Ramil Hüseynov: “Çünki seçkinin keçirilməsində, bir sıra işlərin təşkilində və nizamlanmasında hakimiyyətin rolu böyükdür”
Məlum olduğu kimi, Türkiyədə martın 31-də keçirilən bələdiyyə seçkiləri ilə bağlı proses səngimək bilmir. Hakim AKP ilə ana müxalifət sayılan CHP arasında İstanbul uğrunda mübarizə daha da kəskinləşir. Ölkənin ən böyük şəhərində seçkilərdə qanun pozuntularının olması ilə bağlı AKP iqtidarının şikayətinin ardından səslər yenidən sayılır.
Hazırkı vəziyyətlə bağlı son məlumatı mətbuatla bölüşən CHP sədrinin köməkçisi Muharrem Erkek deyib ki, bu ana qədər sandıqların 72 faizində səslərin təkrar sayımı bitib. Bu məlumatdan belə aydın olur ki, seçkilərdə qalib elan olunan CHP namizədi Əkrəm İmamoğlu AKP-nin iddiaçısı Binəli Yıldırımı 17.132 səs fərqi ilə qabaqlayır. Ancaq bu da heç nə demək deyil. Belə ki, milyonlarla seçicisi olan İstanbulda 17 min səs elə də böyük fərq deyil. Nəticələr hər an dəyişə bilər.
Türkiyədə keçirilən bələdiyyə seçkilərində diqqətçəkən məqamlardan biri də iqtidarla müxalifətin bir-birini ittiham etməsidir. Məsələ ondadır ki, iqtidarla müxalifət bir-birini seçkilərin nəticələrinin saxtalaşdırılmasında kəskin şəkildə ittiham edirlər. Belə olan halda, ortaya sual çıxır, kim bu məsələdə daha çox məsuliyyət daşıyır? Yəni iqtidar seçkini saxtalaşdırıbsa, o zaman belə çıxır ki, administrativ resurslardan istifadə edib. Yox, əgər müxalifət seçkini saxtalaşdırıbsa, o zaman belə çıxır ki, iqtidar seçkinin keçirilməsinə nəzarət edə bilməyib. Göründüyü kimi, çox mürəkkəb bir mənzərə yaranır. Təbii ki, Türkiyə qardaş ölkə olduğu üçün, biz onların daxili işinə qarışmırıq. Bütün bunlarla yanaşı, səslənən qarşılıqlı ittihamlar fonunda, sözügedən məsələdə kimin daha çox məsuliyyət payı var?
Məsələyə münasibət bildirən VİP-in sədr müavini Ramil Hüseynovun sözlərinə görə, bu məsələdə, istər-istəməz, iqtidarın məsuliyyəti daha böyük görünür: “Bunun da bir sıra səbəbləri var. Əvvəla Türkiyədə bələdiyyə seçkiləri Azərbaycanda da böyük maraqla izlənildi. Bu da təbiidir. Çünki Türkiyə Azərbaycana qardaş ölkədir. Əlbəttə biz də istəməzdik ki, İstanbulda seçkilərin nəticələri ilə bağlı belə vəziyyət yaransın. Hesab edirəm ki, ümumən, bütün tərəflər məsuliyyət daşıyır. Ancaq sözügedən məsələdə məsuliyyət payı daha çox hakim partiyanın üzərinə düşür. Çünki seçkinin keçirilməsində, bir sıra işlərin təşkilində və nizamlanmasında hakimiyyətin rolu böyükdür. Allah göstərməsin, tutaq ki, hansısa seçki məntəqəsində güclü terror hadisəsi baş versəydi, o zaman təhlükəsizliklə bağlı məsuliyyət hakimiyyətin üzərinə düşərdi. Şükürlər olsun ki, belə xoşagəlməz hal yaşanmadı. AKP 17 ildən çoxdur Türkiyədə hakimiyyətdədir. Ötən illər ərzində hakim partiya bir sıra işlər görüb. O cümlədən, ölkənin seçki qanunvericiliyinə bir sıra dəyişikliklər edilib. Bütün bunlardan çıxış edərək hesab edirəm ki, hər iki tərəf məsuliyyət daşısa da, iqtidarın məsuliyyəti daha böyükdür. Hər halda, gedən proseslərin nəticələrini gözləmək lazımdır. Ümid edirəm ki, gedən proseslər qardaş ölkədə xoşagəlməz fəsadlara gətirib çıxarmayacaq”.
Vidadi ORDAHALLI
