Məhəmməd Əsədullazadə: “Ermənistanda ictimai-siyasi dairələr hazırda Belarusun ölkəmizlə əlaqələrinin inkişafından narahatdırlar”
“Nikol Paşinyan indi yalnız hökumətdəki vəziyyətlə məşğul olmalıdır, çünki bu ölkə hazırda Avrasiya İqtisadi İttifaqına və Kollektiv Təhlükəsizlik Müqaviləsi Təşkilatına rəhbərlik edir, keçid dövründə olan ölkə üçün çox ağır yükdür. Ermənistan öhdəsindən gələcəkmi? Əgər Nikol Paşinyan bunun öhdəsindən gəlsə, bizə Sankt-Peterburqda cavab verəcək. KTMT ilə bağlı qərar isə 6 dekabrda veriləcək". Bu fikirləri Belarus Prezidenti Aleksandr Lukaşenko ölkəmizin Minskdəki səfiri Lətif Qəndilovla görüşündə söyləyib.
O, sözügedən məsələ ilə bağlı qeyd edib ki, rəsmi Minsk KTMT baş katibi vəzifəsinə üç namizəd təqdim etməyə hazırdır: “Əlifba sırası ilə növbəti ölkə Belarusdur və biz namizədliyimizi təqdim etməyə hazır olmalıyıq. Bu gün mənim KTMT baş katibi vəzifəsinə təklif edə biləcəyim üç namizəd var”.
Belarus Prezidenti vurğulayıb ki, Astanada keçirilmiş KTMT sammitində baş katibin təyini məsələsi əsas məsələ deyildi: "Bəli, biz bu məsələni müzakirə etdik, amma bu, haradasa 15 dəqiqə vaxt aldı".
Qeyd edək ki, onun bu açıqlamasından sonra Lukaşenkoya qarşı Ermənistan mətbuatında açıq hücum başlayıb, hətta onun ünvanına təhqiredici ifadələr də səsləndirilib.
Ermənistanın Xarici İşlər Nazirliyinin yeni mətbuat katibi Anna Naqdalyan isə bütün diplomatik-etik qaydaları pozaraq, A.Lukaşenkonu "yanlışlıqda" günahlandırıb: "KTMT-nin daxili məsələlərinin Bakı ilə müzakirəsi düzgün deyil. Ermənistan KTMT-yə altı ölkənin kollektiv təhlükəsizlik məsələlərini müzakirə edən məkan kimi baxır. Təşkilatın daxilində problemlər var, bunları həll etmək lazımdır”.
Xatırladaq ki, Yuri Xaçaturov Ermənistan tərəfinin təşəbbüsü ilə KTMT-nin baş katibi vəzifəsindən vaxtından əvvəl geri çağırılıb. Noyabrın 8-də Qazaxıstanın paytaxtı Astana şəhərində KTMT-nin Kollektiv Təhlükəsizlik Şurasının iclası keçirilib. KTMT-nin prosedur və rotasiya qaydalarına və əlifba sırası ardıcıllığına uyğun olaraq, 2020-ci ilə qədər baş katib vəzifəsini Ermənistan nümayəndəsi daşımalı idi. Xaçaturovun vaxtından əvvəl vəzifədən azad edilməsindən sonra Paşinyan 2020-ci ilə qədər baş katib vəzifəsini Ermənistanda saxlamağa çalışsa da, tamamilə uğursuzluqla üzləşdi. Ermənistanın yeni namizədinin təşkilatın baş katibi olmasına icazə verilmədi. Prezident Nursultan Nazarbayev rus dili üzrə əlifba ardıcıllığına görə Ermənistandan sonra növbəti baş katibin Belarusdan olmalı olduğunu bildirib. Qeyd edək ki, KTMT baş katibi vəzifəsinə Belarusun Təhlükəsizlik Şurasının katibi, Bakı hərbi məktəbinin məzunu olmuş 54 yaşlı Stanislav Zasın təyin olunması gözlənir.
O da məlumdur ki, həqiqətən hazırkı situasiyada Ermənistan eyni vaxtda 2 təşkilata rəhbərlik edə bilməz. Nəinki 2 təşkilata, heç birinə də rəhbərlik etmək iqtidarında deyil.
Maraqlıdır, bəs ekspertlər bunu necə şərh edirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Əvvəla Belarus Prezidenti A.Lukaşenkonun ölkəmizin səfirini qəbul etməsi iki ölkə arasında əlaqələrin yüksək səviyyədə olduğunun göstəricisidir. Qeyd edim ki, Belarus KTMT çərçivəsində Ermənistanla müttəfiq əlaqələrinə malikdir. Ancaq reallıq ondan ibarətdir ki, bu müttəfiqlik kağız üzərindədir. Bu gün Belarusla Azərbaycan strateji tərəfdaş olan ölkələrdir. Bundan əlavə, yüksək hərbi-müdafiə əlaqələrinə malikdirlər. Prezident Lukaşenkonun ölkəmizin səfirni qəbul etməsi, burada Ermənistan haqqında qeydləri tamamilə obyektivdir. Həmçinin, ölkəmizlə olan dinamik əlaqələrə verilən bir qiymətdir. Bununla Lukaşenko təsdiq edir ki, Azərbaycan Ermənistandan bu ölkə üçün daha da strateji əhəmiyyətə malikdir. Həqiqətən də Ermənistan Avrasiya İqtisadi İttifaqının sədri ola-ola KTMT-yə sədrlik edə bilməz. Ona görə ki, hazırda hakimiyyəti formalaşmamış bir ölkə üçün bu çox çətindir. Bundan əlavə, Ermənistan, ümumiyyətlə, heç də Avrasiya İqtisadi İttifaqını idarə edəcək səviyyədə deyil. Ermənistanda ictimai-siyasi dairələr hazırda Belarusun ölkəmizlə əlaqələrinin inkişafından narahatdırlar. Bu ölkənin işğalçı siyasəti səbəbindən artıq onun təşkilatlarda sədr kimi önəmli postda olması mənəvi cəhətdən qəbul edilmir. Ona görə də Belarus və Qazaxıstan Ermənistana bu şansı tanımırlar”.
Vidadi ORDAHALLI
