Əkbər Qoşalı: “Cənab Prezidentin çıxışları, təşəbbüsləri və forumun yüksək səviyyəli, ardıcıl mexanizmə sahib olması üçün davamlı dəstəyini qeyd etməliyik”
Ölkəmiz dünya miqyaslı daha bir mötəbər tədbirə evsahibliyi edəcək. Məlum olduğu kimi, oktyabrın 25-26-da Bakıda VI Beynəlxalq Humanitar Forumu keçiriləcək. VI Bakı Beynəlxalq Humanitar Forumunda 97 ölkədən 580 nəfər və 24 beynəlxalq təşkilatın təmsilçiləri iştirak edəcəklər.
BMT-nin baş katibinin iki müavini, ISESCO, IRCICA, TÜRKPA, TÜRKSOY, Qara Dəniz İqtisadi Əməkdaşlıq Təşkilatı, Beynəlxalq Türk Akademiyası, Parlamentlərarası Birlik, BMT-nin İqtisadi və Sosial Şurası kimi təşkilatların rəhbərləri, UNESCO-nun, MDB İcraiyyə Komitəsinin rəhbərlərinin müavinləri foruma qatılacaqlar.
Müşahidələr göstərir ki, hər dəfə keçirilən sözügedən forumda iştirak edən təşkilatların və qonaqların sayı artır.2011-ci ilin 10-11 oktyabr tarixlərində keçirilən “XXI əsr: ümid və çağırışları” adlı forum çərçivəsində dünyanın 20 dən çox ölkəsindən qonaqlar iştirak ediblər. İkinci Bakı Beynəlxalq Humanitar Forumu 2012-ci ildə keçirilib. Forumda 74 ölkəni və 10 mötəbər beynəlxalq təşkilatı təmsil edən 694 nəfər iştirak edib. 2013-cü ildə keçirilən analoji 3-cü Forumda 70 ölkəni və 5 mötəbər beynəlxalq təşkilatı təmsil edən 800 nəfər iştirak edib. 2014-cü ildə keçirilən Dördüncü Bakı Beynəlxalq Humanitar Forumunda 63 ölkəni və 4 mötəbər beynəlxalq təşkilatı təmsil edən 500 nəfər iştirak edib. 2016-cı ildə keçirilən forumun işində dünyanın 80-nə yaxın ölkəsindən 400-dən çox nümayəndə iştirak edib.
Şübhəsiz ki, VI Bakı Beynəlxalq Humanitar Forumu da möhtəşəm keçəcək. Bütün hallarda, sözügedən foruma marağın artması, xarici qonaqların sayının hər dəfə çoxalması nəyin göstəricisidir?
Məsələyə münasibət bildirən Azərbaycanda Atatürk Mərkəzinin şöbə müdiri, Milli QHT Forumu İdarə heyətinin üzvü Əkbər Qoşalı bunu bir sıra faktorlarla əlaqələndirdi: “Oktyabrın 25-26-da Azərbaycanın paytaxtında keçiriləcək VI Bakı Beynəlxalq Humanitar Forumu, adından da göründüyü kimi, paytaxt Bakının adını ardıcıl olaraq beynəlxalq səviyyədə duyurmaqdadır. Özü də humanitar təfəkkürün inkişafına təkan verən və Bakının, Azərbaycanın yalnız texniki-təşkilati işlə məşğul olmadığı forum, bu forumun mandatını müəyyənləşdirən, mandata uyğun mövzularla çıxış edən evsahibi missiyamızı da göstərməkdədir. Bunun üçün forumun tarixçəsinə, bu günədək müzakirə edilmiş mövzulara, dəvət edilmiş qonaqlara, iştirakçıların yüksək səviyyəli qonaqpərvərliklə əhatə olunmasına, habelə Azərbaycan dövlət, ictimai və elm xadimlərinin əlamətdar çıxışlarına fikir vermək yetərlidir. Əlbəttə, ilk növbədə, cənab Prezidentin çıxışları, təşəbbüsləri və forumun yüksək səviyyəli, ardıcıl mexanizmə sahib olması üçün davamlı dəstəyini qeyd etməliyik. Forumun bu günədək ardıcıl təşkili, artan iştirakçı sayı, müzakirə edilən mövzuların əhatə dairəsinin müsbət dinamikası və s. amillər tədbirə marağı artırır. İlk növbədə, dünyanın belə platformalara ehtiyacı olduğunu ifadə edir; belə forumlar yalnız təşkilatçılara deyil, bütün iştirakçılara, onların vasitəsilə kollektivlərə, qurum və quruluşlara, şəhərlərə, ölkələrə, xalqlara təsir edir; ictimai fikir düzgün qidalanır; yeniliklər, təcrübələr paylaşılır; dünyada birgəyaşayışa, hüquq bərabərliyinə töhfələr verilir və s. Bütün bunlar sülhpərvər, tərəqqipərvər dünya ictimaiyyətinin xeyrinədir, demək, belə forumların təşkili işğalçılığa, terrorizmə, başqasının torpaqlarını zəbt etməyə, soyqırımlar törətməyə, əsir və girov götürmə, işgəncə “sənət”inə, belə barbarlığı edə-edə dünyada demokrat, mədəni görünməyə çalışanlara – konkret olaraq, Ermənistana sərf edə bilməz. Erməni xalqı məsələlərə bir də bu nöqtədən, bu baxış bucağından boylanmalıdır, deyə düşünürəm.
Builki forum Cümhuriyyət İlində, Cümhuriyyətimizin, 1918-ci ildə əsası qoyulmuş demokratik təsisatlarımızın 100 illiyinin qeyd edildiyi əlamətdar günlərə düşməsi ilə də diqqətəlayiqdir. Turizm sektorunun günü-gündən inkişaf etdiyi, milli turizm brendinin ictimaiyyətə təqdim olundğu bu günlərdə paytaxt Bakıya çoxsaylı nüfuzlu qonağın gəlməsi özlüyündə bir hadisədir. İnanıram ki, Bakı Forumu gələcəkdə Şuşa Forumu, Xankəndi Forumu və s. üçün də əsas olacaq, xalqımızın qədim mədəniyyətini, yeni sağlam çağırışlara cavab verməyə hazırlığını bir daha göstərəcək”.
Vidadi ORDAHALLI
