Elşən Əliyev: “Deyilən ölkə ilə münasibətlərin inkişafı bizim Avropa qitəsindəki ölkələrlə əməkdaşlığımıza da müsbət təsirini göstərəcək”
Xəbər verildiyi kimi, Slovakiya dövlətinin Baş naziri Peter Pelleqrini ölkəmizə rəsmi səfərə gəlib. Qeyd edək ki, bu onun Baş nazir kimi ölkəmizə ilk səfəridir. Azərbaycan Prezidenti İlham Əliyev Slovakiya Baş naziri Peter Pelleqrini ilə görüşüb.
İlham Əliyev Peter Pelleqrininin Baş nazir kimi ilk dəfə Azərbaycana səfər etməsindən və bu yüksək vəzifəyə təyin olunduğu az vaxtdan sonra ölkəmizə gəlişindən məmnunluğunu bildirib.
Dövlət başçısı qeyd edib ki, P.Pelleqrininin Azərbaycana səfəri ikitərəfli münasibətlərimizin inkişafı üçün əlverişli imkan yaradır.
Prezident İlham Əliyev bildirib ki, Azərbaycan-Slovakiya münasibətləri ölkəmizin Avropa İttifaqı ilə əməkdaşlığının inkişafı baxımından da önəmlidir. Dövlət başçısı bu ilin iyulunda Azərbaycanla Avropa İttifaqı arasında Brüsseldə paraflanmış “Tərəfdaşlıq prioritetləri” sənədini Avropa İttifaqı tərəfindən Azərbaycanla əlaqələrə verilən önəmin göstəricisi kimi dəyərləndirib.
Slovakiyanın Baş nazirinin Azərbaycan Respublikasının Baş naziri Novruz Məmmədovla da görüşü olub. Görüşdə iki ölkə arasında əməkdaşlığın inkişaf perspektivləri müzakirə edilib.
Sonra Baş nazir N.Məmmədovun və Baş nazir P.Pelleqrininin nümayəndə heyətlərinin iştirakı ilə geniş tərkibdə görüşü keçirilib.
Azərbaycanla dost Slovakiya arasında yaxşı əlaqələrin olduğunu bildirən N.Məmmədov qeyd edib ki, Baş nazir P.Pelleqrininin ölkəmizə səfəri ikitərəfli əməkdaşlığın daha da genişləndirilməsi baxımından xüsusi əhəmiyyətə malikdir. Azərbaycanın Baş naziri ölkələrimizin xalqları arasında yaxınlaşmanın önəmini də vurğulayıb. “Hesab edirəm ki, Azərbaycanla Slovakiya arasında beynəlxalq təşkilatlar çərçivəsində və ikitərəfli müstəvidə əlaqələrin daha da inkişaf etdirilməsi üçün yaxşı perspektivlər mövcuddur”.
Azərbaycan-Slovakiya münasibətlərinin inkişafı ölkəmiz üçün hansı perspektivləri vəd edir?
Ekspert Elşən Əliyevin sözlərinə görə, Azərbaycan və Slovakiyanı biz gənc dövlətlər sırasına aid edə bilərik: “Araşdırdıqda məlum olur ki, Azərbaycan-Slovakiya münasibətləri əsasən hər iki respublikanın müstəqillik əldə etməsindən sonra yaranmağa başlayıb. 31 dekabr 1992-ci ildə Çexiya və Slovakiya respublikaları bir-birindən ayrılıb və 1 yanvar 1993-cü ildə Slovakiya müstəqilliyini elan edib. Müstəqilliyin ilk illərində qarşılaşdıqları problemlər iki dövlət arasında əlaqələrin inkişaf etdirilməsini ləngidib. Hazırda ikitərəfli münasibətlər sürətlə inkişaf etməkdədir. Azərbaycanla Slovakiya arasında diplomatik münasibətlər 23 noyabr 1993-cü ildə qurulub. Ölkələrimiz arasında münasibətlər son illər ərzində daha da inkişaf edib. Hiss edilir ki, Slovakiya Azərbaycanla münasibətlərin inkişafına böyük maraq göstərir. Əlaqələrimizin inkişafı yalnız siyasi deyil, bütün sahələri əhatə edir. Bu baxımdan iqtisadi sahəni xüsusilə vurğulaya bilərik. Təqdim olunan statistik rəqəmlərdən də görünür ki, bu inkişafda artan dinamika nəzərə çarpır. Təsadüfi deyil ki, bu ilin 9 ayında Azərbaycanla Slovakiya arasında ticarət dövriyyəsi ötən ilin müvafiq dövrü ilə müqayisədə 33 faiz artıb. Azərbaycanda 11 Slovakiya kapitallı şirkət qeydiyyatdan keçib. Hiss edilir ki, Slovakiya Azərbaycana investisiya yatırmaqda maraqlıdır. Bunun da hər iki ölkə üçün böyük faydası ola bilər. Münasibətlərin daha dinamik məcrada davam etdiriləcəyinə daha bir sübut isə Slovakiyanın Azərbaycanda səfirlik açmaq niyyəti sayıla bilər.
Slovakiya rəsmiləri bildiriblər ki, səfirliyin qısa müddətdə açılması planlaşdırılır. Bu da iki ölkə arasında mədəni və iqtisadi münasibətlərin inkişafını sürətləndirəcək. Son bir neçə il ərzində mədəni əməkdaşlıq və əlaqələrin inkişafı çərçivəsində həm Slovakiyada, həm də Azərbaycanda çoxsaylı maraqlı mədəni tədbirlər keçirilib. Buraya məşhur musiqiçilərin çıxışları, xalq musiqisi konsertləri, sərgilər, dövlət bayramları ilə əlaqədar müxtəlif tədbirlərin təşkili və s. daxildir. Elm və təhsil sahəsində də əlaqələrin inkişaf etdirilməsi istiqamətində işlər aparılmaqdadır. Belə ki, tələbə mübadiləsi, beynəlxalq elmi tədbirlərə dəvətlər, hər iki ölkənin aparıcı universitetləri səviyyəsində elmi kadrların hazırlanması kimi işləri misal göstərmək olar. Slovakiya Avropa ölkəsidir. Azərbaycan Avropa ölkələri ilə münasibətlərin inkişafına xüsusi önəm verir. Bu baxımdan da deyilən ölkə ilə münasibətlərin inkişafı bizim Avropa qitəsindəki ölkələrlə əməkdaşlığımıza da müsbət təsirini göstərəcək”.
Məhəmmədəli QƏRİBLİ
