Ramil Məmmədli: "Ola bilsin, müvəqqəti olaraq hansısa zəmanət verilib"
Suriya müxalifəti Rusiya hərbi bazasının yerləşdiyi Tartusa nəzarət edir. Suriya silahlı müxalifəti Rusiya hərbi bazalarının yerləşdiyi Latakiya əyalətinə tam nəzarət edir. Məlumata görə, müxalifət Suriya prezidenti Bəşər Əsədin devrilməsini elan edən zaman silahlı dəstələr Tartus və Cebla ərazilərinə daxil olub.
Müxalifətçilər Tartus və Xmeymimdəki Rusiya bazalarına müdaxilə etməyiblər. Suriya müxalifətinin liderləri ölkə ərazisində yerləşən Rusiya hərbi bazalarının və diplomatik qurumlarının təhlükəsizliyinə zəmanət verib.
Bəzilərinin fikrincə, bu o deməkdir ki, Suriyanın indiki siyasi qüvvələri Rusiya hərbi bazalarının bundan sonra da qalacaqlarına təminat verib. Yəni təhlükəsizliyə təminat və bundan sonra da həmişəlik, yaxud da uzun müddət qalacaqlarına təminat, bütün bunlar fərqli şeylərdir. O baxımdan müxalifətin verdiyi bu təminatı Rusiya hərbi bazalarının orada uzun müddət qalacağına təminat hesab etmək olarmı?
"Düşünmürəm ki, müxalifət Rusiya hərbi bazalarının orada daimi qalmasını təmin etsin"
Sözügedən məsələni "Bakı-Xəbər"ə şərh edən hərbi ekspert Ramil Məmmədli bunu istisna etdi: "Düşünmürəm ki, mövcud müxalifət Rusiya hərbi bazalarının orada daimi qalmasını təmin etsin. Düzdür, Əsəd rejiminin 12 gün ərzində çökməsində bəzi qəribə məqamlar var. Onlardan biri də əsas müxalif qrup olan HTŞ-nin sürətlə Hələb və bir sıra şəhərləri ələ keçirərək Dəməşqə doğru irəliləməsində olan məqamlardır. Məsələ ondadır ki, HTŞ paytaxt Dəməşqdən əvvəl Suriyanın Aralıq dənizi sahillərinə yönəlmədi. Halbuki, Rusiyanın iki hərbi bazası məhz orada yerləşir. İlk günlərdə Rusiya hərbi aviasiyası müxalifətin irəliləməsinə mane olsa da, sonra bu, birdən-birə dayandı. Belə baxanda Rusiya Ukraynaya görə nə qədər zəifləsə də, müxalifətin irəliləməsini önləyə bilərdi, amma bunu etmədi. Üstəlik, HTŞ lideri Colani Rusiyanın ünvanına kəskin fikirlər səsləndirmədi. Halbuki, Rusiyanın yardımı hesabına Əsəd rejimi 2015-ci ildən təşəbbüsü ələ alaraq Suriyanın 60 faizinə nəzarəti bərpa edə bildi. Rusiya təyyarələri müxalifətə o zaman güclü zərbələr endirdilər. Bir sıra şəhərlərin viran qalması məhz Rusiyanın avia zərbələri ilə əlaqələndirilir. Bütün bunlardan sonra Suriyada hakimiyyəti ələ keçirən müxalifətin Tartusdakı rus bazaların qalmasına zəmanət verəcəyi real görünmür. Bu, həmin qüvvələr daxilində növbəti qarşıdırmaya gətirib çıxara bilər. Ola bilsin, müvəqqəti olaraq hansısa zəmanət verilib".
Vidadi ORDAHALLI
