Ermənistanda polis işçilərinin Azərbaycanla sərhəd bölgələrə cəlb edilməsi, həmçinin işğal altındakı Dağlıq Qarabağ bölgəsinə göndərilməsi düşmən ölkədə yeni problemlərə yol açıb.
Ermənistanda çıxan “Hraparak” qəzetinin yazdığına görə, Ermənistanda polis Azərbaycan-Ermənistan sərhədində xidmət etmək istəmir: “Bizdə olan məlumata görə, onlarla polis əməkdaşı müqaviləni pozaraq sistemdən çıxıb. Onlar növbətçiliyə görə verilən 32 min dramdan (65 dollar) imtina edirlər”. “Hraparak” vurğulayıb ki, Ermənistanın Daxili Qoşunlarında narazılıq artmaqdadır.
Qeyd edək ki, Ermənistanın Türkiyə və İranla sərhədini Rusiya Federal Təhlükəsizlik Xidmətinin Sərhəd Qoşunları, Gürcüstanla sərhədini Milli Təhlükəsizlik Xidməti, Azərbaycanla dövlət sərhədini isə Daxili Qoşunların polisi qoruyur. Amma görünən odur ki, polis Azərbaycanla sərhəddə xidmət aparmaq niyyətində deyil. Bu səbəbdən də Ermənistanda polis qüvvələri daxilində narazılıqlar baş qaldırır. “Hraparak” yazır ki, kifayət qədər yumşaq şərtlərlə işləyən polislər yeniliyə, yəni sərhəddə xidmətə alışa bilmir. Bir daha bildirək ki, bu il avqustun 15-dən etibarən baş nazir vəzifəsində olarkən Nikol Paşinyanın imzaladığı qərarla daxili qoşunlar, polis qüvvələri 15 günlük növbə ilə xidmət aparmaq üçün Ermənistan - Azərbaycan sərhədinə və Azərbaycanın işğal altında olan Dağlıq Qarabağ bölgəsinə göndərilir. Onlar kifayət qədər təhlükəli ərazilərində xidmət aparmalı olurlar. Burada olduqları vaxtda isə onlara əlavə əməkhaqqı ödənilir. “Hraparak”mənbələrə istinadən yazır ki, onlarla polis əməkdaşı artıq müqaviləni pozaraq sistemdən çıxıb. Polisin sərhədə cəlb olunması ideyasının müəllifi olan Ermənistanın müdafiə naziri David Tonoyan da yaranmış vəziyyətdə çıxılmaz duruma düşüb. Çünki o, bu məsələdə həm özünü, həm də Ermənistan iqtidarına faktiki rəhbərlyii həyata keçirən Paşinyanı pis vəziyyətdə qoyub. Tonoyan bildirir: “Bilirsiniz ki, polis qoşunları silahlı qüvvələrin başqa bir növünə aiddir. Amma indi onların döyüş vəzifələrinin həyata keçirilməsi işinə cəlb edilməsinə ehtiyac yaranıb”. Onun sözlərinə görə, bu ehtiyac sadəcə Müdafiə Nazirliyinin döyüş növbətçiliyi ilə bağlı "yeni və maraqlı qərarlar" verməsindən irəli gəlir. Lakin bundan əvvəl erməni və rus mediasında Nikol Paşinyanın Rusiyanın Federal Təhlükəsizlik Xidməti əməkdaşlarını ölkədən çıxarmağa, Ermənistan-Türkiyə sərhədinə nəzarəti rus qoşunlarının əlindən almağa hazırlaşdığına dair məlumatlar yayılmışdı. Rusları əvəz etmək üçün isə Ermənistan polis qüvvələrinin sərhədə göndəriləcəyi deyilirdi. Həmçinin vurğulanırdı ki, Paşinyan Ermənistan ordusunun say tərkibinin qənaətbəxş olmadığını nəzərə alaraq, işə yaramayan və daha çox təhdid-təzyiq funksiyasını icra edən polis qüvvələrinin Ermənistan-Türkiyə və Ermənistan-Azərbaycan sərhədlərinə göndərilməsini məqsədəuyğun hesab edib. Qeyd edək ki, Ermənistanda 26 il əvvəl formalaşdırılan polis qüvvələrinin funksiyası dövlət və ictimai təhlükəsizliyin təmin edilməsidir. Amma orduda əsgər çatışmazlığı fonunda polis artıq sərhəd bölgələrə də yeridlir. Azərbaycan tərəfinə də məlumdur ki, Ermənistan ordusunun sərhəd boyu postlarında canlı qüvvə çatışmadığı üçün yaxınlıqdakı kəndlərin mülki sakinləri müəyyən muzd qarşlılığında postlarda növbətçiliyə çıxır. Bu zaman hərbi intizamın olmamasından irəli gələn insidentlər baş verir. Yaxud içib sərxoş olan muzdlular Azərbaycan mövqelərinə və kəndlərinə xaotik atəş açırlar.
Ehtimal edilirdi ki, daxili qoşun bölmələrinin Azərbaycanla sərhədə yerləşdirilməsindən sonra Ermənistan Müdafiə Nazirliyi Qarabağa əlavə canlı qüvvə göndərmək imkanı əldə edəcək. Çünki Qarabağda da təmas xətti boyu erməni ordusunun canlı qüvvə çatışmazlığı mövcuddur. Postların bir çoxunda iki-üç hərbçi dayanır, yaxud bəzi müşahidə məntəqələri boş qalır. Amma indi görünən odur ki, polisin də cəlbi Ermənistan üçün əlavə problemlərə yol açıb. Eyni zamanda polisin Azərbaycanla sərhəd boyunca dislokasiya edilməsi Ermənistan ordusunda ciddi problemin olduğunu aydın göstərir. Onu da xatırladaq ki, Ermənistan silahlı qüvvələrinin şəxsi heyətini və texnikasını böyük bir həcmdə Azərbaycanın işğal olunmuş ərazilərində yerləşdirib. Lakin şəxsi heyət sarıdan ciddi çatışmazlıqlar həmin texnikanın idarəçilyini də qəliz hala gətirib. Statistikaya baxsaq, 1989-cu ildə 3,4 milyon əhalisi olan Ermənistanda 86 min uşaq doğulmuşdusa, 2017-ci ildə bu rəqəm 44 mindir. Bütün bunlar ölkənin silahlı qüvvələrinin yığılmasına da mənfi təsir edir. Bu fonda Ermənistan ordu sıralarını genişləndirə bilmir və hakimiyyət polis qüvvələrindən istifadə etmək məcburiyyətindədir. Amma artıq polis də bunu istəmir.
Nahid SALAYEV
