Rauf Zeyni: “Paşinyanın bu hərəkəti tənqid edilmirsə, deməli, onlar sülh yaratmaqda da səmimi deyillər”
Ermənistanın baş naziri Nikol Paşinyan Dağlıq Qarabağdakı iki girovumuzu qaytarmaq istəmir. Onun iddiasına görə, girovlarımız Dağlıq Qarabağda adam öldürüblər. Ancaq Paşinyanın istəyindən asılı olmayaraq, Azərbaycanda həbsdə olan ermənilərin qohumları son günlər Ermənistanda fəallaşıblar, ölkələri üçün strateji yolları kəsib etiraz edirlər.
Onlar tələb edirlər ki, əsirlər dəyişdirilsin. Əslində, onlar bununla Azərbaycanın irəli sürdüyü “hamının hamıya” prinsipinə dəstək verirlər. Paşinyan hələlik müqavimət göstərir və düşünür ki, Dağlıq Qarabağdakı iki girovu Azərbaycana qaytarsa, Ramil Səfərov olayı təkrarlanacaq. Çox maraqlıdır ki, Paşinyanın girovların dəyişdirilməsinə etiraz etməsinə beynəlxalq vasitəçi ölkələr və təşkilatlardan reaksiya gəlmədi. Bu laqeydliyin səbəbini necə izah etmək olar?
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, Paşinyanın hərəkətini və ona beynəlxalq reaksiyanın olmadığını çox mənfi dəyərləndirir: “Münaqişənin tarixinə baxdıqda görünür ki, bütün sülhməramlı təşəbbüslər bizim tərəfimizdən irəli sürülüb. Özü də biz bunu işğala məruz qalan ölkə kimi etmişik. Bunun əvəzində ermənilər nə edir? Bütün varlıqları, gücləri ilə həmin prosesləri pozurlar. Əsirlərin dəyişdirilməsi ilə bağlı son prosesi buna misal göstərə bilərik. Hər iki tərəfdə bərabər sayda əsir var. Ermənistandan səs çıxmır. Çünki onların bütün hakimiyyətləri öz vətəndaşlarının taleyinə biganə olub. Həmin ölkəni hər zaman cinayətkar xuntalar idarə edib. Təəssüf ki, özünü demokrat kimi qələmə verən Paşinyan da sələflərinin yolunu daha pis formada davam etdirir. Fikir verin, bu adam Azərbaycanın təklifinə avantyura ilə cavab verir. Deyir ki, onların əlində olan əsirlər daha təhlükəlidir. Bəs Azərbaycanın ələ keçirdikləri nədir? Hazırda məhkəməsi gedən erməni diversantın ittiham olunduğu işə baxsanız görərsiniz ki, onlar Azərbaycanda hansı təxribatları törətməyi planlaşdırırmışlar. Necə olur ki, biz onu dəyişməyə razıyıq, amma Paşinyan öz doğmalarının qəbirlərini ziyarət etməyə gedən əsirləri vermək istəmir. Bunun bir adı var, öz vətəndaşının taleyinə biganə qalma. Həmin əsirlərin doğmaları Paşinyandan tələb edirlər ki, mübadiləni həyata keçirsin, amma o yayınır. Maraqlıdır ki, münaqişənin nizama salınması ilə məşğul olan vasitəçi ölkələr və beynəlxalq təşkilatlar Paşinyanın mövqeyinə susqun qalırlar. Minsk Qrupu həmsədrləri niyə qınamır bu hərəkəti? Onların missiyası sülh yaratmaqdan ibarətdirsə, Azərbaycanın bu təşəbbüsünü dəstəkləməlidirlər. Paşinyanın prosesdən yayınmasını isə sərt tənqid etməlidirlər. İnsan haqları ilə məşğul olan təşkilatlar niyə səsini çıxarmır? Paşinyanın bu hərəkəti tənqid edilmirsə, deməli, onlar sülh yaratmaqda da səmimi deyillər”.
Məhəmmədəli QƏRİBLİ
