Özünü xalqa demokratik rejim kimi sırımağa çalışan Nikol Paşinyan iqtidarının əslində daha çox diktatura mahiyyətinə malik olması hər keçən gün daha əyani şəkildə təsdiqini tapmaqdadır. Ən müxtəlif sahələrdə kobud surətdə pozulan hüquqlar, daxili və xarici siyasətdə yaşanan çoxsaylı problemlər cəmiyyətin Nikol Paşinyanın hakimiyyəindən narazılığını daha böyük sürətlə artırmaqdadır.
Ermənistan parlamentinin sabiq vitse-spikeri, Respublika Partiyasının mətbuat katibi Eduard Şarmazanov bu xüsusda bildirir: "Ermənistanda hər şey bir-birinə qarışıb. Baş nazir Nikol Paşinyanın davranışları və uğursuz daxili-xarici siyasəti Ermənistanın təhlükəsizliyinə təhdid yaradır".
O bildirib ki, Paşinyan hökuməti əhaliyə verdiyi vədləri yerinə yetirmir: “Hökumət maaşların artırılmasını və yeni iş yerlərinin açılmasını vəd edi, amma əvəzində guya optimallaşdırma apararaq iş yerlərini ixtisara salır. Sevgi və həmrəylik vəd edir, amma əksinə, ölkəmizdə nifrəti təbliğ edirlər. Söz verirlər ki, qisas alınmayacaq, amma siyasi həbslər həyata keçirirlər. Bu siyahını uzun-uzadı davam etdirmək olar. Qanunun aliliyindən danışırlar, amma öz ölkəsinin polis alayını ələ keçirən silahlı terrorçuları əfv edirlər. İstənilən demokratik ölkədə polis alayını ələ keçirənlər indi həbsxanada idi, amma Ermənistanda onlar sərbəst şəkildə siyasi fəaliyyətlə məşğuldur. Bu absurddur”. Şarmazanov vurğulayıb ki, Paşinyan ziddiyyətli bəyanatların sayına görə rekorda imza atıb: “Hökumət həm də əhalini aldadır. İşsizlər ordusu hər ötən gün artır. Bəs hanı verilən vədlərin real nəticəsi?”. Baş verənləri şərh edən "1-in.am" portalı isə yazır:
"Belə görünür, özü üçün yaranan təhdidi nəzərə alan hökumət sosial şəbəkələr, media üzərində də ciddi nəzarət həyata keçirmək istəyir. Hər halda baş nazir Nikol Paşinyan hökumət toplantısında yalan məlumat və informasiya manipulyasiyaları deyilən məsələyə toxunaraq Milli Təhlükəsizlik Xidmətinin direktoru Artur Vanetsyana bu məsələ ilə məşğul olmağı tapşırıb.
Nikol Paşinyan “Bəli, ölkəmizdə söz və informasiya azadlığına zəmanət verilib, amma bəzi kriminal çevrələr ictimai rəyi manipulyasiya etməyə milyonlar itirirsə, onda bu, milli təhlükəsizlik məsələsidir” deyib və Artur Vanetsyana üz tutaraq əlavə edib: “Bu barədə söhbətimiz olub. Ümid edirəm ki, sizin xidmət bu baxımdan konkret nəticələr təmin edə bilər. Belə deyək, sosial şəbəkələrdə bunun guya bizim inqilabımızla bağlı olduğunu göstərmək üçün, o cümlədən keçmiş hakimiyyət təmsilçilərinə münasibətdə zorakılığa çağıran inqilabi bayraq altında çıxış edən yalan xəbərlərə qədər. Bu sayaq manipulyasiyalar çox sərt əks-zərbə almalıdır. Düşünürəm ki, Ermənistan qanunvericiliyi, əlbəttə, söz və fikir ifadə etmək azadlığı hüququnu heç cür şübhə altına almadan belə bir imkan verir. Bu, keçə bilməyəcəyimiz qırmızı xətdir”.
