İbrahim Rüstəmli: "Bəşər Əsəd rejiminin cinayətlərinin genişlənməsində erməni hərbiçiləri ilə yanaşı erməni lobbisi də iştirak edib"
Ermənistanın Bəşər Əsəd rejimi ilə sıx və isti əlaqələrinin olması, Əsəd qüvvərinə hərbi dəstək verməsi danılmazdır. Məlum olduğu kimi, vətəndaş müharibəsi dövründə Ermənistan hərbiçiləri Siriyada, Hələb şəhərində dinc insanlara qarşı misilsiz cinayətlər ediblər.
Hələbdə, guya sülhyaratma və minalardantəmizləmə adı altında fəaliyyət göstərən Ermənistan hərbi qrupu, əslində Əsəd rejiminin əlavə hərbi dəstəkçisi rolunda çıxış edib və Suriyadakı demokratik qüvvələrə divan tutulmasında böyük canfəşanlıq edib. Suriyada erməni terror təşkilatları, onların Əsəd rejimi ilə sıx əlaqələri gizlin deyil. Nubar Ozanyan adına erməni batalyonunun cinayətləri cəzasız qalmamalıdır. Yeri gəlmişkən, bu hərbi qruplaşma 2019-cu ildə yaradılıb və Suriya xüsusi xidmət orqanları ilə yaxından əməkdaşlıq edib. Qeyd edək ki, Əsəd rejimi ilə hərbi sahədə əməkdaşlıq edən Ermənistan İran vasiyəsilə Suriyaya hərbi texnika göndərib. Bütün hallarda, Suriyada demokratik qüvvələrə divan tutulmasında Ermənistan heç də Bəşər Əsəddən az məsuliyyət daşımır, bu ölkənin də məsuliyyəti böyükdür.
"Erməni batalyonlarının Suriyada törətdiyi misilsiz cinayətlər cəzasız qalmayacaq, çünki hər cinayətin cəzası var"
Suriyada hərbçilərin insanlıq əleyhinə cinayətlərində Ermənistan hərbi batalyonunun məsuliyyəti necə qiymətləndirilə və cəzalandırıla bilər?
Hərbi ekspert İbrahim Rüstəmli "Bakı-Xəbər"ə şərhində bildirdi ki, Ermənistan Bəşər Əsəd rejiminə hərbi dəstək verməklə bir daha terrorçu, cinayətkar ölkə olduğunu təsdiqləyib. "Ermənistan sübut etdi ki, onlar Əsəd rejimi ilə bir "məfkurə uğrunda mübarizə" aparan dövlətdir. Suriyada demokratik qüvvələrə qarşı Əsəd rejiminə Ermənistanın hərbi kontingentinin dəstək verməsi, bu cinayətlərdə yaxından iştirak etməsi faktdır. Erməni batalyonu Suriyada da insanlıq əleyhinə cinayətlərdə "müstəsna xidmətlər göstərib".
Suriya həbsxanalarında işgəncələr görən, əzab çəkən insanlar bu gün artıq azad olurlar. Hafiz Əsəd rejimindən başlamış Bəşər Əsəd rejiminin süqutina qədər 30-40 il o insanlar həbsxanalarda qalıblar. Bəşər Əsəd rejimində siyasi məhbuslar davamlı olaraq ağır, amansız işgəncələrə məruz qalıblar. Onların ailələrinə belə rəhm etməyiblər, qadınlarına, uşaqlarına belə, zülm ediblər. Bunlar çox dəhşətlidir və insanlığa sığmayan cinayətlərdir. Biz bunları görürük. Bu insanlar 40 il günəş işığı görməyiblər. Bu o qədər dəhşətli haldır ki, sözlə demək çətindir. Bəşər Əsəd cinayətlərinin genişlənməsində erməni faktoru da böyük rol oynayıb. Bəşər Əsəd rejiminin cinayətlərinin genişlənməsində erməni hərbiçiləri ilə yanaşı erməni lobbisi də iştirak edib. Bəşər Əsədin şəxsi mühafizəsində ermənilər də yer almışdı, əsas yer tuturdular. Ermənilər Bəşər Əsəd repressiyasının əsas vintçikləri kimi yadda qalıb. Ermənistan hərbiçiləri Bəşər Əsədin cinayətlərinə dəstək verdiyi və Suriyada demokratik qüvvələrə qarşı amansız qətlimalar törətdiyi üçün qanun qarşısında cavab verməlidir. Erməni batalyonlarının Suriyada törətdiyi misilsiz cinayətlər cəzasız qalmayacaq, çünki hər cinayətin cəzası var".
