Qabil Hüseynli: “Fransanın özü də Azərbaycanın ərazi bütövlüyünü tanıyır, amma real işə gələndə isə çox riyakar və saxta mövqe nümayiş etdirir”
Məlum olduğu kimi, Dağlıq Qarabağdakı separatçı rejimin “başçısı” Bako Saakyanın Fransaya səfəri ilə bağlı Azərbaycanın Fransadakı Səfirliyi bu ölkənin Xarici İşlər Nazirliyinə etiraz notası təqdim edib.
Azərbaycan XİN-in yaydığı bəyanatda deyilir ki, Azərbaycan Fransanın - BMT-nin Təhlükəsizlik Şurasının daimi üzvü və Minsk Qrupunun həmsədri qismində çıxış edən bir ölkənin işgalçı dövlətin və işgalçı rejimin nümayəndəsinə səfər etmək imkanını və bu səfər çərçivəsində müəyyən görüşlərin təşkilinə şərait yaratmasını, bir növ, işğalçı rejimin təşviqinə xidmət edən bir addım kimi qiymətləndirir: “Və fikirləşirik ki, Fransanın bu addımı onun obyektivliyini və qərəzsizliyini ciddi şübhə altına alır. Fransanın bu addımı ilə əlaqədar Azərbaycanın Parisdəki Səfirliyi tərəfindən Fransa Xarici İşlər Nazirliyinə etiraz notası təqdim olunub”.
Qeyd edək ki, təqdim olunan nota ilə bağlı Fransanın da rəsmi cavabı özünü gözlətməyib. Fransanın Xarici İşlər Nazirliyinin nümayəndəsi Azərbaycanın Dağlıq Qarabağdakı separatçı rejimin “başçısı” Bako Saakyanın Fransaya səfərinə etirazı ilə bağlı jurnalistlərin sualına cavab verərkən deyib ki, Fransa “Dağlıq Qarabağ Respublikası”nı tanımır və özünü onun “rəhbəri” hesab edən şəxslərlə heç bir əlaqə saxlamır: “Fransa separatçı Dağlıq Qarabağ Respublikasını tanımır və özünü onun başçısı hesab edənlərlə heç bir əlaqə saxlamır. Fransa Minsk Qrupunun həmsədri kimi dinc və stabil həll yolu tapmaq üzərində işləyir və öz vasitəçi missiyasını ədalətlə yerinə yetirir".
Fransanın təqdim etdiyi rəsmi cavabda Dağlıq Qarabağ probleminin mahiyyətinə, demək olar ki, toxunulmayıb və ən əsası, münaqişənin ərazi bütövlüyü prinsipi əsasında həllinə dair heç bir fikir səslənməyib. Amma biz ABŞ və Avropa Birliyinin rəsmi mövqelərində münaqişənin Azərbaycanın ərazi bütövlüyü hesabına həll edilməsinin vacibliyinə dair fikirlərin xüsusi olaraq vurğulanmasına tez-tez rast gəlirik. ATƏT-in Minsk Qrupu həmsədrlərindən biri olan Fransanın Dağlıq Qarabağla bağlı açıqladığı rəsmi mövqeyinin bu şəkildə kasad və qərəzli olmasını nə ilə əlaqələndirmək olar?
Politoloq Qabil Hüseynli qəzetimizə bildirdi ki, Fransanın yalnız bu bəyanatı deyil, ümumilikdə, siyasəti düzgün qurulmayıb: “Çox təəssüflə bildirməliyik ki, bu hal Makronun prezidentliyi dönəmindən sonra daha bərbadlaşmağa başladı. Fransa Prezidenti özünü obyektiv aparmır. Sözün həqiq mənasında, belə təəssürat yaranır ki, bu adam ya beynəlxalq hüquq qaydalarını bilmir, ya da bilirsə, Azərbaycanı saya salmır. Bu adam Frankofoniya sammitini İrəvana saldı. Özü ilə bərabər, minnətlə Kanadanın baş nazirini də gətirdi. Məqsəd Ermənistanı populyarlaşdırmaq, beynəlxalq münasibətlərdə aktiv rol oynadığını göstərmək idi. O, İrəvandan Bakıya gəlməli idi. Amma bunu etmədi. Fransanın bir sıra böyük bələdiyyələrinin nümayəndələri Azərbaycanın işğal olunmuş ərazilərinə - Dağlıq Qarabağa gəldilər. Oradakı bələdiyyələrlə dostluq haqqında sənəd imzaladılar. Bu, Azərbaycanın suverenliyinə, ərazi bütövlüyünə zərbədir. Azərbaycan bu fakta qarşı xarici işlər nazirləri səviyyəsində öz etirazını bildirdi. İndi isə Makronun xəbəri olmamış deyil ki, Qarabağ separatçılarının “rəhbəri” Bako Saakyan Parisə səfərə gedib. Səfəri Ermənistan mətbuatı rəsmi səfər adlandırır. Halbuki, tanınmamış qondarma rejimin “rəhbərinin” səfəri rəsmi ola bilməz”.
Politoloqun sözlərinə görə, Fransanın özü də Azərbaycanın ərazi bütövlüyünü tanıyır: “Amma real işə gələndə isə çox riyakar və saxta mövqe nümayiş etdirir. Azərbaycanın təqdim etdiyi etiraz notasından sonra Fransa rəsmisi açıqladığı mövqedə münaqişənin həllindəki vasitəçilikdən danışır. Amma konfliktin əsas həll düsturu olan ərazi bütövlüyü terminini işlətmir. Bu bir daha Fransanın ermənipərəst mövqedə olduğunun sübutu sayıla bilər. ATƏT-in Minsk Qrupunun həmsədri olan dövlətin proseslərə konstruktivlik gətirmək əvəzinə, qızışdırıcı addımlar atması nəinki pislənməlidir, hətta ciddi təhqiqat obyekti olmalıdır. Azərbaycan Fransa rəhbərliyinin yol verdiyi qızışdırıcı hərəkətlərə görə BMT-yə, Avropa Şurasının özünə müraciət etməli, bu ölkənin Azərbaycanın ərazi bütövlüyünə sui-qəsd etməsini sübut etməyə çalışmalıdır. Çox xoşagəlməz, mürəkkəb vəziyyət yaranıb. Hesab edirəm ki, bununla kifayətlənməməli, Minsk Qrupundan uzaqlaşdırılması məsələsini gündəmə gətirməli, hətta tələb etməlidir. Onsuz da bəllidir ki, uzun illər Fransa Minsk Qrupunda çox destruktiv rol oynayır. Danışıqlar prosesinin səmərəli aparılmasına mane olur”.
Məhəmmədəli QƏRİBLİ
