“Azərbaycan höküməti və xalqı təmkinli siyasət və davranışlar göstərdikcə Fransa dövləti Minsk Qrupunun həmsədrlərindən biri kimi tərəfsizlik statusunu daşımağa layiq olmadığını göstərən yeni-yeni bədnam faktlar ortaya qoyur”. Bunu baki-xeber.com-a eyni adlı qəzetin və saytın baş redaktoru Aydın Quliyev deyib.
Siyasi ekspert bildirib ki, əslində Azərbaycan 90-cı illərdə Minsk Qrupunun üç həmsədrindən biri kimi Fransanın təsdiqlənməsinə razılıq verməklə bu ölkəyə həm hörmət göstərdi, həm də geniş geosiyasi, geoiqtisadi fəaliyyətlər üçün kart-blanş verdi: “Qarabağ məsələsi bizim üçün taleyüklüdür. 90-cı illərdə Azərbaycan rəhbərliyi əslində Minsk Qrupunda Fransanın həmsədr olmasının qəti şəkildə əleyhinə idi. Lakin Fransanın dövlət siyasətində erməni lobbisinin təsirli rol oynamasına baxmayaraq, bu ölkə Qarabağ məsələsində tam obyektiv olmaq öhdəliyi götürdü, Azərbaycan rəhbərliyi məhz bu öhdəliyə əsaslanaraq, Qarabağ probleminin həllində Fransaya obyektiv və tərəfsiz vasitəçi olmaq üçün şans verdi, ABŞ və Rusiya ilə bir sırada Fransanın obyektiv olmasına və erməni lobbisinin təsirindən çıxmasına şərait yaratdı. Bakının Fransadan gözlədiyi təmənnalı bir şey deyildi, Fransa sadəcə, beynəlxalq hüququn tələbləri baxımından tərəfsiz olmağa borclu idi. Azərbaycan Minsk Qrupunda Fransanın həmsədrliyinə razılıq verməklə onun geosiyasi proseslərdə daha fəal iştirakına meydan açdı, Fransa Azərbaycanın neft-qaz sənayesinə, iqtisadiyyatına buraxıldı, yüzlərlə Fransa şirkətinə Azərbaycanda əl-qol açma şansı verildi.
Lakin illər boyu baş verən hadisələr Fransanın ermənipərəst mövqedən uzaqlaşa bilmədiyini sübut etdi. Bu faktlar təsdiqlədi ki, Fransa hər dəfə deklarativ olaraq qondarma “Dağlıq Qarabağ Respublikasını” guya tanımadığını bəyan etsə də, pərdə arxasında başqa siyasət aparıb. Fransanın hələ indiyədək heç vaxt Qarabağ probleminin Azərbaycanın ərazi bütövlüyü, suverenliyi və sərhəd toxunulmazlığı çərçivəsində həllini açıq bəyan etməməsi bütün pərdəarxası mətləbləri ortaya qoyur”.
Aydın Quliyev konkret faktlara diqqət çəkərək, bunların təsadüf olmadığını bildirir: “Fransanın şəhərləri qondarma “DQR”in şəhərləri ilə qardaşlaşır, Fransa deputatları maneəsiz şəkildə qondarma “DQR”ə gedib-gəlirlər, qondarma “DQR”in qanunsuz rəhbərləri çox rahat şəkildə Parisə gedirlər, Fransa hökuməti dəfələrlə qondarma “DQR” nümayəndələrinin Parisdə xeyriyyə marafonları keçirməsinə şərait yaradır, uydurma erməni genosidi Fransa Parlamentinin və prezidentlərin daimi siyasi leksikon mövzusudur, real Xocalı soyqırımına Fransa hökuməti heç bir hörmət göstərməyib, Makron, ən azı, formal balans görüntüsü yaratmaq xatirinə olsa da doğru yanaşma sərgiləmədi və regionumuza son səfər vaxtı tək İrəvana getdi. Fransa hökumətinin Avropa Birliyi kuluarlarında Azərbaycan əleyhinə fəal iş aparması və əslində Ermənistanın lobbiçiliyini etdiyinə dair çox əsaslı söz-söhbətlər var. Bu ölkənin rəhbərləri Azərbaycanda iqtisadi maraqlarını gen-bol həyata keçirsələr də, Ermənistanın təcavüzkar siyasətinə təəssübkeş mövqedən bir addım geri çəkilə bilmədilər”.
Aydın Quliyev bildirdi ki, ikili standart siyasətin hər fürsətdə davam etdirilməsi Fransanın Minsk Qrupunun tərəfsiz həmsədri ola bilmədiyini qəti olaraq sübut edir: “Fransa Azərbaycanın hələ 90-cı illərdə ona doğru etdiyi böyük jestə adekvat qarşılıq verməyi bacarmadı, daha doğrusu, erməni lobbisinin güclü təsirləri buna imkan vermədi. Bütün bunlar onu göstərir ki, Fransa şirkətlərinin Azərbaycan iqtisadiyyatında iştirakdan əldə etdiyi qazanc vəsaitin son taleyi şübhəlidir, bu vəsaitin sonda hansısa yollarla Ermənistanın təcavüzünə dəstək proseslərinə yönəlmədiyinə təminat yoxdur. Fransa şirkətlərinin Azərbaycandakı fəaliyyətlərinə yenidən baxmaq vaxtı çoxdan çatıb. Təcavüzkar ölkə ilə hər cür qardaşlaşma siyasəti aparan bir ölkə Minsk Qrupunda tərəfsizlik göstərə bilməz. Fransanın Minsk Qrupunda həmsədr kimi başqa ölkə ilə əvəzlənməsini faktlar diqtə edir. Bunu Azərbaycan dövlətinin mənafeləri və ədalət prinsipi tələb edir”.
