Hikmət Babaoğlu: "Bu olduqca ciddi xəbərdarlıqdır və ermənilər bundan nə qədər tez nəticə çıxarsalar, bir o qədər yaxşı olar"
Prezident İlham Əliyev cəbhə bölgəsinə səfəri zamanı aprel döyüşlərində erməni işğalından azad edilən Lələtəpədə olub. Ali Baş Komandan Lələtəpədən mühüm mesajlar verib.
"Biz son illər ərzində milyardlarla dollar dəyərində ən müasir silah-sursat, hərbi texnika almışıq. O texnikalar ən son texnologiyaya malikdir. Aprel döyüşləri bunu bir daha göstərdi. Aprel döyüşlərindən sonra ordumuzun maddi-texniki təminatı ilə bağlı əlavə tədbirlər görülür, vəsait ayrılıb, ən müasir, yüksək dağıdıcı qüvvəyə və dəqiqliyə malik olan silahlar, texnika alınır və artıq bizim sərəncamımızdadır".
Ölkə başçısı qeyd edib ki, ordunun döyüş qabiliyyəti ilə bərabər, vətənpərvərlik ruhu da yüksəkdir: "Biz öz torpağımızdayıq, bura Azərbaycandır. Lələtəpə də Azərbaycandır, Şuşa da Azərbaycandır, Xankəndi də Azərbaycandır. Bizim heç bir ölkənin torpağında gözümüz yoxdur. Ancaq biz öz torpağımızda ikinci erməni dövlətinin yaranmasına heç vaxt imkan verməyəcəyik. Aprel döyüşləri bunu bir daha sübut etdi".
"Ermənistan rəhbərliyi başqasının gücünə güvənməsin. Əgər istəyirlər ki, məsələ sülh yolu ilə həll olunsun və erməni xalqı itki verməsin, torpaqlarımızdan çəkilsinlər. Biz də müharibə istəmirik, ancaq biz torpaqlarımızı istəyirik", - deyə Ali Baş Komandan vurğulayıb.
Prezident bu bəyanatı ilə Ermənistana havadarlıq edənlərə hansı mesajları vermiş oldu?
Millət vəkili Hikmət Babaoğlunun sözlərinə görə, Azərbaycan Prezidentinin cəbhə bölgəsinə səfəri mühüm hadisədir: "Əlbəttə, ən önəmli hadisə Prezident İlham Əliyevin işğalçı dövlətin hərbi xunta rejiminə təmas xəttindən göndərdiyi mesajlar idi. Mən hadisə sözünü təsadüfən işlətmirəm. Bir şeyə xususi diqqət etmək lazımdır ki, Prezidentin səfəri ilə eyni vaxtda Ali Baş Komandanın əmrinə uyğun olaraq Azərbaycan ordusu 60 min nəfərlik şəxsi heyətin və ən müasir hərbi-texniki vasitələrin iştirakı ilə təmas xətti yaxınlığında hərbi təlimlər keçirir. Buna paralel olaraq bir neçə gün əvvəl bir qrup Ermənistan vətəndaşı Bakıya səfər edib və erməni hərbi-cinayətkar rejiminin dinc azərbaycanlılara qarşı törətdiyi vəhşilikləri etiraf edir və cinayətkarları ittiham edir. Eyni zamanda, Azərbaycan Prezidenti işğalçı dövləti xəbərdar edir ki, erməni silahlı qüvvələri aprel döyüşlərindən düzgün nəticə çıxarmasalar, gələcəkdə Lələtəpə əməliyyatı kimi bir çox uğurlu əməliyyatlar olacaq.
Prezident qeyd etdi ki, Ermənistan rəhbərliyi başqasının gücünə güvənməsin. Bax, bu mesaj da hesab edirəm ki, düzgün oxunmalıdır və nəyə işarə vurulduğu aydın dərk edilməlidir. Yəni Ali Baş Komandan vurğulayır ki, bu vaxta qədər çox ciddi dəstək aldığınız dövlət, yaxud dövlətlər artıq sizi müdafiə etməyəcək. Nəhayət, bunu başa düşün və işğal etdiyiniz Azərbaycan torpaqlarından çəkilin. Hesab edirəm ki, bu olduqca ciddi xəbərdarlıqdır və ermənilər bundan nə qədər tez nəticə çıxarsalar, bir o qədər yaxşı olar".
Məhəmmədəli QƏRİBLİ
