Elşən Həsənov: “ATƏT və digər Avropa təsisatları məsələyə bir qədər sərt mövqe bildirməlidirlər”
Rusiyaya səfəri çərçivəsində ATƏT-in baş katibi Tomas Qreminqer “Valday” klubunda çıxışı zamanı Ermənistanın qarşıdan gələn növbədənkənar parlament seçkilərinə lazımi şəkildə hazırlaşmadığını bildirib: "Ermənistan hakimiyyəti 9 dekabrda növbədənkənar parlament seçkilərinin keçirilməsinə hazırlıq üçün olduqca az zaman ayırıb".
Baş katib Ermənistanda keçiriləcək seçkilərin tələskənliyinə diqqət çəkərək, parlament seçkilərinin o qədər də vacib olmadığını bildirib: “Şəxsən mən düşünürəm ki, parlament seçkiləri üçün çox az vaxt saxlayıblar, amma buna təəccüblənmirəm. Çünki aydın idi ki, Ermənistanın müvəqqəti hökuməti öz hakimiyyətini möhkəmləndirməyi, legitimliyi üçün ictimai dəstək almağı istəyəcək”.
ATƏT-in baş katibinin Ermənistandakı seçki hazırlığı ilə bağlı tənqidi fikirlərini yetərli saymaq olarmı?
Azərbaycan Sosialist Partiyasının sədri Elşən Həsənov qəzetimizə bildirdi ki, ümumən yanaşma doğrudur: “Amma Ermənistanda yaşananların və seçki imitasiyasının fonunda bunu yetərli saymaq olmaz. Bilirsiniz ki, Ermənistan parlamenti 24 oktyabr və 1 noyabrda keçirilən səsvermələrdə ölkənin baş nazirini seçə bilməyib. Bu səbəbdən də, konstitusiyaya uyğun olaraq, prezident Armen Sarkisyanın fərmanı ilə parlament buraxılıb və 9 dekabra növbədənkənar parlament seçkiləri təyin olunub. Seçkilərin təyin olunmasına “qanuni” don geyindirilən prosesin özü böyük biabırçılıq və saxtakarlıqla həyata keçirildi. Çox təəssüflər olsun ki, Avropa qurumları həmin proseslə bağlı lazımi reaksiya vermədilər. Faktiki olaraq, Paşinyan parlamentə istədiyi “mahnını” sifariş verib, onu “ifa” etdirdi. Ona qulaq asmayanda isə parlamenti mühasirəyə aldırıb zorla istədiyi qərarların qəbuluna nail olurdu. Avropa qurumlarına onun nümayiş etdirdiyi ən böyük sayğısızlıqdan biri də seçkinin təkmilləşdirilməsi üçün Ermənistana təqdim olunun Venesiya Komissiyasının tövsiyələrinə əməl etməməsi oldu. Buna da belə don geyindirildi ki, guya Ermənistan parlamenti həmin tövsiyələri məqbul saymadığı üçün, onun tətbiqinə səs verməyib. Gülməli bir prosesdir. Necə ola bilirdi ki, Paşinyan öz dirijor çubuğu ilə Ermənistan parlamentini istədiyi kimi hərəkət etdirə bilirdi, ancaq Venesiya Komissiyasının tövsiyəsi məsələsində parlament müstəqil oldu? Burdan bir daha aydın görünür ki, ölkədə demokratik seçkilərin keçirilməməsini istəyənlərin başında elə Paşinyanın özü durur. Real situasiya onu deməyə əsas verir ki, Paşinyan istəsəydi, parlamentdə Venesiya Komissiyasının tövsiyələrini qəbul etdirərdi. Həmin tövsiyələrdə seçkiyə nəzarət mexanizminin təkmilləşdirilməsinə dair müddəalar öz əksini tapırdı. ATƏT-in baş katibinin bəyanatını bir qədər zəif sayıram. Çünki Ermənistanda seçkinin antidemokratik keçəcəyini şərtləndirən amil yalnız vaxtın azlığı ilə ölçülmür. Seçkiqabağı mühit Ermənistanla bağlı daha sərt qanunların qəbul edilməsini vacib edirdi. Bu vəziyyətə belə loyal bəyanatlarla münasibət bildirəcəklərsə, onda vəziyyət daha da acınacaqlı olacaq. Paşinyan hakimiyyətə gələndən sonra demokratiya pərdəsi altında qanunlara necə saymazdan yanaşırdısa, seçkilər zamanı və ondan sonrakı etapda da bunu davam etdirəcək. Hesab edirəm ki, ATƏT və digər Avropa təsisatları məsələyə bir qədər sərt mövqe bildirməlidirlər”.
Məhəmmədəli QƏRİBLİ
