Gürcüstanın baş naziri İrakli Kobaxidze dekabrın 14-də ölkədə prezident seçkilərinin keçirilməsini təsdiqləyib. O deyib ki, prezident seçkilərinin keçirilməsi ilə bağlı qərar verilib və heç nə dəyişməyib: "Konstitusiya ilə səlahiyyət verilmiş bütün orqanlar seçkilərin keçirilməsi üçün səfərbər olunacaqlar".
Qeyd edək ki, hakim "Gürcü Arzusu-Demokratik Gürcüstan" Partiyasının prezidentliyə namizədi Mixail Kavelaşvilidir. İrakli Kobaxidzenin sözlərinə görə, hazırkı prezident Salome Zurabişvilinin parlament seçkilərinin nəticələrini tanımaması və yeni parlament seçkilərinə qədər öz səlahiyyətlərindən imtina etməyəcəyi barədə bəyanatının heç bir əsası yoxdur: "Zurabişvilinin səlahiyyət müddəti bitən kimi rezidensiyanı tərk edəcək". Amma Zurabişvili tamam fərqli mövqedədir. Gürcüstanda prezident seçkilərinə az qalmış Salome Zurabişvili ölkəsində baş verənləri dünya ictimaiyyətinə çatdırmaq üçün Fransaya gedib. Görünən odur ki, o, vəzifəsində qalmaq üçün Qərbin dəstəyini almağa ümid edir. Lakin hadisələr elə inkişaf edir ki, Qərb tərəfdaşları Zurabişviliyə hakimiyyət uğrunda mübarizədə kömək etməkdən daha çox, onu xilas etməyə daha çox diqqət etmək məcburiyyətində qalmalı olacaq. Çünki bir neçə günə Mixail Kavelaşvilinin prezident postunda Salome Zurabişvilini əvəz edəcəyi gözlənilir. Bundan sonra hakimiyyətin Salome Zurabişvili ilə haqq-hesab çəkəcəyi istisna edilmir. Bu səbəbdən də Zurabişvili indidən Qərbin dəstəyini alaraq, postunuu hələ uzun müddət qorumağa çalışır. Bu fonda "Gürcü Arzusu" hökuməti üçün gözlənilmədən Zurabişvili bərpa edilmiş Notr-Dam kilsəsinin açılış mərasimində iştirak etmək qərarına gəlib. Dünyanın 50-yə yaxın ölkəsinin liderləri də bu məqsədlə Fransada olub. Zurabişvili fürsətdən istifadə edərək ABŞ-ın yeni seçilmiş prezidenti Donald Tramp və Fransa prezidenti Emmanuel Makronla görüşüb. O bu xüsusda deyib: "Mən prezident Tramp və Makronla dərin müzakirə apardım. Söhbət oğurlanmış seçkilərdən və gürcü xalqına qarşı qorxulu repressiyalardan gedirdi. Mən güclü Amerika Birləşmiş Ştatlarının zəruriliyini vurğuladım. Gürcü xalqının Donald Tramp qismində bir dostu var. Allah Amerikanı qorusun". Eyni zamanda parlamentə daxil olan, lakin onun işində iştirak etməkdən imtina edən dörd müxalifət partiyası bildirib ki, "Gürcü arzusu" Trampla dialoq qura biləcəyinə inandıraraq həmvətənlərini yenidən aldadıb. Daha doğrusu, bunu hakimiyyətin əleyhdarlarını dəstəkləyən Zurabişvili tərəfindən edildiyi üzə çıxıb. Amma hakimiyyət diqqəti ona yönəldir ki, bu, Zurabişvilinin Gürcüstan prezidenti kimi sonuncu xarici səfəri idi. Göründüyü kimi, o, vəzifəsində qalmaq üçün dünya liderlərinin dəstəyini almağa ümid edir, amma çox güman ki, hər şey başqa cür olacaq. Zurabişvili istefa verməkdən imtina edərsə, "Gürcü Arzusu" onun barəsində cinayət işi açacaq və o, ya qaçmalı, ya da məhbus olacaq. Müvafiq olaraq, bu zaman Qərbin köməyi hakimiyyət uğrunda mübarizə üçün deyil, xilas üçün lazım olacaq.
Bu arada Avropa Komissiyası Gürcüstan hakimiyyətini "müəyyən kateqoriyadan olan şəxslər üçün" vizasız rejimin dayandırılması ilə hədələyib. Bunun qarşısını almaq üçün "Gürcü Arzusu" bir sıra tələbləri yerinə yetirməlidir: respublika vətəndaşlarının əsas hüquqlarının, o cümlədən söz, sərbəst toplaşma və şəxsi toxunulmazlıq azadlığının qorunmasını təmin etməli, ölkənin viza siyasətini Aİ siyasətinə uyğunlaşdırmaq və korrupsiya ilə mübarizə strategiyası, bəzi yeni qanun qəbul etməlidir. Söhbət ilk növbədə xarici agentlər və cinsi azlıqlarla mübarizəyə yönəlmiş qanunların ləğvindən gedir. Bundan əlavə, Brüssel, görünür, ofşor qanunu deyilən qanunu - Gürcüstanın Vergi Məcəlləsinə İvanişviliyə Qərb sanksiyalarından yayınmağa imkan verən düzəlişləri bəyənmir. Bununla belə, "Gürcü Arzusu" Aİ ilə münasibətləri bərpa etmək üçün güzəştə getmək niyyətində deyil. Əksinə, Kobaxidzenin dediyi kimi, dekabrın sonuna kimi hakimiyyət etirazçılara üzlərini gizlətməyi qadağan edən qanun qəbul edəcək: "Bu qayda bir çox Avropa İttifaqı ölkələrində tətbiq olunur və bu, Gürcüstanda zorakılığın qarşısının alınması üçün vacibdir". Bununla da müxalifət və Qərb razılaşmır. Beləliklə, Qərbin Gürcüstanla münasibətlərində daha gərgin mərhələ gözlənilir. Bu fonda gürcüstan daxilindəki müəyyən qüvvələrlə də bu ölkəyə təsir və təzyiq göstərməyə davam edəcək. Özü də bu fonda müxaliflərin getdikcə daha aqressiv metodlardan yararlanması diqqətdən yayınmır. Gürcüstanın daxili işlər nazirinin müavini Aleksandr Daraxvelidze bu xüsusda bildirib: "Etirazlarda zorakı qruplar "Molotov kokteylləri" adlanan pirotexniki vasitələrdən fəal şəkildə istifadə ediblər, onlar müxtəlif əşyalarla, o cümlədən dəmir və taxta dəyənəklərlə silahlanıblar". Onun sözlərinə görə, parlamentin binası yaxınlığında baş vermiş iğtişaşlar zamanı 60-a yaxın mağaza sındırılıb və soyulub. Gürcüstan Parlamentinin vitse-spikeri Nino Tsilosani də bildirib ki, Tiflisdə aksiyalar zamanı radikal müxalifət ekstremist hərəkətlərə əl atıb: "Ekstremizm odur ki, seçicilər sənin üçün səs verir, amma sən parlamentə daxil olmursan, seçkiləri udmursan, küçəyə çıxır və hamımızın gördüyü kimi alovlu müharibələr aparırsan. Ekstremizm odur ki, öz zərərli planlarında gəncləri və uşaqları qalxan kimi istifadə edirsən. Təəssüf, radikal və ekstremist müxalifətin vəziyyəti o yerə çatıb ki, onlar öz ölkələrinə qarşı çox zərərli üsullarla mübarizə aparırlar".
Samirə SƏFƏROVA
