Əhməd Qəşəmoğlu: “Bu layihənin müxtəlif ölkələrdə təqdim edilməsi və onun müsbət qarşılanması ölkəmiz üçün yaxşı göstəricidir”
Azərbaycan humanitar dialoqun ən yüksək səviyyədə inkişaf etdiyi bir ölkədir. Ölkəmiz sivilizasiyalararası dialoqun formalaşmasına öz ideya və layihələri ilə mütəmadi olaraq töhfələr verir.
Son illər Azərbaycanın bu istiqamətdə həyata keçirdiyi işlər dünya dövlətləri, xalqları arasında sülh körpüsünün yaranmasına xidmət edir. Bakının humanitar dialoq məkanına çevrildiyini təsdiqləyən yüzlərlə fakt var. 2008-ci ildə Azərbaycan Prezidenti İlham Əliyevin ideyası ilə yaranan “Bakı prosesi” xüsusi çəkiyə malikdir. 10 ildir aktiv, dinamik şəkildə fəaliyyət göstərən və bütün dünyanın diqqətini cəlb edən “Bakı prosesi”nin 10 illiyi ilə bağlı müxtəlif xarici ölkələrdə “Bakı prosesi”nin təqdimatları keçirilir.
ABŞ-ın Nyu-York ştatında BMT-nin Sivilizasiyalar Alyansının Nazirlər Konfransında “Bakı prosesi”nin təqdimatı keçirilib.
Azərbaycandan kənarlarda “Bakı prosesi”nin təqdimatlarının keçirilməsini müsbət hal kimi dəyərləndirən professor Əhməd Qəşəmoğlu hesab edir ki, bu gün Azərbaycan bəşəriyyətin ümumi hədəflərinə töhfə verən humanitar tədbirlərin keçirildiyi bir məkan kimi tanınır. “Mənim “Bakı prosesi”nin həm ideyasına, həm də onun xarici ölkələrdə təqdimatının keçirilməsinə münasibətim çox müsbətdir. Çünki bu gün Yer kürəsi çox gərgin problemlər içindədir, Yer üzü heç bir vaxt bu qədər gərgin olmayıb. Bunun da bir sıra səbəbləri var və o səbəblərdən biri də qloballaşmadır. Qloballaşmanın bəşəriyyətin birgəyaşayışla bağlı fəlsəfəsini lazımi səviyyədə qəbul edə bilməməsi, güc sahiblərinin bütün ağılagəlməz metodlardan istifadə etməsi bəşəriyyətin qorunmasına zərər vurur. Dünyada proseslərin belə şəkil aldığı bir vaxtda “Bakı prosesi” kimi tədbirlər, istiqamətlər ancaq alqışlanmalıdır. Yer üzündə vəziyyət bu cür davam edə bilməz. Dünyanın xilası üçün ölkəmizdə yaranan bu ideyanın, layihənin müxtəlif ölkələrdə təqdim edilməsi və onun müsbət qarşılanması ölkəmiz üçün yaxşı göstəricidir. Bu prosesin Azərbaycandan dünyaya yayılması təsadüfi deyil. Bunun kökü, əsası var. Gəlin 1000 illik tariximizi, ədəbiyyatımızı götürək. İstər Azərbaycan ədəbiyyatı, istər folkloru, istərsə də mədəniyyətində hər zaman başqa xalqlara, digər mədəniyyətlərin daşıyıcılarına hörmət hissləri ifadə olunub” - deyə bildirən Ə.Qəşəmoğlu qeyd etdi ki, Nizami Gəncəvinin əsərlərində bu gün dünyanın sülh istəyən qüvvələrinin, BMT-nin, eləcə də Azərbaycanın bu istiqamətdə tutduğu yolun cizgiləri əks olunub. Yer üzünün əminamanlıq şəraitində yaşamasının yollarının sistemli şəkildə mütəfəkkirin əsərlərində əks olunduğunu deyən Ə.Qəşəmoğlunun fikrincə, Azərbaycan elə bir coğrafiyada yerləşir ki, o, təbii olaraq, mədəniyyətlərin qovuşmasına töhfələr verir. “Azərbaycan hər hansı bir məhəlli yer deyil. Ölkəmiz sivilizasiyaların kəsişdiyi bir məkandır və tarix boyu da belə olub. Azərbaycan mədəniyyəti yeganə unikal mədəniyyətdir ki, burada dünyanın aparıcı mədəniyyətləri təbii tarixi bir yolla bir-birilə çuğlaşıblar. Azərbaycan kimi bir məkandan “Bakı prosesi” ideyasının meydana çıxması və dünyaya yayılması tarixi bir prosesdir, bu, bəşəriyyətin özü üçün çox əhəmiyyətlidir. Azərbaycanın irəli sürdüyü bütün humanitar, mədəni ideyalar, həyata keçirdiyi layihələr bəşəriyyətin xilasına yönəlib” - deyən Ə.Qəşəmoğlu bildirdi ki, Azərbaycanın güclü tərəfi sözügedən ideyalardır.
İradə SARIYEVA
