Qabil Hüseynli: “Boltonun verdiyi açıqlamaların məzmununda bizə ziyan olan məqamlar yoxdur”
Rusiya Xarici İşlər Nazirliyi ABŞ Prezidentinin milli təhlükəsizlik üzrə müşaviri Con Boltonun Ermənistanda verdiyi bəyanatı tənqid edib.
Moskva Boltonun bu açıqlamasını dövlətin daxili işlərinə kobud müdaxilə adlandırıb: “Bu günlərdə İrəvanı ziyarət edən ABŞ Prezidentinin köməkçisi Bolton ictimai şəkildə Ermənistandan öz beynəlxalq münasibətlərindəki “tarixi klişe”dən (söhbətin Rusiya ilə ənənəvi dostluqdan getdiyi xüsusi şəkildə gizlədilməyib – red.) imtina etməyi tələb edib. O, həmçinin, Nikol Paşinyandan parlament seçkisindən sonra Dağlıq Qarabağ probleminin həllində təşəbbüskar addımlar gözlədiyini bəyan edib. Bolton ABŞ silahının reklamını da unutmayıb. Boltonun İrəvanda səsləndirdiyi bütün bəyanatlar tənqidə layiqdir”.
Rusiya XİN-i bildirir ki, Boltonun 25 oktyabrda “Azadlıq” radiosuna verdiyi müsahibədə belə fikir səsləndirildi: “Ermənistan üçün asılı olmaq və ya həddən artıq xarici təsirlərə məruz qalmaq yox, həqiqətən tam suveren olmaq vacibdir”. Rəsmi Moskva bu fikirlə bağlı bildirib ki, yaxşı olardı Bolton öz sözlərinin mənası üzərində düşünsün.
Rusiya dövləti adından Boltonun Ermənistanda olarkən işlətdiyi fikirlərlə bağlı verilən sərt reaksiyanı necə dəyərləndirmək olar?
Politoloq Qabil Hüseynlinin sözlərinə görə, Con Boltonun regiona etdiyi səfəri Azərbaycan üçün uğurlu saymaq olar: “Biz məsələyə öz maraqlarımız prizmasından yanaşmalıyıq. Ola bilər ki, Boltonun səfəri, verdiyi açıqlamalar kimisə qane etmir. Bu heç də o anlama gəlmir ki, biz də həmin etiraz fikirləri ilə həmrəy olmalıyıq. Hələ Con Bolton Bakıda olarkən İrəvanın da münaqişə ilə bağlı mövqeyini öyrənəcəyini söylədi. Onun Ermənistanda apardığı danışıqlardan sonra verdiyi bəyanatların məzmununa fikir vermək lazımdır. Bolton daha çox Ermənistandan müstəqil olmağa, maksimum dərəcədə Rusiyanın təsirindən çıxmağı tələb edib. Daha sonra Paşinyandan Dağlıq Qarabağ məsələsilə bağlı fəallığı artırmağı istəyib. Rusiya XİN-in bəyanatında görünür ki, onlara Boltonun öz silahlarını reklam etməsi xoş təsir bağışlamayıb. Əslində, Rusiyadan belə reaksiyanın veriləcəyi gözlənilən idi. Çünki Boltonun İrəvanda səsləndirdiyi bəyanatların ümumi məzmunu onların ziyanına idi. Təbii ki, Rusiyanın xoşuna getməz ki, onun forpostu olan bir ölkədə kimsə gəlib Moskvanı qane etməyən və məzmunu Ermənistanı onlardan uzaqlaşdırmağa hesablanan açıqlamalarla çıxış etsin. Hesab edirəm ki, Boltonun verdiyi açıqlamaların məzmununda bizə ziyan olan məqamlar yoxdur. Əksinə, ABŞ rəsmisi Ermənistana konstruktiv olmağın yollarını açıq mətnlə izah edir. Tərəflərə silah təklif etmək isə o deməkdir ki, ABŞ bizə qarşı tətbiq olunan ədalətsiz “907-ci düzəliş”i yumşaltmaq və ya ləğv etmək barədə düşünür”.
Politoloqun sözlərinə görə, ABŞ Cənubi Qafqazda öz təsirini artırmaq istəyir, bu da Moskvanı qane etmir: “Bu zaman əsas istinad nöqtəsi kimi Azərbaycanı seçdiyi heç kimə sirr deyil. ABŞ uzun illərdir Azərbaycanın neft, qaz, dəmir yolu strategiyasına ciddi dəstək verir. ABŞ yaxşı başa düşür ki, Azərbaycanın maraqları Qərbin, ABŞ-ın, eləcə də onun müttəfiqləri olan Avropadakı ölkələrin səyləri ilə üst-üstə düşür. Bu nöqteyi-nəzərdən Azərbaycanın Qərb üçün əhəmiyyəti çox qiymətlidir. Bundan başqa, Azərbaycan öz ərazisi vasitəsilə ABŞ-ın Əfqanıstandakı qoşun kontingentinin təchiz edilməsində çox böyük rol oynayır. Əfqanıstana daşınan yüklərin 80%-i Azərbaycanın nəqliyyat vasitələri ilə həyata keçirilir. Üstəlik də Azərbaycanın hərbi bölməsi Əfqanıstanda sülhü qoruma missiyasını yerinə yetirir”.
Məhəmmədəli QƏRİBLİ
