Məhəmməd Əsədullazadə: “Xaçaturovun KTMT baş katibliyindən uzaqlaşdırılması və Ermənistan nümayəndəsinin növbəti sədrliyinə icazə verilməməsi...”
Noyabrın 8-də Astanada Kollektiv Təhlükəsizlik Müqaviləsi Təşkilatının (KTMT) sammiti keçiriləcək və burada Ermənistan təşkilatın baş katibi vəzifəsinə öz namizədini keçirməkdə israr edəcək. Baş katib vəzifəsindən geri çağırılmış Yuri Xaçaturov reqlament üzrə nəzərdə tutulmuş 3 il müddətində KTMT-yə rəhbərlik etməyib və bu səbəbdən İrəvanda belə hesab edirlər ki, məhz onların təmsilçisi baş katib vəifəsinə təyin edilməlidir.
Ancaq yayılan məlumata görə, böyük ehtimalla, KTMT-nin yeni baş katibi Belarus nümayəndəsi olacaq. Onun artıq adı da çəkilir.
Politoloq Aleksandr Fedutayanın fikrincə, Belarus əlindən gələni edəcək ki, bu fürsəti dəyərləndirsin. Bu həm də Belarusun güc strukturlarının yüksək eşalonunda kadr dəyişikliyi üçün dinc yerdəyişməyə imkan yarada bilər. İlkin məlumatlara görə, KTMT baş katibi postuna Belarus Təhlükəsizlik Şurasının katibi Stanislav Zasın namizədliyi irəli sürüləcək. Yeri gəlmişkən, Zas 1985-ci ildə Bakı Ali Ümumqoşun Məktəbini fərqlənmə ilə bitirib.
Əgər o, bu vəzifəyə təyin edilərsə, Belarusda müvafiq vakansiya yaranır və prezident Aleksandr Lukaşenko güc strukturlarında nüfuzlu generalların yerdəyişməsi üçün manevr imkanı əldə edir.
Görünən odur ki, Ermənistan beynəlxalq təşkilatlarda mövqelərini bir-bir itirir. Nikol Paşinyan hakimiyyətə gələndən sona bu tendensiya bir az da sürətlənib. Ötən müddət ərzində Ermənistanın yeni baş nazirinin Qərbdən gözləntiləri özünü doğrultmayıb. Nə maliyyə, nə də digər yardımlar bu ölkəyə göstərilməyib. Həmçinin, bir sıra beynəlxalq qurumlarla əlaqələrin inkişafında dönüş yaradılmayıb. Bütün bunlarla yanaşı, Ermənistanın Rusiya ilə münasibətlərində müəyyən soyuqluq yaşanır. Məsələ ondadır ki, Ermənistanda Xaçaturovla bağlı cinayət işinin açılması KTMT-nin nüfuzuna zərbə vurub. Bütün bunların fonunda, Ermənistanın beynəlxalq təşkilatlarda mövqelərini ardıcıl olaraq itirməsini ekspertlər necə dəyərləndirirlər?
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə aspektdən yanaşdı: “Ermənistanda Nikol Paşinyanın rəhbərliyi ilə başlanan inqilabdan sonra bu ölkənin ənənəvi siyasi kursunda müəyyən qədər mərkəzdənqaçma meylləri görsəndi. Daim Rusiyanın orbitində olan Ermənistanın yeni hakimiyyətinin siyasətinin əsas məqsədi Rusiyanın forpostluğundan çıxmaq və Kremlin əlaltılarını zərərsizləşdirməkdir. Məhz Paşinyanın ilk hakimiyyət günlərindən başlayaraq KTMT baş katibi Yuri Xaçaturova qarşı cinayət işi açdırması bu təşkilata vurulan siyasi zərbə idi. Həmçinin, bunu etməkdə məqsəd Rusiyanın imicini korlamaq idi. Rəsmi İrəvan hesab edirdi ki, bununla Rusiyanın ölkəsinə qarşı təzyiqlərini önləyəcək və müstəqil dövlət kimi fəaliyyətini gücləndirəcək. Bununla bərabər, təşkilatlarda sözü eşidiləcək. Göründüyü kimi, hakimiyyət eyforiyasında olan Paşinyan hesab edirdi ki, Rusiyanın təşkilatlarında inqilab edəcək. Ancaq məlum olduğu kimi, proseslər tam əksinə getdi. Ermənistanın mövqeləri zəiflədi. Xaçaturovun KTMT baş katibliyindən uzaqlaşdırılması və Ermənistanın nümayəndəsinin növbəti sədrliyə icazə verilməməsi rəsmi İrəvana Moskvanın növbəti zərbəsidir. Belarus nümayəndəsi KTMT baş katib seçiləndən sonra Ermənistanın mövqeləri ciddi şəkildə zəifləyəcək. Çox güman ki, bu belə də olacaq. Hesab edirəm ki, Ermənistan artıq beynəlxalq təşkilatlarda öz mövqeyini qoruya bilməyəcək”.
Vidadi ORDAHALLI
