Natiq Həmidov: "Həmin tarixi faktların dərsliklərə salınması gənc nəslin daha da döyüşkən olmasına rəvac verər"
Xəbər verildiyi kimi, Prezident, Silahlı Qüvvələrin Ali Baş Komandanı İlham Əliyev Füzuli rayonu ərazisində ön xətdə yerləşən komanda-idarəetmə məntəqəsində əməliyyat şəraiti ilə tanış olub. Dövlət başçısı hərbçilərlə görüşüb və döyüşdə fərqlənmiş hərbi qulluqçular qarşısında çıxış edib.
Prezident aprel ayında baş verən hadisələrə toxunub: "Bu ilin aprel ayında Ermənistan dövlətimizə, xalqımıza qarşı növbəti silahlı təxribat törədib. Qəhrəman Azərbaycan ordusu - xalqımızın əsgər və zabitləri bu təxribata layiqli cavab verib. Uğurlu əks-hücum əməliyyatı keçirilərək düşmənə sarsıdıcı zərbələr vurulub və Azərbaycanın işğal altında olan torpaqlarının bir hissəsi azad edilib. Bu gün biz Lələtəpə ərazisindəyik. Hələ bir neçə ay bundan əvvəl bu ərazi işğal altında idi. Biz bu işğala son qoyduq. Füzuli, Cəbrayıl və Ağdərə rayonlarının ərazilərində işğal altında olan 2000 hektardan çox torpaq uğurlu əks-hücum əməliyyatı nəticəsində işğalçılardan azad edilib. Minlərlə hektar torpağa bu gün Azərbaycan Ordusu tam nəzarət edir. Onu da qeyd etməliyəm ki, əks-hücum əməliyyatımız əlverişsiz mövqelərdən başlayıb. Biz yüksəklikləri, təpələri işğalçılardan azad etmişik və böyük qəhrəmanlıq göstərmişik. Aprel döyüşləri hərbi dərsliklərə salınmalıdır. Azərbaycan Ordusu bu döyüşlərdə peşəkarlıq, qəhrəmanlıq, məharət göstərib. Biz şəhidlər verdik, Allah bütün şəhidlərimizə rəhmət eləsin. Yaralı əsgərlərimiz, zabitlərimiz olub. Mən hərbi hospitalda yaralı əsgər və zabitlərimizlə görüş zamanı onlarda ruh yüksəkliyi gördüm. Onların bir arzusu var idi - tezliklə sağalmaq və döyüş bölgələrinə qayıtmaq. Bu bir daha onu göstərir ki, Azərbaycan xalqı böyük xalqdır, Azərbaycan vətəndaşları vətənpərvər vətəndaşlardır. Bizim əsgərlərimiz, zabitlərimiz Vətən uğrunda, torpaq uğrunda ölümə getməyə hazırdırlar".
Prezidentin aprel döyüşlərinin hərbi dərsliklərə salınmasının zəruriliyi ilə bağlı səsləndirdiyi fikirləri necə dəyərləndirmək olar?
Ekspert Natiq Həmidov qəzetimizə açıqlamasında bildirdi ki, Prezident çox gözəl təklif irəli sürüb: "Bilirsiniz ki, müharibə aparan ölkələrdə hərbi-vətənpərvərlik hisslərinin artırılması, döyüş ruhunun yüksəldilməsinə böyük ehtiyac var. Bizim situasiyamızda isə bu daha da önəmlidir. Çünki ərazimizin əhəmiyyətli bir hissəsi işğal altındadır. Münaqişənin həllinin məqsədli şəkildə uzadılması həm də bu məqsədə xidmət edir ki, gələcək nəsillər bu faktı unutsun. Amma tarix, xüsusilə də aprel döyüşləri göstərdi ki, bizim gənclərimiz düşmənə qarşı daha amansızdır, torpaqların azad edilməsi üçün ölümün gözünə dik baxmağa qadirdir. Mən deyərdim ki, aprel döyüşləri zamanı göstərilən hərbi şücaət nümunəsi birinci Qarabağ müharibəsindən heç nə ilə geridə qalmadı. Aprel döyüşləri zamanı doğrudan da böyük qəhrəmanlıq nümunələri ortaya qoyulub. Onların unudulmaması, gənc nəslə öyrədilməsi lazımdır. Bu baxımdan Prezidentin təklifini dəstəkləyirəm. Həmin tarixi faktların dərsliklərə salınması gənc nəslin daha da döyüşkən olmasına rəvac verər".
Məhəmmədəli QƏRİBLİ