Nikol Paşinyanın bu açıqlaması artıq sosial şəbəkələrdə coşğun münasibət hasilə gətirib. Demək olar, hamı bu fikirlə həmrəydir ki, baş nazirin MTX başçısına tapşırığı, özəlliklə güc qurumlarını və MTX-ni bu məsələyə qatmaq yolverilməzdir. Əslində, yalan xəbərlər, feyknyus və informasiya manipulyasiyaları problemi kürəsəl müşküldür. İnformasiya texnologiyalarının və özəlliklə sosial şəbəkələrin inkişafı buna gətirib ki, pul xərcləyərək ictimai rəyi azdırmaq və yalan məlumat verməklə cəmiyyəti çaşdırmaq olar. Bu problemin həlli hələlik tapılmayıb. Xüsusən söz azadlığının ən ali və danılmaz dəyər sayıldığı inkişaf etmiş demokratik ölkələrdə də tapılmayıb. Avtoritar dövlətlərdə, xüsusən də müxtəlif dövlət qurumlarının informasiya meydanına və sosial şəbəkələrə müdaxilə cəhdi nəzərə alınmaqla repressiv üsullarla yalan məlumata və manipulyasiyaya qarşı əks təsir göstərməyə cəhd edən Rusiyada durum nisbətən başqadır. Son illərdə Rusiyada bu problemi tənzimləyən bir sıra qanunlar qəbul edilib.
Bəli, yalan, manipulyativ məlumat problemi Ermənistanda da var. Bəllidir ki, hakimiyyət opponentləri, birinci növbədə keçmiş sistemin təmsilçiləri bu imkandan yararlanır. Aydındır ki, onlar bu məqsədə böyük məbləğdə pul itirirlər. Bəs Nikol Paşinyanın problemin həllini MTX-ə vermək üsulu yerindədirmi? Qətiyyən yox. Çünki, bir yandan Milli Təhlükəsizlik Xidmətini yalan məlumat və manipulyasiyalarla mübarizədə təsəvvür etmək çətindir, o biri yandan aydındır ki, şərti deyilsə, MTX sosial şəbəkələrə girsə, bu heç bir yaxşı nəticə verməyəcək. Bu məsələdə özbaşınalıq ehtimalı son dərəcə böyükdür və MTX, ya da istənilən başqa bir qurum hər şeyi asanlıqla necə gəldi bir-birnə qarışdıra bilər. Və Paşinyan bunun söz azadlığına təsir etməməli olduğu haqda nə qədər bəyan etsə də, aydındır ki, MTX-nın bu sahəyə qatılması söz və ifadə azadlığını pozacaq, çünki MTX hansı məlumatın mötəbər, hansının şübhəli olduğunu qət etdiyi andan kütlıəvi informasiya vasitələri və sosial şəbəkələr senzura obyekti olacaq. Bu, məqsədin nə dərəcədə düzgün və səmimiliyindən asılı olmayaraq qaçılmazdır. Buna görə də Nikol Paşinyan Milli Təhlükəsizlik Xidmətinə belə göstəriş verməklə istər-istəməz öz çıxışında keçilməsindən imtina haqda danışdığı qırmızı xətti keçib. Ümid etmək olar ki, ictimai rəy bu məsələdə həlledici önəm kəsb edəcək və hökumət son nəticədə güc qurumları vasitəsilə saxta informasiya və manipulyasiyalarla mübarizə aparmaqda son dərəcə təhlükəli niyyətindən imtina edəcək. Biz təkrar edirik ki, bu problem dünyanın, demək olar, bütün ölkələrində var və demokratik dövlət kimi bu problemin həllinin axtarışındadır, Ermənistan da beləcə daha effektli və ən önəmlisi, söz azadlığını zərrəcə təhdid etməyən həll axtarmalıdır". Bu yazılanlardan aydın görünür ki, Paşinyan onun üçün təhdid yaradanları artıq zor gücünə sıradan çıxarmağa hazırlaşır.
Nahid SALAYEV
