Futbol əfsanəsi Lionel Messi və dünya ulduzları Luis Suares, Serxio Buskets və Xordi Albanın Azərbaycana səfərləri erməni cəmiyyətində şok effekti yaradıb. Ümumiyyətlə, dünya ulduzlarının ölkəmizə intensivləşən axınları indi Ermənistanda bir qorxu ilə izlənilir.
Hesab edilir ki, bu, Azərbaycanla bağlı dünya ictimiayyətində fikirlərin müsbət istiqmətdə formalaşmasına ciddi təsir edir. Azərbaycan belə hallardan istifadə edərək həqiqətləri beynəlxalq aləmin diqqətinə çatdıra bilir.
Qeyd edilənlər fonunda Messi və dostlarının Azərbaycana səfəri də Ermənistanda isterik reaksiya ilə müşayiət edilir. Şübhəsiz ki, səkkiz dəfə "Qızıl top" mükafatına layiq görülən Lionel Messinin və ulduz futbolçu komanda yoldaşları - Luis Suares, Serxio Buskets və Xordi Albanın ölkəmizə gəlişi beynəlxalq miqyasda xeyli sayda insanın diqqətini Azərbaycana yönəldir. Xatırladaq ki, Argentina millisinin və ABŞ-ın "İnter Mayami" klubunun futbolçusu Lionel Messinin dünyada böyük sayda fanatı var. Əfsanəvi futbolçu və dostları səfər çərçivəsində Qarabağ atlarını izləyiblər, Ulu Öndər Heydər Əliyevin məzarını ziyarət ediblər, Bakı Kristal Zalında fanatları ilə görüşüblər və son olaraq Heydər Əliyev Mərkəzində olublar. Qeyd edək ki, Bakı Kristal Zalında baş tutan tədbirə bilet satışından əldə olunan vəsait xeyriyyə məqsədinə yönəldiləcək. Bakı Kristal Zalında təşkil olunan tədbirin ən təsirli məqamlarından biri isə sağlamlıq imkanları məhdud uşaqlar, uşaq evlərinin sakinləri və şəhid ailələrindən olan uşaqların səhnəyə çıxması olub. Onlar dünya ulduzlarını görmək, avtoqraf almaq və birgə foto çəkdirmək şansı qazanıblar. Tamaşaçılar arasında böyük coşqu doğuran məqam isə dünya ulduzlarının zalda oturanlara avtoqraflı futbol toplarını hədiyyə etməsi olub. Tədbirdə futbol əfsanəsi ilk dəfədir Azərbaycanda olduğunu qeyd edib: "Bu cür isti qarşılanmaya görə Azərbaycana təşəkkür edirəm". Belə yanaşma qeyd edildiyi kimi Ermənistanda şok effekti yaradıb. Bunlar fonunda "armenianreport" portal yazır: "İstədiyiniz qədər Ermənistanın düşmənlərini günahlandıra bilərsiniz. Özlərinə dost deyənlərin xəyanətindən istədiyimiz qədər şikayət edə bilərik. Ancaq özünüzə dürüst qiymət verməyi bacarmalısınız. Bu, təəssüf ki, xalqımızın ən yaxşı tərəflərindən uzaqdır. Bir sıra konkret misallara baxaq ki, Azərbaycanın ilk baxışdan onun üçün pis getdiyi istiqamətdə necə fəal işləyir. Bəli, indi futboldan danışırıq. Bəs futbol dünyasında nə baş verir? Baş verənlər Ermənistan üçün birbaşa uğursuzluq hesab edilir. Xüsusilə son bir neçə ayda özünü büruzə verən hallar fonunda bunu görmək olar.
Hər şey braziliyalı Ronaldinyonun Bakıya gəlməsi ilə başladı. O, Azərbaycan mətbəxinin dadına baxıb, gənc azərbaycanlı futbolçularla görüşüb, COP29-a baş çəkib. Ronaldinyonun bu addımı Ermənistan üçün başa düşülməsə də, bağışlana bilər. Ancaq sonra tamamilə anlaşılmaz bir şey baş verib. İspaniyanın "Barselona" klubunun prezidenti Joan Laporta Bakıya gəlib. O, Fəxri xiyabanı ziyarət edib, burada Heydər Əliyevin xatirəsini ehtiramla yad edib.Laporta bunu etməklə Azərbaycana yüksək ehtiramını göstərib. O, həmçinin Bakıda "Zəfər parkı"na baş çəkib və orada ona Qarabağ münaqişəsinin səbəbləri və nəticələri barədə danışılıb. Artıq bunu bir növ pulla izah etmək mümkün deyil. Laporta çox zəngin adamdır. O zaman onun Ermənistanı sarsıdan bu olayda iştirakına ermənilərin cavabı yoxdur.
Amma daha şokedicisi Bakıya gələnlərin növbəti qrupunun davranışıdır. Zəmanəmizin ən yaxşı oyunçusu argentinalı Lionel Messi, uruqvaylı Luis Suares, ispanlar Serxio Buskets və Xordi Albanın Bakıya gəlişi ermənilər üçün mənfi haldır. Onların hamısı aktiv futbolçulardır. Onların hamısı böyük şəxsi sərvət sahibləridir. Bəs niyə Azərbaycan səyahət etməyə razılaşdılar?! Onların Bakıya gəlişinin özü də Ermənistan üçün böyük biabırçılıq idi. Bu və ya digər şəkildə etiraf etməliyik ki, Azərbaycan bu oyunda qalib gəlib. Necə olduğu bəlli deyil, amma o, dövrümüzün ən böyük futbolçusunu Bakıya gətirə bildi. Milli komandası yaxşı nəticə göstərməyən bir ölkənin ambisiyalarını təmin etmək üçün təkcə bu kifayətdir. Və burada portuqaliyalı Kriştiano Ronaldonu Ermənistana gətirmək üçün ermənilər tələsməlidirlər. Amma qəribədir ki, ölkəmizdə bu hələ edilməyib. Amma indi cavab verməkdən çəkinə bilməzsən. Ronaldonu mütləq İrəvana gətirmək lazımdır. İdman və şou-biznesin bütün ulduzları ilə işləmək lazımdır. Biz aydın şeyləri deyirik. Amma bu istiqamətdə heç bir zəruri hərəkət yoxdur. Və bu boşluğu aktiv olan Azərbaycan uğurla doldurur".
Nahid SALAYEV
