Fərəc Quliyev: “Hətta müxalif mövqedə olan bir adam iqtidarın milli maraqlar naminə addımını görürsə, onu dəstəkləməlidir” Tural Abbaslı: “Bir qrup var, sanki kimin əsl müxalifət olub-olmadığına dair lisenziya verməyə iddialıdır”
Müxalifət təmsilçiləri arasında qovğa, qarşılıqlı ittihamlar səngimir. Buna ReAL Partiyası funksionerlərinin Avropa türnesində nümayiş etdirdikləri mövqe səbəb olub. Keçmiş səfir, hazırda müxalif mövqedə olan Arif Məmmədovun anonim mənbəyə istinadən ReAL-çıların Avropada İlham Əliyevin apardığı islahatları təqdir etməsi ilə bağlı verdiyi açıqlamadan sonra bu qovğa daha da dərinləşdi.
Müxalifətin bir qanadı ReAL-çıları açıq xəyanətdə günahlandırmağa başladı. Xüsusilə də AXCP və Milli Şura təmsilçiləri ilə ReAL arasında bir neçə gündür söz atışması, qarşılıqlı ittihamlar yer alır. ReAL funksionerləri Arif Məmmədovun fikirlərinin doğru olmadığını desələr də, sözügedən müxalif dairə onlardan əl çəkmir. Ən son belə söz atışması Milli Şura rəhbərliyində təmsil olunan, sabiq millət vəkili Gültəkin Hacıbəyli ilə ReAl funksioneri Natiq Cəfərli arasında yaşanıb. Natiq Cəfərli Hacıbəylinin “Facebook” üzərindən səsləndirdiyi ittihamlara elə öz səhifəsindən cavab verib: “Kimsə eyni mərkəzdən idarə edilən prosesi davam etdirmək istəyirsə, buyursun, amma bu mənim sonuncu cavabımdır. Gör nə şərait yaranıb ki, həm iqtidar mediası (Eynulla Fətullayev), həm özünü müxalifət mediası adlandıranlar (Qənimət Zahidov) eyni mövqedən çıxış edirlər. Bu haqda ayrıca düşünün, indi isə keçək səsləndirilən fikirlərə və cavablara. Gültəkin xanımın yazısından sitat: “Mənim hörmətli Arif Məmmədovun statusunu paylaşaraq "Nəhayət ki, bilindi. Böyük biabırçılıqdır" kimi başlıq yazdığımı dedi. Həmin statusun fotosunu şərh bölümündə paylaşacağam. Görün mən həmin sözləri yazmışammı, yoxsa Natiq bəy mənə böhtan atır”.
Cavabım: Yaxşı ki, ağıllı insanlar “YouTube” kəşf ediblər, hamı girib bir daha baxa bilər. Çıxışımda qeyd etdim ki, Milli Şura üzvləri Arif bəyin xəyal ürünü olan sözləri böyük biabırçı hadisə kimi tirajlayıb yayırlar. Aparıcının, “kimlər bunu edir” sualına cavab olaraq, Gültəkin xanımın adını çəkdim. Xanım özü də etiraf edir ki, statusu paylaşıb, başlığı da belədir: “Bu nədir? Əgər burada yazılanlar doğrudursa, çox pis...”, deməli: 1) Gültəkin xanım bu sözləri (anonim birinin kiməsə guya nəsə deməsini) ciddi qəbul edib paylaşır, 2) Gültəkin xanım hətta bunun doğru ola biləcəyi ehtimalına inanaraq bu addımı atıb. Mən məhz buna iradımı bildirmişəm, Arif Məmmədov anonim mənbəyə istinad edib, öz absurd fikirlərini də əlavə edərək nəsə yazıb, Gültəkin xanım isə buna inanmaq istəyir. Halbuki, mənim də, sədrimizin də telefon nömrələri xanımda var – bir zəng edə, bizim də mövqeyimizi öyrənə bilərdi, əgər təbii ki, həqiqəti axtarırdısa...
Sonda bir daha qeyd edirəm: Bizim bu ölkədə bir rəqibimiz var – YAP, məqsədimiz hakimiyyəti, sistemi, hökuməti kökündən dəyişməkdir. Bunun üçün çalışmışıq, çalışırıq, çalışacağıq, kimlərsə sistem dəyişikliyi baş versə, öz qabiliyyətlərinə bələd olduqları üçün orada yer tapa bilməyəcəklərini düşünürlərsə, bu onların öz problemidir. Amma bu günə qədər öyrəşmişdilər ki, illərdir bunlar çamur atacaqlar, hamı da abrını gözləyib susacaq – olmadı, bizlə bu keçməz! Ona görə də təşvişə düşüb iqtidarlı-ənənəvi müxalifətli birgə total hücuma keçiblər. Bu, şəxsən mənim son cavabımdır, onlara sərf edəcək zamanımız yoxdur, məmləkətdə yeni siyasi sistem və düzən üçün fürsət, həm də onlar üçün fürsət yaratmağa davam edəcəyik!”
Maraqlıdır ki, AXCP və Milli Şuradan başqa müxalifətin digər radikal qanadı və konstruktiv müxalif mövqeyində olan tərəfi heç də ReAL-ın hərəkətini təftiş etməkdə maraqlı görünmür.
Hakimiyyətə qarşı konstruktiv müxalif mövqeyi ilə seçilən partiyanın sədri, millət vəkili Fərəc Quliyev “Bakı-Xəbər”ə bildirdi ki, xüsusən də anarxist mövqedə olan müxalif nümayəndələrində qəribə bir yanaşma var: “Mən onlara heç radikal da deməzdim. Onların necə radikal olduqlarını biz yaxşı görmüşük. Sanki 25 ildir qan düşmənçiliyi ilə məşğuldurlar. Buna müxalifətçilik demək olmaz. Hətta müxalif mövqedə olan bir adam iqtidarın milli maraqlar naminə addımını görürsə, onu dəstəkləməlidir. Burda qəribə nə ola bilər ki? Həmin anarxistlər fərdlərə qarşı mübarizə aparırlar. Hakimiyyətə qarşı müxalifsənsə çatışmazlıqları tənqid et, öz variantını təklif elə. Yaxşı işi isə təqdir etmək lazımdır. Həmin anarxistlərin ReAL-la bağlı yanaşmasını qərəzli sayıram. Həm də özünüifşadır. Bu, siyasi mübarizə metodu deyil”.
Nisbətən radikal müxalif mövqeyi ilə seçilən Ağ Partiyanın sədri Tural Abbaslı da ReAL-a edilən hücumları yersiz adlandırdı: “Müxalifət çalışmalıdır ki, bir-birinin addımlarını təftiş etməsin. Bir qrup var, sanki kimin əsl müxalifət olub-olmadığına dair lisenziya verməyə iddialıdır. Sənin nə işin var ki, kim-kimi dəstəkləyib? Bunu özü bilər, idarə heyəti bilər. Bundan şou düzəltmək lazım deyil. “Mənim kimi düşünməyən məndən deyil” – bu, bolşevik yanaşmasıdır. Bu, siyasi baxımdan da qeyri-etikdir. Buna sabah qoy seçici qiymət versin. Düz addım atmırsa, onun nüfuzu aşağı düşəcək, səninki yox. Əgər ReAl son addımları islahat kimi qiymətləndirirsə, özü bilər. Bizim də başqa mövqeyimiz varsa, bu, partiyamızın mövqeyidir. Təftişi dayandırmaq lazımdır”.
Məhəmmədəli QƏRİBLİ