İ.Rüstəmli məsələyə bir qədər mənəvi tərəfdən də yanaşdı. O hesab edir ki, dünyada insana ən böyük cəzanı Tanrı və həyat verir. "Onların hansı şəkildə cəzalandırılması məsələsinə gəlincə, hər böyük cəza həyatdan gəlir. Onlar hüquqi cəzadan hansı yollasa canlarını qurtara bilsələr də, mütləq həyat və Tanrı qarşısında cavab verəcəklər. Yəni insanı heç nə həyat qədər cəzalandırmır. Bir insanın başqa insana nə qədər böyük cəza verməsindən asılı olmayaraq ən böyük cəzanı həyat verir. Ən böyük cəzanı onlara həyat verəcək. Qisas qiyamətə qalmır, nə etmisənsə cəzasını alırsan".
Dünyada qaniçən, amansız qətllər törədən, terror həyata keçirən ermənilərin, onların liderlərinin çox pis şəkildə öldüyünü deyən İ.Rüstəmli hesab edir ki, Suriyada cinayət törədənlər də ağır cəzalarını alacaqlar, həyat onları sərt şəkildə cəzalandıracaq.
İ.Rüstəmli qeyd etdi ki, Bəşər Əsəd rejimi özü də Ermənistana həmişə ciddi dəstək göstərib: "Əlbəttə, Əsəd rejiminin ətrafında Ermənistanın hərbi kontingenti, "Böyük Ermənistan" mifoloji ideyasını dəstəkləyən erməni lobbisi, Azərbaycana qarşı əks mövqedə dayanan kifayət qədər insanlar vardı. Bu silahlı birləşmələrin Azərbaycanın vaxtilə işğal olunmuş əraziləri ilə bağlı mövqeyi də bizə məlumdur. Məhz bu ermənipərəst qüvvələrin təsiri altında Bəşər Əsədin sol tərəfində oturan müftisi belə Qarabağla, orada yaşamış ermənilərlə bağlı çox ağlasığmaz, Azərbaycan dövlətinə, onun ərazi bütövlüyünə, dövlətçiliyinə, xalqımızın mənafeyinə zidd olan mövqe nümayiş etdirmişdi ki, "erməni xalqı Qarabağda öz müstəqilliyinə qovuşmalıdır, orda erməni dövləti yaradılmalıdır". O, bu cür zərərli açıqlama vermişdi.
Onu qeyd etmək istəyirəm ki, Birinci Qarabağ müharibəsində Livandan və Suriyadan xeyli erməni vardı və onlar erməni silahlılarının tərkibində bizə qarşı döyüşürdülər. Bu qüvvələrin azərbaycanlılara qarşı münasibəti həddindən artıq sərt idi. Bu sərtlik ilk növbədə özünü azərbaycanlı əsirlərə münasibətdə göstərurdi. Xatırlayıram, hətta vəziyyət o qədər kritik hal almışdı ki, əsir düşən azərbaycanlıların Livandan, Suriyadan gələn erməni terrorçularının əlinə düşməməsi üçün bəzən ermənilər özləri də onları gizlədirdilər. Yəni azərbaycanlı əsirlərə yanaşmaları ümumiyyətlə insanlığa sığmayan bir hal idi. Hətta düşmənə qarşı bu cür münasibət göstərmək olmaz. Amma onlar əllərinə düşən azərbaycanlılara o qədər amansız, o qədər vəhşi münasibət göstərirdilər ki, bəzən ermənilər buna yol verilməməsinə çalışırdılar. Baxmayaraq ki, ermənilərin özləri də heç də onlardan geri qalmırlar. Onlar da vaxtilə insanlığa qarşı amansız cinayətlər ediblər"-deyə müsahibimiz bildirdi.
İradə SARIYEVA
