Dünyanın bir sıra tanınmış dövlət xadimləri Bakı Beynəlxalq Humanitar Forumuna ya birbaşa qatılıb, ya da təbrik məktubu ünvanlayıblar. Açılış mərasimində Rusiya Prezidenti Vladimir Putinin müraciəti oxunub.
Müraciətdə tədris və maarif sistemlərinin təkmilləşdirilməsi, mədəniyyət və incəsənətin dəstəklənməsi, informasiya təhlükəsizliyinin və əqli mülkiyyətin qorunması ilə bağlı aktual məsələlər üzrə hərtərəfli müzakirələrin vacibliyi vurğulanıb.
Rusiya Prezidenti əmin olduğunu bildirib ki, forum iştirakçıları peşəkar təcrübələrini bölüşəcək və səmərəli beynəlxalq əməkdaşlığın yeni perspektivli forma və istiqamətlərini müəyyənləşdirəcək.
ISESCO-nun baş direktoru dünyanı Dağlıq Qarabağ münaqişəsinin nizamlanmasında ədalətli və qətiyyətli olmağa çağırdı
Dünya Ermənistan-Azərbaycan Dağlıq Qarabağ münaqişəsinin nizamlanmasında ədalətli, səmimi və qətiyyətli olmalıdır. Bunu “Yeni dünya və yeni insan formalaşdıraq: kreativlik və insan inkişafı” mövzusunda keçirilən VI Bakı Beynəlxalq Humanitar Forumu zamanı ISESCO-nun baş direktoru Əbdüləziz bin Osman əl-Tuveycri deyib.
O bildirib ki, özgə torpaqlar işğal olunduğu müddətdə sülh və təhlükəsizliyə nail olmaq mümkün deyil: “Bu, beynəlxalq hüquqa, dini təlimlərə, etika və mənəviyyata ziddir”.
Əl-Tuveycri əlavə edib ki, problemin həlli üçün beynəlxalq hüququ tətbiq etmək lazımdır:
“Dünya indi problemlərlə doludur – Fələstin, Dağlıq Qarabağ, Cammu və Kəşmir, Myanma. Çoxlu sayda insan əziyyət çəkir, amma dünya ictimaiyyəti sadəcə bunu müşahidə edir və bir qədər kömək göstərir”.
Misir vitse-spikeri “Böyük işlər görə bilərik” dedi...
Azərbaycan və Misir dost, qardaş ölkədir. Bunu isə Misir parlamenti sədrinin birinci müavini Mahmud əş-Şərif deyib.
Misir xalqının salamlarını Azərbaycan xalqına və hökumətinə çatdırdıqlarını deyən əş-Şərif qeyd edib ki, hər iki dövlət arasında əlaqələri yüksək səviyyədə inkişaf etdirmək üçün bir çox planlar var.
Bakıda keçirilən VI Beynəlxalq Humanitar Forumda iştirakından da danışan əş-Şərif əlavə edib ki, bu forum dünyadakı qlobal problemlərin həlli, eyni zamanda insanlığa dəstək baxımından çox faydalıdır: "İnanıram ki, böyük tarixi olan bu iki dövlət humanitar sahədə əməkdaşlıq, dünyada sülhün bərqərar olması üçün böyük işlər görə bilər. Bu, mədəniyyət sahəsində əlaqələrin inkişafında daha önəmli rol oynayacaq".
ABŞ və Çin… daha çox vəsait ayırır
Süni zəkanın inkişafı nəticəsində 2025-ci ilədək dünyada insanların 50 faizi iş yerini itirə bilər. Bunu Ümumdünya Əqli Mülkiyyət Təşkilatının proqram rəhbəri Yevgeniy Sesitski VI Bakı Beynəlxalq Humanitar Forumu çərçivəsində keçirilən plenar sessiyada çıxışı zamanı deyib.
Y.Sesitski deyib ki, quruma üzv olan 160 ölkə arasında ABŞ və Çin elmi ixtiralara görə daha çox vəsait sərf edir.
Rəqəmsal texnologiyaların ölkələrə yeni istiqamətlər yaratdığını deyən proqram rəhbəri əlavə edib ki, nanotexnologiya, süni zəka son zamanlar çox populyar sahəyə çevrilib:
"Ancaq alimlər xəbərdarlıq edirlər ki, süni zəkanın inkişafı ilə bağlı bir çox problemlər ola bilər. Süni zəkanın inkişafı nəticəsində 2025-ci ilədək dünyada insanların 50 faizi iş yerini itirə bilər. Ona görə yeni istiqamətlərə yaradıcı baxmaq lazımdır".
BMT rəsmisi sözdən əmələ keçməyə çağırdı
Dayanıqlı İnkişaf Məqsədlərinin həyata keçirilməsi üçün sözdən əmələ keçməyin vaxtıdır. Birləşmiş Millətlər Təşkilatının Azərbaycandakı rezident əlaqələndiricisi Qulam İsaqzai VI Bakı Beynəlxalq Humanitar Forumu çərçivəsində keçirilən Dayanıqlı İnkişafa dair Bakı Forumunda belə deyib.
Q.İsaqzai bildirib ki, Dayanıqlı İnkişaf Məqsədlərinin həyata keçirilməsi üçün yol xəritələri hazırlanmalıdır.
