Mübariz Əhmədoğlu: “ABŞ-Ermənistan münasibətlərinin perspektivi yaxşı görünmür”
Ötən il ərzində ABŞ Prezidenti Donald Tramp ölkə başçısı İlham Əliyevə 4 məktub göndərdi. Müxtəlif əlamətdar hadisələrlə bağlı göndərilən təbrik məktublarında Azərbaycanla əməkdaşlığa böyük önəm verdikləri qeyd edilirdi. Xüsusilə də məktublarda Dağlıq Qarabağ probleminin həllinə dair ABŞ adından ümidverici vəd də verilirdi.
ABŞ Prezidenti Donald Trampın Azərbaycan Prezidenti İlham Əliyevə göndərdiyi məktubların birindən sitat: “...Biz Sizinlə birlikdə terrorçuluğun məğlub edilməsində, yeni iş yerlərinin yaradılmasında və Avropanın enerji təhlükəsizliyinin yaxşılaşdırılmasında tərəqqi əldə edə bilərik. Korrupsiyaya qarşı mübarizədə və Dağlıq Qarabağ münaqişəsinin sülh yolu ilə həllində irəliləyiş bu səylərə töhfə verəcək. Sizə və Azərbaycan xalqına ən xoş arzularımı bildirirəm”.
Ötən il müstəqillik günü ilə bağlı ABŞ Prezidenti Donald Trampın Ermənistan baş naziri Nikol Paşinyana ünvanladığı məktubun mətnində də Dağlıq Qarabağ probleminin həllinə ümidverici yanaşma ortaya qoyulurdu. Ermənistanın müstəqillik günü ilə bağlı ünvanlanan təbrik məktubunda diqqətçəkən məqamlardan biri də budur ki, Tramp yaxın aylarda Dağlıq Qarabağ konfliktinin həlli istiqamətində yaxşı imkanların açılacağını vurğulayıb. Bu xüsusda ABŞ Prezidenti bildirib ki, bu hal ABŞ-Ermənistan münasibətlərinin inkişafında da yeni səhifə aça bilər. Çünki Minsk Qrupunun həmsədri kimi ABŞ uzun illərdir bu konfliktin həlli istiqamətində səylər göstərir.
Göründüyü kimi, Tramp konkret vaxt göstərərək, yaxın aylarda Dağlıq Qarabağ probleminin həlli istiqamətində imkanların olacağına işarə edirdi. Ancaq həmin məktubların göndərilməsinin üstündən az qala bir il vaxt keçir, Dağlıq Qarabağ probleminin həlli istiqamətində isə heç bir irəliləyiş yoxdur. Trampın məktubundakı məqamlarla əldə olunan nəticə arasındakı uyğunsuzluğu nə ilə izah edə bilərik?
Siyasi İnnovasiya və Texnologiyalar Mərkəzinin rəhbəri Mübariz Əhmədoğlu “Bakı-Xəbər”ə açıqlamasında bildirdi ki, Trampı məyus edə biləcək səbəblər bəllidir: “Bəli, Paşinyana göndərilən məktubda Tramp yaxın aylarda Dağlıq Qarabağ konfliktinin həllində irəliləyişin olacağına işarə etmişdi. Bu əminlik onda təsadüfən yaranmamışdı. Elə zənn edirdi ki, Paşinyanı onlar hakimiyyətə gətirib və yeni fiqur kimi gənc “demokrat” ABŞ-ı eşidəcək. Sonra biz gördük ki, Paşinyan hətta Serj Sarkisyanın da dövründəkindən qat-qat rusiyapərst siyasət yürütdü. Görünən budur ki, Paşinyan Putinin təsir zonasından çıxa bilmir. ABŞ-ın sözü Paşinyanın yanında istədikləri kimi həyata keçmədiyinə görə iki ölkə arasında ciddi problemlər meydana çıxıb. Son il ərzində ABŞ-la Ermənistan arasında bir dənə də olsun sənəd imzalanmayıb. ABŞ-dan Ermənistanla bağlı səslənən bəyanatları erməni təşkilatları verir. Ermənistan rəsmiləri ABŞ-a səfərə gedəndə yalnız erməni diasporu tərəfindən qəbul edilir. Bu yaxınlarda onların xarici işlər naziri nə qədər cəhd etsə də, ABŞ dövlət katibi ilə görüşə bilmədi. Paşinyanın həyat yoldaşı Anna Akopyan Konqresin kitabxana müdiri səviyyəsində qəbul olundu. Bütün bunlar onu deməyə əsas verir ki, Paşinyan ABŞ-ı aldadıb. Buna görə də onun ABŞ-a səfərini təşkil edə bilmirlər”.
Ekspertin sözlərinə görə, ABŞ heç də əl-qolunu sallayıb oturmur: “Kifayət qədər addımlar atır. Ola bilər ki, biz onların nəticəsi ilə bir müddət sonra tanış ola bildik. ABŞ Rusiya ilə ayrılmaz müttəfiq olduğunu təsdiqləyən Ermənistana qarşı ayrıca sanksiya da tətbiq edə bilər. Çünki Vaşinqton son vaxtlar Rusiyanın ayrılmaz müttəfiqlərinə qarşı belə sanksiyalar tətbiq edir. Ermənistan Rusiyanın maraqlarına uyğun olaraq, Suriyaya humanitar yardım göndərməklə ABŞ-a qarşı olduğunu əməldə də sübut edib. Bütün bunları analiz etdikdə bu nəticəyə gəlirik ki, ABŞ-Ermənistan münasibətlərinin perspektivi yaxşı görünmür. Məhz bu səbəblərə görə Trampın ehtimalları özünü doğrultmayıb”.
Məhəmmədəli QƏRİBLİ
