Şəmsəddin Əliyev: "Bunların separatçı canilər ətrafında monipulyasiya ilə məşğul olduğunu Beynəlxalq Ədalət Məhkəməsi də yaxşı bilir"
Ermənistan uydurma iddialarla beynəlxalq təşkilatları məşğul etməkdən əl çəkmək istəmir. Heç bir əsasları olmadan Beynəlxalq Ədalət Məhkəməsi və Avropa İnsan Haqları Məhkəməsinə belə üz tuturlar. Bakıda həbsdə olan separatçıların cinayətkar ünsürlərin azad olunması üçün çıxmadıqları oyun yoxdur, amma onların bu cəhdləri alınmır. Çünki cinayətkarın azadlığa buraxılması dünya üçün böyük təhlükədir.
Ermənistanın beynəlxalq hüquq məsələləri üzrə nümayəndəsi Yeqişe Kirakosyan jurnalistlərlə söhbətində bildirib ki, Beynəlxalq Ədalət Məhkəməsi və Avropa İnsan Haqları Məhkəməsi məhbusların qaytarılması məsələsinin onların yurisdiksiyasından kənarda olduğunu düşünür. "Məhkəmə müstəqil orqandır və beynəlxalq hüquqa əsaslanan qərarlar qəbul edir"-deyə bildirən Kirakosyan qeyd edib ki, məhbusların qaytarılması probleminin həlli guya siyasi müstəvidədir.
"Ermənistanın müraciətinə "yox" deməklə onların ümidlərini birdəfəlik kəsdi"
Məsələyə şərh verən tanınmış hüquqşünas Şəmsəddin Əliyev "Bakı-Xəbər"ə bildirdi ki, Ermənistan həmişə olduğu kimi manipulyasiya ilə məşğul olur. "Ermənistan separatçıların azad olması üçün çox cəhdlər edir. Amma onların atdıqları bütün addımlar iflasa uğrayır. Bunların separatçı canilər ətrafında manipulyasiya ilə məşğul olduğunu Beynəlxalq Ədalət Məhkəməsi də yaxşı bilir. Ermənistanın müraciətinə "yox" deməklə onların ümidlərini birdəfəlik kəsdi. Separatçıların əli Azərbaycan xalqının qanına batıb və belələri heç zaman bəraət ala bilməz. Heç zaman cinayətkar bəraət almamalıdır.
Tarixə nəzər salsaq görərik ki, İkinci Dünya müharibəsində faşistlərə qarşı Nürnberq prosesi həyata keçirildi və onlar bəşəriyyətin gözü qarşısında mühakimə olundular, hər biri layiqli cəzasını aldı. Bu, dünyada sosial ədalətin bərpa olunmasının canlı təzahürü idi. Bir nəfər belə cinayətinə görə kənarda qalmadı, cəzasını aldı. Bu, dünyaya görk olacaq bir hadisədir".
Ş.Əliyev qeyd etdi ki, həbsdə olanların əlləri Azərbaycan xalqının qanına batıb. Onlar dünya dövlətlərinin gözü qarşısında 30 il müddətində müharibə cinayətləri, soyqırım aktları, insanlıq əleyhinə tarixdə misli olmayan amansız qətllər törədiblər, bunlar xüsusilə ağır cinayətlərdir ki, bunu edənlər cəzalarını almalıdırlar. Azərbaycanın erməni canilərinin bu cinayətlərini dünyaya yaydığını deyən Ş.Əliyev təəssüflə bildirdi ki, nə Beynəlxalq Ədalət Məhkəməsi, nə Haaqa məhkəməsi Ermənistana qarşı addım atıb. O bildirdi ki, sözügedən məhkəmə instansiyaları Ermənistanın Azərbaycana qarşı bütün istiqamətlərdə həyata keçirdiyi cinayətlərə, ekosidə, kultsidə və sairə lazımı qiymət verməyib. "Bunlar etdikləri cinayətlərə cavab verməli olmalı olduqları halda, hələ də cəzalarına çatdırılmayıblar. Birinci Qarabağ müharibəsi dövründə xalqımıza qarşı cinayətlər törədənlər hələ də məsuliyyətə cəlb edilməyiblər. Cəzasızlıq mühiti onları və havadarlarını görün nələrə al atmağa aparır. Bunlar qondarma məlumatlarla beynəlxalq məhkəməyə müraciət edirlər, separatçı məhbusların azad olunmasını istəyirlər. Bizim ölkənin konstitusiyası dövlətin konstitusion quruluşu, vətəndaşların və insanların sağlamlıqları əleyihə törədilən xüsusilə ağır cinayətlərə görə ölüm hökmü tətbiq etmək imkanı verir. Söhbət konstitusiyanın 27-ci maddəsindən gedir. Azərbaycanda ölüm hökmü yoxdur, müvəqqəti olaraq moratorium qoyulub. Biz müharibə cinayətləri, hərbi cinayətlərlə bağlı ölkəmizdə ölüm hökmünü bərpa edə bilərik. Onlar da təsəvvür etsinlər ki, Azərbaycanda ölüm hökmü qüvvədədir və bunların əksəriyyəti yüksək cəza tədbirinə məruz qalacaqdı. Amma görürsüz, Azərbaycan Avropa Şurasına üzv olandan sonra üzərinə öhdəlik götürüb və biz o öhdəliklərə, həm də beynəlxalq hüququn prinsiplərinə çox hörmətlə, vicdanla yanaşırıq. Təki başqa dövlətlər də bizim kimi yanaşsınlar".
Ş.Əliyev qeyd etdi ki, Ermənistan COP29-da iştirak üçün Azərbaycana nümayəndə göndərməli idi. "Məqsədləri də burada həbsdə olanların müəyyən bir qismini buraxdırıb özlərilə aparmaq idi. Amma dərk etdilər ki, bu mümkün olası hal deyil. Separatçılar layiqli cəzalarını almalıdır. Ermənistan çox şeyə ümid edirdi, amma alınmadı. Bizim gözəl bir sözümüz var: haqq nazilər, amma üzülməz. Zaman gələcək, Azərbaycan xalqının qanına əlləri bulaşmış, bizə qarşı müharibə cinayətləri törətmiş bütün canilər öz layiqli cəzasını alacaq, beynəlxalq tribunallarda buna cavab verəcəklər. Biz o günü gözləyirik. Ona görə də heç kim düşünməsin ki, canlarını qurtara biləcəklər".
Ş.Əliyev vurğuladı ki, Ermənistan beynəlxalq hüquq müstəvisində də heç nəyə nail ola bilməyəcək, separatçılar lazımı şəkildə öz cəzalarını alacaqlar.
İradə SARIYEVA