O qeyd edib ki, bu sahədə irəliləyişə nail olmaq üçün Azərbaycanda çox ciddi addımlar atılıb, ölkənin müvafiq strukturları bizimlə səmərəli əməkdaşlıq edirlər:
“Dayanıqlı İnkişaf Məqsədlərinin həyata keçirilməsi məqsədilə bu sahədə təcrübə və fikir mübadiləsi aparmaq üçün bu cür forumların təşkili olduqca vacibdir. Ümidvaram ki, Bakıda keçirilən bu forum bizim bilik və bacarıqlarımızı bir araya gətirəcək və 2030-cu il Dayanıqlı İnkişaf Məqsədlərinə nail olmaq üçün bizə kömək göstərəcək”.
Bakıda ümumdünya humanitar dialoq…
Bakı təkcə sivilizasiya və dinlərin kəsişdiyi şəhər deyil, həm də onların qarşılıqlı mövcud olduğu yerdir. Hamı bilir ki, dünyanın heç bir yerində Bakı Humanitar Forumu kimi tədbir keçirilə bilməz. Bunu isə rusiyalı tarixçi və politoloq Oleq Kuznetsov deyib.
O.Kuznetsovun sözlərinə görə, Bakı Humanitar Forumunda qarşılıqlı anlaşma ruhu hökm sürür və siyasi konyunktur yoxdur:
“Hər kəs Bakı prosesinin əhəmiyyətini gözəl başa düşür. Humanitar baxımdan Bakı planetar əhəmiyyət daşıyır. Mənim ISESCO-nun baş katibinin çıxışı xoşuma gəldi. O dedi ki, burada sivilizasiyalararası dialoq yox, ümumdünya humanitar dialoqi keçirilir”.
O.Kuznetsov bildirib ki, bu, həmin tədbirin xarakterinin və mühitinin göstəricisidir.
BMT rəsmisi Azərbaycana təşəkkür etdi...
BMT-nin 2030 Dayanıqlı İnkişaf Məqsədlərinə (DİM) nail olmaq üçün biz yoxsulluğun aradan qaldırılması kimi bir sıra öhdəlikləri üzərimizə götürmüşük. Bunu Birləşmiş Millətlər Təşkilatının İqtisadi və Sosial Şurasının Prezidenti (ECOSOC) İnqa Ronda Kinq Dayanıqlı İnkişafa dair Bakı Beynəlxalq Humanitar Forumunda deyib.
BMT rəsmisi qeyd edib ki, son məqsədə çatmaq üçün indiyə qədər əldə edilən nailiyyətlər kifayət deyil. O bildirib ki, dayanıqlı inkişaf məqsədlərinə nail olmaq üçün ölkələr arasında əməkdaşlıq olmalıdır, çoxtərəfli əməkdaşlıq səmərəli şəkildə həyata keçirilməlidir. Onun sözlərinə görə, hökumətlə bərabər qeyri-hökumət institutları da bu prosesə qoşulmalıdır. Ölkələr tərəfindən könüllü icmaların yaradılması məsələsinə toxunan İ.Kinq bu istiqamətdə fəaliyyətinə görə Azərbaycana təşəkkür edib:
“Azərbaycana təşəkkür edirik ki, 2017-ci ildə artıq belə bir könüllü icma təqdim etmişdi və 2019-cu ildə daha bir belə icma təqdim edəcək”.
O qeyd edib ki, DİM-lərin həyata keçirilməsi üçün qlobal əməkdaşlığa ehtiyac var. İ.Kinq bildirib ki, Bakıda keçirilən bu forum DİM-lərin həyata keçirilməsi üçün regional əməkdaşlığın gücləndirilməsi baxımından uğurlu platformadır.
O qeyd edib ki, DİM-lərin həyata keçirilməsində heç kim kənarda qalmamalıdır: “İstədiyimiz dünyanı yaratmaq üçün biz güclü olmalıyıq və birgə fəaliyyət göstərməliyik.
Slovakiya Baş nazirinin müavini Bakı Forumunun ortaq məqsədlərə nail olmaq üçün çox gözəl zəmin yaratdığını dedi…
Dayanıqlı İnkişafa dair Bakı Forumu ortaq məqsədlərə nail olmaq üçün çox gözəl bir zəmin yaradır. Bu sözləri isə Slovakiya Baş nazirinin investisiya və informasiyalaşdırma məsələləri üzrə müavini Riçard Raşi forumda çıxışı zaman deyib.
O qeyd edib ki, Dayanıqlı İnkişaf Məqsədlərini (DİM) tərəfdaşlıq vasitəsilə həyata keçirmək mümkündür: "Dayanıqlı İnkişaf Məqsədləri ilk növbədə dövlət siyasətinin özündə olmalıdır".
R.Raşi bildirib ki, 2030-cu il Dayanıqlı İnkişaf Məqsədlərinə nail olunması üzrə fəaliyyətə bütün tərəflər cəlb olunmalıdır: “Biz qeyri-hökumət təşkilatlarının nümayəndələri, elm adamları, özəl sektoru cəlb etməklə ölkəmizin bu istiqamətdə proritetini müəyyən etmişik. Dayanıqlı İnkişaf Məqsədlərinin həyata keçirilməsi strategiyası heç kimi kənarda qoymamaqla hazırlanmalıdır. Biz DİM-in həyata keçirilməsi üçün regional, milli və qlobal səviyyədə əməkdaşlıq etməliyik”.
