Ramil Hüseynov: "Blinkenin bu planları fiaskoya uğrayacaq"
ABŞ Dövlət katibi Entoni Blinken Azərbaycan hökumətini haqsız yerə həbs edilənləri azad etməyə, vətəndaş cəmiyyətinə qarşı təzyiqləri dayandırmağa, ATƏT-ə daxil olarkən üzərinə götürdüyü öhdəlikləri yerinə yetirməyə çağırıb. Bu haqda onun adından yayılan bəyanatda deyilir.
Azərbaycan Xarici İşlər Nazirliyi Entoni Blinkenin bəyanatına cavab verib. XİN-in Mətbuat xidməti idarəsinin rəisi Ayxan Hacızadə bildirib ki, Blinkenin Azərbaycanda insan hüquq və azadlıqlarının qorunması ilə bağlı "mövcud vəziyyəti təhrif edən, Azərbaycanın məhkəmə-hüquq prosesinə müdaxilə məqsədli qərəzli bəyanatını" qətiyyətlə pisləyir və rədd edir.
Göründüyü kimi, Blinken iddia edir ki, guya Azərbaycanda siyasi məhbuslar var və onlar dərhal azadlığa buraxılmalıdır. Bu formada Azərbaycanın daxili işinə müdaxilə etməkdə, siyasi məhbus mövzusunun belə qabardılmasında Bayden administrasiyasının məqsədi nədir? Gethagetdə belə bir hay-küy qaldırmaqda Bayden administrasiyasının niyyəti nədir?
"Bunda məqsəd odur ki, Tramp administrasiyası dövründə də Vaşinqton-Bakı münasibətləri gərgin olsun"
Sözügedən məsələni "Bakı-Xəbər"ə şərh edən "Yeni Xətt" Siyasi Tədqiqatlar Mərkəzinin rəhbəri Ramil Hüseynov hesab edir ki, bunda Bayden administrasiyasının bir neçə məqsədi var: "Əvvəla, Bayden administrasiyasının 4 illik hakimiyyəti dövründə ölkəmizə münasibət ədalətli olmayıb. Dəfələrlə bu administrasiya Azərbaycanın daxili işlərinə müdaxilə edib. Dövlət Departamentinin rəsmiləri Azərbaycan hakimiyyətinin ünvanına dəfələrlə tənqidi fikirlər səsləndiriblər. Xüsusən də Azərbaycanın antiterror əməliyyatları çərçivəsində Qarabağda suverenliyini tam bərqərar etməsindən sonra qərəzli münasibət özünü daha çox göstərib. Yeri gəldi-gəlmədi, Azərbaycanı hədəf alan açıqlamalarla çıxış edirlər. Həmin o münasibətin nəticəsidir ki, administrasiya gedhagetdə Blinken belə qərəzli bəyanatla çıxış edib. Bunda məqsəd odur ki, Tramp administrasiyası dövründə də Vaşinqton-Bakı münasibətləri gərgin olsun. Əsas məqsəd bundan ibarətdir. Çünki qarşıdakı dörd ildə ABŞ-Azərbaycan münasibətlərinin gərgin olması həm də erməni lobbisinin maraqlarına cavab verib. Halbuki, erməni lobbisinin Demokratlar Partiyası ilə, xüsusən də Bayden administrasiyası ilə olan isti münasibətləri bizə yaxşı məlumdur. Blinkenin məqsədi həm də ondan ibarətdir ki, Birləşmiş Ştatlar bundan sonra Cənubi Qafqazda əsasən Ermənistanla əməkdaşlığa önəm versin. Çünki Gürcüstanda seçkilərin nəticələri Bayden administrasiyasını məyus edib. Ona görə də çalışırlar ki, Ermənistan üzərindən geosiyasi oyunları davam etdirsinlər. Ancaq hesab edirəm ki, bu planlar fiaskoya uğrayacaq. Çünki Tramp praqmatik mövqedən çıxış edərək, ABŞ-la Azərbaycan arasında əlaqələrin qurulmasına xüsusi önəm verəcək".
Vidadi ORDAHALLI
