Əli Mahmud: “Prezidentin belə bir məsələ ilə bağlı əlaqədar qurumlara göstəriş verməsi, bu məsələnin araşdırılması üçün işçi qrupunun yaradılması alqışlanmalıdır, alqışlanır da”
“Mikayıl Müşfiq fiziki baxımdan az yaşayıb. Lakin buna baxmayaraq, o, böyük ədəbi irs qoyub gedib. Stalinin repressiya maşınından xilas ola bilməyən böyük şairimizin poeziyamıza bəxş etdiyi nadir incilər hər zaman sevilə-sevilə oxunur. Müşfiqin poeziyası bənzərsizdir. O, özünün üslubunu, dəst-xəttini yaradıb. Müşfiqin yaradıcılığı o qədər geniş və əhatəlidir ki, onu oxuyub öyrənməklə bitmir. Milli düşüncəmizin poeziyada əks olunmasında Müşfiqin rolu, mövqeyi əvəzsizdir. O, xalqımızın elə böyük ədiblərindəndir ki, onun yaradıcılığı böyük bir ədəbi nəslin yetişməsində əhəmiyyətli rol oynayıb”.
Bu fikirləri Azərbaycan Yazıçılar Birliyinin üzvü, şair-jurnalist, “Qarabağa aparan yol” qəzetinin baş redaktoru Əli Mahmud bizimlə söhbətində bildirdi. Müsahibimiz qeyd etdi ki, M.Müşfiq Azərbaycan ədəbiyyatında, poeziyasında öz mövqeyi, yönü, istiqaməti olan şairdir.
Müasir dövrdə Müşfiqin yüzlərlə ardıcılının, mənəvi övladlarının olduğunu deyən Ə.Mahmudun sözlərinə görə, M.Müşfiqsiz poeziyamız bəlkə də kasıb görünərdi. Hər zaman gənc qalan və ədəbiyyatımızda gənclik nəfəsi, havası ilə yaşayan Müşfiqin ədəbi irsinin tədqiqata cəlb edildiyini və onlarla gəncin onun yaradıcılığı ilə bağlı elmi iş yazıb müdafiə etdiyini xatırladan müsahibimiz hesab edir ki, gələcəkdə də Müşfiqin öz tədqiqatçıları olacaq.
Azərbaycan Prezidentinin M.Müşfiq irsinə göstərdiyi sayğı və qayğını yüksək dəyərləndirən Ə.Mahmud hesab edir ki, ölkə başçısının böyük şairin ruhuna ehtiramı təqdirəlayiqdir. “Eşidəndə ki, cənab Prezident Müşfiqlə bağlı mühüm qərar verib, çox sevindim. Çünki ədəbiyyatımızda, söz dünyamızda öz xüsusi çəkisi, yeri olan Müşfiq bu dəyəri haqq edir. Sözün açığı, mətbuatda oxuyanda ki, Müşfiqin qəbri tapılıb, qəribə hisslər keçirdim. Biz illərdir Müşfiqin Nargin adasında güllələnib nəşinin dənizə atıldığı barədə xəbərlər eşitmişik. Kaş ki, həqiqətən həmin qalıqlar Müşfiqə aid olsun. İnanın ki, bu hər bir ədəbiyyat adamının böyük arzusudur. Cənab Prezidentin mərd bir Azərbaycan oğlu kimi M.Müşfiqlə bağlı məsələni şəxsi nəzarətə götürməsi çox müsbət haldır. Bu o deməkdir ki, Müşfiqin sahibi Azərbaycan xalqıdır, Azərbaycan dövlətidir. Ədəbiyyatımızın ən böyük himayəçisi olan cənab Prezident, həmişə olduğu kimi, bu dəfə də həssaslıq göstərib və Müşfiq şəxsiyyətinə qayğı ilə yanaşıb. Prezidentin belə bir məsələ ilə bağlı əlaqədar qurumlara göstəriş verməsi, bu məsələnin araşdırılması üçün işçi qrupunun yaradılması alqışlanmalıdır, alqışlanır da. İnanıram ki, işçi qrupu bizim intizarımıza son qoyacaq. Bu il Mikayıl Müşfiqin 110 illik yubileyidir. O qalıqlar Müşfiqə aid eilərsə, bu onun 110 illiyinə ən böyük töhfə olar” - deyə Ə.Mahmud vurğuladı.
İradə SARIYEVA
