 saylı tam orta məktəbdən də eyni fikirləri bildirdilər.
Ekspertlər isə hesab edirlər ki, bu məsələnin məktəblərin ixtiyarına verilməsi düzgün deyil, məktəblər üzrə şagirdlər hamısı seçilən formalarda məktəbə gəlməlidir.
Vüsalə Ağabəyli: “Məktəbin məktəb geyimi olmalıdır”
Filologiya üzrə fəlsəfə doktoru, dosent Vüsalə Ağabəyli bizimlə söhbətində bildirdi ki, şagirdin şagird geyimi olmalıdır və şagirdlər məktəbə uniforma ilə gəlməlidir. “Məcbur edilməlidir deyəndə, məcbur yox, konkret uniforma olmalıdır, məktəbin məktəb geyimi olmalıdır. Özü də bu geyimlər standart və münasib qiymətə olmalıdır. Valideynlər də, şagirdlər də bu standartı birmənalı şəkildə qəbul etməlidir. Məktəb formasına keyfiyyətindən asılı olmayaraq elə qiymətlər qoyulur ki, bu da haqlı olaraq əhalinin narazılığına səbəb olur, nəticədə elə görünür ki, valideynlər şagirdin məktəbə formada getməsinə etiraz edir. Məktəb forması istənilən sosial təbəqənin nümayəndəsi olan şagirdi təhsil prosesində birmənalı şəkildə bərabər hüquqlu göstərir. İstər zəngin, istər yoxsul ailənin uşağı eyni geyimdə məktəbə gəlirsə onlar arasında təhsildə hər hansı sərhəd və ya ayrı-seçkilik olmadığının göstəricisidir.
Lakin bugün təhsil sahəsində toxunulacaq o qədər mühüm sahələr var ki, düşünürəm ki, Təhsil naziri məhz həmin sahələrdə islahatlara başlasa daha yaxşı olar. Əgər bu gün məktəblərdə məktəb formasını dövlət hesabına təşkil edə bilmiriksə, o zaman məktəb formasının bazar qiyməti minimum əmək haqqına uyğun olmalıdır ki, bütün sosial zümrəni düzgün əhatə etsin”- deyə V.Ağabəyli qeyd etdi.
Leyla QARAXANLI
