Məhərrəm Zülfüqarlı: “Bu bizim üçün çox əhəmiyyətli və önəmli əməkdaşlıq formatıdır”
Azərbaycan Respublikasının Xarici İşlər Nazirliyinin Beynəlxalq İnkişafa Yardım Agentliyi 8 sentyabr 2018-ci ildə yaradılan və tarixdə ilk dəfə olaraq Azərbaycanda təhsil almış əcnəbiləri bir araya gətirən "Azərbaycanın Əcnəbi Məzunlarının Beynəlxalq Assosiasiyası"nın təqdimatını keçirib.
Təqdimat VI Bakı Beynəlxalq Humanitar Formu çərçivəsində ADA Universitetində keçirilən "Gələcəyimizə sərmayə: dayanıqlı və inklüziv inkişafa doğru" mövzusunda “dəyirmi masa”nın yekununda baş tutub.
Bildirilib ki, Azərbaycanda təhsil almış əcnəbi məzunlar tərəfindən daxil olmuş çoxsaylı müraciətlər əsasında yaradılan təşkilatın təsisçiləri ADA Universiteti, Azərbaycan Dövlət Neft və Sənaye Universiteti və Azərbaycan Dillər Universitetidir.
Qeyd olunub ki, assosiasiyanın yaradılmasında əsas məqsəd Azərbaycanda təhsil almış əcnəbi vətəndaşların bir araya gətirilməsi, əcnəbi tələbələr və təhsil aldıqları universitetlər arasında qarşılıqlı əlaqə yaradılması, maraqlı şəxslər və təşkilatların əcnəbi məzunlarla əməkdaşlığa cəlb edilməsi, ictimai faydalı məqsədlərə nail olunmasıdır.
Əlavə edək ki, assosiasiyanın tərəfdaşları qismində Azərbaycan Respublikasının Təhsil Nazirliyi, Azərbaycan Respublikasının Milli Elmlər Akademiyası və Azərbaycan Respublikasının Xarici İşlər Nazirliyinin Beynəlxalq İnkişafa Yardım Agentliyi çıxış edir.
Azərbaycan Prezidenti İlham Əliyev VI Bakı Beynəlxalq Humanitar Forumu çərçivəsində keçirilən "Gələcəyimizə sərmayə: dayanıqlı və inklüziv inkişafa doğru" mövzusunda "dəyirmi masa" iştirakçılarına müraciət edərək, "Azərbaycanın Əcnəbi Məzunlarının Beynəlxalq Assosiasiyası"nın yaradılması münasibətilə onları təbrik edib. Prezidentin ünvanladığı təbrikdə deyilir ki, istər sovet dövründə, istərsə də müstəqillik illərində on minlərlə əcnəbi gənc Azərbaycanda ali təhsil almış, ən müxtəlif ixtisaslara yiyələnib: “ Sevindirici haldır ki, bu gün həmin gənclər öz ölkələrinin ictimai-siyasi həyatında, sosial-iqtisadi inkişafında fəal iştirak edərək, multikulturalizm məkanı olan Azərbaycanla mənəvi körpü rolunu oynayırlar”.
"Azərbaycanın Əcnəbi Məzunlarının Beynəlxalq Assosiasiyası"nın təsis edilməsinin ölkəmiz üçün nə kimi faydaları dəyəcək?
Tarix üzrə fəlsəfə doktoru Məhərrəm Zülfüqarlı qəzetimizə bildirdi ki, belə bir assosiasiyanın yaradılması çox təqdirəlayiq haldır: ”İctimai birlik kimi fəaliyyət göstərəcək bu təşkilat çox ciddi işlərə imza ata bilər. Bu, ölkəmizin həm başqa ölkələrlə əməkdaşlığına, həm də Azərbaycana daha çox tələbənin cəlb edilməsinə müsbət təsiri ola bilər. Ölkəmizdə bənzər qurumlar fəaliyyət göstərir. Məsələn, Türkiyədə təhsil almış tələbələrin birləşdiyi bir qurum var ki, qeyri-hökumət təşkilatı kimi fəaliyyət göstərir. Slavyan ölkələrində təhsil alan tələbələri öz ətrafında birləşdirən qurumlar da var. Bunlar öz ətrafında daha çox ölkəmizdən gedib xaricdə təhsil alan tələbələri birləşdirir. Ancaq bir faktı da nəzərə alaq ki, bizim ölkəmizdə də çoxlu sayda əcnəbi tələbə təhsil alıb. Onları bir qurum ətrafında koordinasiya etmək çox önəmlidir. Xüsusilə də bizim kimi ölkə üçün bu daha vacibdir. Çünki biz həm də Ermənistanla dünya miqyasında informasiya müharibəsi aparan bir ölkəyik. Bu baxımdan da ölkəmizin üzləşdiyi problemlər və həqiqətlərin dünya birliyinə müxtəlif fərqli platformalar vasitəsilə çatdırılmasına ciddi ehtiyac var. Həmin assosiasiya vasitəsilə biz burada təhsil alan tələbələri müxtəlif tədbirlərə dəvət edəcəyik. Onların digər QHT-lərlə əməkdaşlığı da güclənəcək ki, bunun da vətəndaş cəmiyyətinin inkişafına müsbət təsiri olacaq. Eyni zamanda, burada oxuyub məzun olmuş tələbələrin öz ölkələrində tutduğu mövqeləri hesabına biz müxtəlif istiqamətlər üzrə əməkdaşlığı dərinləşdirməyə nail ola bilərik. Əminəm ki, həmin tələbələrin hamısının ölkəmiz barədə müsbət fikirləri və təəssüratları var. Çünki biz qonaqpərvər ölkəyik. Bu keyfiyyətimizin onların yaddaşında silinməz iz buraxdığına əminəm. Mən xüsusilə də bu əlaqələrin qurulmasında müstəqillikdən əvvəl təhsil alan tələbələrin də prosesə cəlb olunmasının tərəfdarıyam. Həmin vaxtlar da SSRİ ilə dost olan bir çox əcnəbi ölkədən tələbələr gəlib Bakıda təhsil alırdı. Onlar hazırda elə yaş dövrünə qədəm qoyublar ki, öz ölkələrində önəmli postlar tuturlar. Hətta bu yaxınlarda məlumat yayıldı ki, xarici ölkələrdən birinin prezidenti Azərbaycanda ali təhsil alıb. Bu bizim üçün çox əhəmiyyətli və önəmli əməkdaşlıq formatıdır. Ölkəmiz üçün isə bunun yalnız xeyri dəyə bilər”.
Məhəmmədəli QƏRİBLİ
