Əli Orucov: "İrəvan "sülh" yalanları ilə beynəlxalq ictimaiyyəti hələ də aldatmaqda davam edir"
Ararat Mirzoyan Finlandiyanın "Lännen Media" xəbər agentliyinə müsahibəsində elə yana-yana danışır ki, guya COP29-a qədər sülh sazişinin imzalanmasını Azərbaycan tərəfi əngəlləyib. Halbuki, Ermənistan Azərbaycan tərəfinin təklif etdiyi sülh sazişi layihəsindən fundamental bəndləri çıxararaq təklif edirdi ki, gəlin bu maddələrsiz "sülh" sazişini imzalayaq.
"İnanıram ki, biz Bakıda keçiriləcək COP29 iqlim sammitinə qədər sazişi imzalaya bilərdik, amma indi biz bunu qısa müddətdə etməyə hazırıq. Ümid edirəm ki, biz buna çox yaxınıq. İki dövlətimizin və cəmiyyətimizin faciəli keçmişinə baxmayaraq, səhifəni çevirmək şansı var. Keçmiş çətin idi. Qəbul etmək, unutmaq, bağışlamaq çətindir, lakin bölgəmizdə kifayət qədər qan tökülüb və indi bizim gələcəyə baxmaq imkanımız var", – Ermənistanın xarici işlər naziri Ararat Mirzoyan Finlandiyanın "Lännen Media" xəbər agentliyinə müsahibəsində deyib.
Mirzoyan niyə əsas mətləb üstünə gəlmir ki, COP29-a qədər sülh sazişinin imzalanmasına maneəni kim törətdi?
Baki-xeber.com saytına açıqlamasında politoloq Əli Orucov bildirdi ki, Ermənistanın xarici siyasəti, Azərbaycanla aralarında münasibətlərin normallaşması istiqamətində sərgilədiyi mövqe manipulyasiyalar: "İrəvan "sülh" yalanları ilə beynəlxalq ictimaiyyəti hələ də aldatmaqda davam edir. 2020-ci il İkinci Qarabağ müharibəsindən 4 il ötməsinə baxmayaraq, iki ölkə arasında normallaşma ilə bağlı ciddi irəliləyişlərə nail olunmayıb. Ermənistan həmişə prosesi sabotaj edib.
İrəvan Qərbdəki bəzi dairələrin siyasi, hərbi və maliyyə dəstəyini alaraq mövqelərini gücləndirməkdədir. İrəvanın "sülh"lə bağlı yürütdüyü siyasət əslində qlobal münasibətlərin gedişinə bağlanılıb. Ancaq Suriyada Əsəd rejiminin devrilməsi, İranın hibrid və Rusiyanın birbaşa silahlı münaqişələrə cəlb edilməsi, düşdükləri uğursuzluqlar, Türkiyənin qlobal nüfuzunun artması, Azərbaycanın regional gücünün artması Ermənistanın manevr imkanlarını daraltmaqdadır. Erməni xarici işlər naziri A.Mirzoyanın müsahibəsində dedikləri isə həyasızlığın daha bir nümunəsidir. Erməni nazir deyir ki, guya COP29-dək sülh müqaviləsinin imzalanmasını Azərbaycan əngəlləyib. Halbuki, Ermənistanla sülh sazişinin imzalanmasında, bütövlükdə Cənubi Qafqazda dayanıqlı sülhün əldə olunmasında Bakı daha çox maraqlıdır. Bu həm də Azərbaycanın region üçün məsuliyyətindən doğur. Ermənistan Azərbaycanın xoşməramlı jestini qəbul etməyərək COP29 konfransında iştirakdan imtina etdi. Ağılasığmaz şərtlərlə bu fürsəti dəyərləndirmədilər. Sülh istəyən, təbii ki, hər imkanda, hər fürsətdən istifadə etməli, beynəlxalq platformalardakı təmaslardan qaçmamalıdır. Yaxud da sülhə əngəl olan Konstitusiyasında Azərbaycana qarşı ərazi iddialarından imtina edib əsas qanunlarından və digər qanunvericilik aktlarından həmin müddəanı çıxarardı.
Bölgədə qan tökən də, faciələrə səbəb olan da Ermənistanın təcavüzkar siyasəti olub. Ermənilər yüz minlərlə azərbaycanlının qanını axıdıb, bütöv bir milləti Azərbaycan türkü olduğuna görə soyqırıma, deportasiyaya və məcburi köçkünlüyə məruz qoyub.
Barış üçün, münasibətlərin normallaşması üçün ciddi baryerlər yaradıblar. İndi də sülh prosesini süründürürlər və Azərbaycanı suçlamağa çalışırlar. Hesab edirəm ki, artıq bu cür bleflər keçməz".
Dəniz NƏSİRLİ
