Azər Həsrət: "Bunların məqsədi Türkiyə və Azərbaycanı hədəfə almaq, hər iki dövlət barəsində gərəksiz müzakirələr açmaq və bu yolla da bir növ süfrəsinin qırıntıları ilə baş saxladıqları ermənilərə xoş gəlməkdir"
Suriyada hökumətin dəstəklədiyi Əsəd rejiminin devrilməsi Rusiya cəmiyyətini də sarsıdıb. Rusiya mediasında bununla bağlı isterik fikirlər səsləndirən ciddi siyasi personalar da var.
"Suriya Ərdoğan üçün tələ idi. O, strateji səhvə yol verdi. Rusiyaya xəyanət etdi".
Bu sözləri Rusiya prezidenti Vladimir Putinin ən yaxın adamı kimi tanınan siyasi xadim Aleksandr Duqin deyib:
"Türkiyə İrana xəyanət etdi və məhv oldu. İndi Kamalın Türkiyəsinin sonu başlayıb. İndiyə qədər sizə dəstək olmuşuq, bundan sonra peşman olacaqsınız. Əvvəllər etmədiyimiz işləri edəcəyik", - deyə Duqin Ərdoğanı hədələyib.
Qeyd edək ki, artıq Türkiyə Teleqram kanallarında Duqinin bu açıqlaması paylaşılır. Duqinin bu açıqlaması bəlkə də hakimiyyətin dilə gətirə bilmədiyi mövqeyi kimi də qəbul edilə bilər.
Doğrudanmı Türkiyə İrana və Rusiyaya xəyanət edib? Duqinin hədələrinin məzmunu nədən ibarət ola bilər, Rusiya Türkiyəyə nə edə bilər? Yoxsa bu, boğazdan yuxarı bəyanatdır?
Baki-xeber.com saytına açıqlamasında siyasi şərhçi Azər Həsrət bildirdi ki, Aleksandr Duqin Azərbaycan ictimaiyyətinə tanış adamdır, əvvəllər də onun səsləndirdiyi fikirlərə münasibət bildirilib: "Aleksandr Duqin birmənalı olaraq antitürk, anti-Azərbaycan, erməni dostu olan bir siyasətçıdır. Yəni onun mövqeyi həmişə belə olub. İndi isə, görünür qardaş Türkiyənin bu böyük uğuru onu necə silkələyibsə, ortalığı qarışdırmaq üçün belə bir fikir səsləndirib. Amma yenə həmişəki kimi olacaq - onun dedikləri nə bir işə yarayacaq, nə də münasibəti poza biləcək. Necə deyərlər, dəyirman öz işindədir, çax-çax baş ağrıdır. Duqinin sözlərinin əhəmiyyətini başqa bir atalar sözü ilə ifadə etsək: "İt hürər, karvan keçər...". Yəni bu fikrə o qədər də bənd olmağa dəyməz. Bunların məqsədi, əlbəttə, Türkiyə və Azərbaycanı hədəfə almaq, hər iki dövlət barəsində gərəksiz müzakirələr açmaq və bu yolla da bir növ süfrəsinin qırıntıları ilə baş saxladıqları ermənilərə xoş gəlməkdir. Ona görə də mən Duqinin fikirlərini ciddiyə almıram".
"Rusiyanın hazırda Türkiyəyə və Azərbaycana ciddi ehtiyacı var. Yəni Rusiya o qədər küncə sıxışdırılıb ki, hətta Azərbaycan kimi balaca bir ölkəyə böyük ehtiyacı var. Hələ mən Türkiyəni demirəm. Türkiyə NATO üzvüdür, Avropanın bir parçasıdır, Yaxın Şərqin isə lider dövlətidir. Təbiidir ki, belə bir dövlətlə indiki şəraitdə Rusiya münaqişə istəməz, istəmir də. Hətta istəsə belə, buna getməz. Belə olan halda Duqinin sərsəmləməsi özfəaliyyətdən başqa bir şey deyil.
Qeyd etdiyim kimi, yəqin ki, o, erməni süfrəsindən alacağı qırıntıların payını bir qədər artırmaq istəyir. Amma heç düşünmürəm ki, ermənilər onun bu sərsəmləməsinə ciddi yanaşsınlar.
Sözsüz ki, həm sosial şəbəkələrdə, həm də erməni mətbuatında kimlərsə bundan sağa-sola istifadə edəcək. Amma Ermənistan dövləti və hakimiyyəti səviyyəsində onun bu fikirləri heç bir işə yaramayacaq. Ona görə də Duqinin söylədikləri havaya atılmış güllə effektindən başqa bir şey deyil", - deyə ekspert qeyd etdi.
Dəniz NƏSİRLİ
