Daşdəmir Əliyev: “Belarus kimi siyasi cəhətdən bizimlə yaxın olan bir ölkə ilə hərbi əməkdaşlığımızın dərinləşməsi çox zəruri və təqdir ediləsidir”
Azərbaycan Prezidenti İlham Əliyev Minskdə Belarus Prezidenti Aleksandr Lukaşenko ilə birgə mətbuata bəyanatla çıxışında ölkələrimiz arasındakı hərbi-texniki əməkdaşlığın indiki səviyyəsi və gələcəkdə genişlənmə perspektivindən danışıb:
“Bizim əməkdaşlığımızın istiqamətlərindən biri də hərbi-texniki sahədir. Biz bu əməkdaşlıqdan çox razıyıq, məhsulların keyfiyyəti və səmərəliliyi çox yüksəkdir. Buna görə də təsadüfi deyil ki, ölkələrimiz arasında hərbi-texniki əməkdaşlığın artıq yaxşı tarixi, kifayət qədər böyük həcmləri və genişlənməyə yaxşı meyli var. Təsadüfi deyil ki, bu gün imzalanan sənədlər arasında memorandum da var. Bu sənəd ən qısa müddətdə Belarusdan hərbi texnikanın növbəti partiyasının alınması üçün müqaviləyə çevriləcək”.
Göründüyü kimi, ölkə başçısı yaxın gələcəkdə Azərbaycanla-Belarus arasında hərbi-texniki sahəni əhatə edəcək bir müqavilənin ərsəyə gələcəyinin anonsunu verib. Belə bir müqavilənin ərsəyə gəlməsinin ölkəmiz üçün nə kimi əhəmiyyəti olacaq?
Ekspert Daşdəmir Əliyevin sözlərinə görə, Belarus hərbi sənayedə dünyada öncül sırada duran dövlətlərdən biridir: “Bu baxımdan da Belarusla hərbi əməkdaşlıq ordumuz üçün ciddi üstünlüklər deməkdir. Eyni zamanda, bununla Ermənistana mesajlar verilmiş olur. Bu istiqamətdə münasibətlər yüksək templə inkişaf edir. Minskdə keçən il Azərbaycan-Belarus hərbi əməkdaşlığına dair saziş imzalanıb. Bundan əvvəl isə Azərbaycanla regionda hərbi balansı lazımi səviyyədə saxlayacaq operativ taktiki raket kompleksləri səviyyasində "Polonez" raket kompleksi, pilotsuz texnikalar və zenit raket komplekslərinin alınması ilə bağlı müqavilələr bağlanıb. Hazırda müvəffəqiyyətlə icra olunur. Silah və texnikaların nəzərdə tutulan qrafikə uyğun təhvil verilməsi həyata keçirilir.
Belarus Azərbaycanın faktiki müttəfiqi sayılır. Həm Avrasiya məkanında, həm də Kollektiv Təhlükəsizlik Müqaviləsi Təşkilatında Qazaxıstanla Belarus ermənilərin etirazına baxmayaraq, Azərbaycanın mövqeyindən çıxış edirlər. Bunun da kökü hərbi əməkdaşlığın üzərində inkişaf edib. Bütün bu yaxınlaşmanın fonunda bizim hərbi sahədəki əməkdaşlığımız daha da genişlənir. Artıq Prezident bu sahədə müqavilənin imzalanacağını da bildirdi. Bu da o anlama gəlir ki, bunun ölkəmiz üçün böyük faydası olacaq. Çünki Azərbaycan müharibə şəraitində yaşayır, torpaqlarının bir hissəsi işğal edilib. Belə bir ölkənin hərbi sahədə etibarlı tərəfdaş tapması çox zəruridir. Belarus, eyni zamanda, silah istehsal edən ölkədir. Biz müxtəlif ölkələrdən silah alırıq. Amma Belarus kimi siyasi cəhətdən bizimlə yaxın olan bir ölkə ilə hərbi əməkdaşlığımızın dərinləşməsi çox zəruri və təqdir ediləsidir”.
Məhəmmədəli QƏRİBLİ
