Bildiyimiz kimi, Fransa rəsmiləri, ayrı-ayrı şəhər merləri və millət vəkilləri Dağlıq Qarabağa qanunsuz səfərlər edirlər. Bu da sözsüz ki, dövlətimiz tərəfindən narazılıqla qarşılanır.
Fransa merlərinin, millət vəkillərinin Dağlıq Qarabağa qanunsuz səfərlərinin Dağlıq Qarabağ probleminin həlli prosesinə ziyanı nədir? Bu səfərlər Fransa-Azərbaycan əlaqələrinə nə kimi mənfi təsir edir? Məlumdur ki, Azərbaycanda bir sıra fransız şirkətləri fəaliyyət göstərirlər. Bu qanunsuz səfərlərin qarşısı alınmasa, dövlətimiz Fransanın Azərbaycanda fəaliyyət göstərən şirkətləri ilə bağlı məsələyə yenidən baxa bilərmi?
AMİP yetkilisi Əli Orucov hesab edir ki, Azərbaycan Fransa rəsmilərinin, bu dövlətdə ayrı-ayrı vəzifələr tutan şəxslərin Dağlıq Qarabağa qanunsuz səfərlərinin dayandırılması üçün Fransa qarşısında konkret tələblər qoymalıdır. Ə.Orucovun sözlərinə görə, Azərbaycanın bu gün Fransaya daha ciddi təsiretmə imkanları var: “Fransanın rəsmi dövlət qurumlarının nümayəndələrinin işğal altında olan Dağlıq Qarabağa səfərləri ilk dəfə baş vermir. Fransa rəsmiləri dəfələrlə beynəlxalq hüquq normalarını pozaraq Dağlıq Qarabağa qanunsuz səfərlər ediblər, qanunsuz tədbirlər keçiriblər. Hər dəfə də bu xoşagəlməz halla bağlı Azərbaycan tərəfi rəsmi şəkildə Fransaya öz etirazını bildirib və diplomatik qaydada öz mənfi münasibətini çatdırıb. Çox təəsüflər olsun ki, bu proses davam etməkdədir. Xüsusən də ATƏT-in Minsk Qrupunun həmsədrlərindən biri olaraq Fransanın rəsmi şəxslərinin bu addımı həm münaqişənin həllinə öz mənfi təsirini göstərir, həm də Azərbaycan-Fransa əlaqələrinə xələl gətirir. Fransa və Azərbaycan arasında müxtəlif sahələr üzrə əlaqələr mövcuddur və inkişaf edir. Mədəni, iqtisadi-ticari əlaqələrimiz normal səviyyədədir. Ancaq bu cür addımlar təbii ki, bu münasibətlərə də ziyan vurur. Azərbaycan Fransanın bu əməllərinə qarşı daha sərt addımlar atmalıdır. Çünki bu səfərlər davam edir”.
Ə.Orucov qeyd edir ki, Azərbaycan həm iqtisadi, həm də digər sahələrdə Fransaya təpki göstərməlidir. Azərbaycanda Fransaya məxsus şirkətlərdən birinin “Total” olduğunu vurğulayan Ə.Orucov bildirdi ki, “Total” Azərbaycanın enerji resurslarının xaricə daşınmasında və istismarında kifayət qədər paya malikdir. “Azərbaycanın Fransaya təsir etmək rıçaqları var. Sadəcə olaraq iradə göstərib bu rıçaqlardan istifadə etmək lazımdır. Fransa rəsmilərinin, millət vəkillərinin, merlərinin Dağlıq Qarabağa qanunsuz səfərləri dayandırılmasa, Azərbaycan burada fəaliyyət göstərən Fransa şirkətləri ilə bağlı məsələyə yenidən baxmalıdır. Çünki istər siyasi, istər iqtisadi, istər ticari, istərsə də digər tərəfdən addımlar atılmalıdır. Azərbaycan Avropaya daha çox lazımdır. Bildiyiniz kimi, Azərbaycan Avropanın enerji təhlükəsizliyinin şaxələndirilməsində müstəsna rol oynayır. Bu layihələrdə Qərbin də çox ciddi maraqları var. Bu maraqlar qarşılıqlı təmin olunmalıdır” - deyə Ə.Orucov bildirdi.
İradə SARIYEVA
