Şamil Sabiroğlu: “Əcnəbi tələbələrin bu faktları bilməsi ona görə vacibdir ki, dünya ölkələri artıq bu həqiqətləri üçüncü tərəfin təmsilçilərinin dilindən eşidəcəklər”
Rusiya-Azərbaycan parlamentlərarası dostluq qrupunun sədri, Rusiya Dövlət Dumasının deputatı Dmitri Savelyev Türkiyənin Kayseri şəhərində Xocalı soyqırımı qurbanlarının xatirəsinə ucaldılmış abidənin açılışında bir sıra maraqlı fikirlər səsləndirib.
O deyib ki, Xocalı faciəsinin bütün dünyada azərbaycanlıların soyqırımı kimi tanınması üçün bütün səylər göstərilməlidir. D.Savelyev bildirib: "Nürnberq məhkəməsi İkinci Dünya Muharibəsi zamanı dinc sakinlərin öldürülməsinə əmr verənlərlə bağlı layiqli qərar verdi. Xocalıda isə dəhşətli faciənin günahkarları hələ də yaşayır və aparıcı siyasi postları tuturlar. Hörmətli həmkarlar, biz Xocalı faciəsinin bütün dünya meydançalarında Azərbaycan xalqının soyqırımı kimi tanınması üçün bütün səyləri göstərməliyik". Dövlət Dumasının deputatı Kayseridə təhsil alan və abidənin açılışında iştirak edən xarici tələbələrə müraciət edib: "Təhsil almağınızı bitirib, ölkələrinizə qayıdanda Azərbaycanda 26 il bundan əvvəl törədilən dəhşətli faciə barədə siyasətçilərinizə, deputatlarınıza danışın. Bundan ötrü danışın ki, sizin parlamentlər rəsmi olaraq bu faciəni Azərbaycan xalqının soyqırımı kimi tanısınlar”.
Rusiya Dövlət Duması deputatının çıxışında əcnəbi tələbələrə etdiyi müraciət xüsusilə diqqəti cəlb edir. Xocalı faciəsilə bağlı həqiqətlərin dünyaya çatdırılmasında Savelyevin əcnəbi tələbələrə etdiyi müraciəti necə dəyərləndirmək olar?
“Xocalı Soyqırımı Tanıtma” İctimai Birliyinin sədri Şamil Sabiroğlu qəzetimizə bildirdi ki, Xocalı ilə bağlı Türkiyədə təşkil edilən həmin möhtəşəm tədbir onlar tərəfindən də qürurla izlənib: “Çox sevindirici haldır ki, Kayseridəki tədbirdə Azərbaycan, Rusiya və Türkiyə rəsmiləri də iştirak ediblər. Rusiya Dövlət Dumasının üzvü D.Savelyevin mövqeyi isə çox təqdirəlayiq hal kimi dəyərləndirilməlidir. Xocalı faciəsilə bağlı bu, Savelyevdən ilk obyektiv mövqe deyil. Yadımdadır ki, o, bir müddət əvvəl də bildirmişdi ki, Xocalı faciəsində rus zabitlərinin şərəfi tapdalanıb. Bəllidir ki, həmin faciədə ermənilər rus hərbçilərindən, konkret olaraq 366-cı alayın köməyindən istfadə etmişdilər. Savelyev də məhz həmin hadisəni nəzərdə tutaraq məlum fikirləri bildirmişdi. Rusiya rəsmisindən belə konkret mövqeni eşitmək çox müsbət haldır. Təbii ki, burada Rusiya, Türkiyə və Azərbaycan arasında olan sağlam münasibətlər də böyük rol oynayır. Mən Xocalı həqiqətlərinin dünyaya çatdırılmasında verdikləri dəstəyə görə cənab Prezidentə, Birinci vitse-prezident Mehriban xanım Əliyevaya və Heydər Əliyev Fondunun vitse-prezidenti Leyla xanım Əliyevaya xüsusi minnətdarlığımı bildirirəm. Savelyevin əcnəbi tələbələrə verdiyi məsləhət isə daha ibrətamizdir. Hesab edirəm ki, bu cür təbliğat üsulları ilə biz Xocalı həqiqətlərini daha geniş auditoriyalara çatdıra bilərik. Biz uzun illərdir bu həqiqətləri dünyaya çatdırırıq. Bütün vasitələrdən istifadə olunduqca təsir effekti daha çox olur. Əcnəbi tələbələrin bu faktları bilməsi isə ona görə vacibdir ki, dünya ölkələri artıq bu həqiqətləri üçüncü tərəfin təmsilçilərinin dilindən eşidəcəklər. Maraqlı tərəfin təmsilçiləri olmadıqları üçün, həmin tələbələrin təbliğatı daha da ciddi nəticələrə səbəb ola bilər”.
Məhəmmədəli QƏRİBLİ
