Əli Orucov: "Ermənistan birbaşa təmaslara üstünlük verdiyini desə də, prosesə kənar qüvvələrin də cəlb olunmasına cəhd edir"
Rusiyanın Sənayeçilər və Sahibkarlar İttifaqının (RSPP) XXXIV qurultayında jurnalistlərdən biri RF baş nazirinin müavini Aleksey Overçuka Azərbaycanla Ermənistanın birbaşa təmaslarını əsas gətirərək, üçtərəfli işçi qrupun ləğv olunub-olunmayacağı ilə bağlı sual ünvanlayıb.
Overçuk isə cavabında bildirib ki, əvvəla, birbaşa təmasların olması çox yaxşı haldır: "Bu çox vacibdir. O ki qaldı baş nazir müavinlərinin üçtərəfli işçi qrupuna, o, Rusiya, Ermənistan və Azərbaycan dövlət başçılarının bəyanatı əsasında müəyyən edilib. Prinsip etibarı ilə hazırda o, “yatmış vəziyyətdədir”, bunu təsdiq etmək olar, lakin biz tərəfdaşlar arasında bu mövzuda təmasların qurulduğunu bilirik”, - deyə Overçuk bildirib.
Xatırladaq ki, 2021-ci ilin yanvar ayında Rusiya prezidenti Vladimir Putin, Ermənistan baş naziri Nikol Paşinyan və Azərbaycan prezidenti İlham Əliyev ölkələrin baş nazir müavinləri səviyyəsində birgə işçi qrupun yaradılması ilə bağlı razılığa gəlmişdi. İşçi qrupun yaradılmasında əsas məqsəd regionda nəqliyyat və iqtisadi əlaqələrin normallaşdırılması olub.
Məlum olduğu kimi, bu işçi qrupun cəmi bir neçə toplantısı olub. Hazırda həmin işçi qrup Minsk qrupu kimi iflic vəziyyətdədir.
Rusiya bu komissiyanın aktiləşdirilməsi ücün Ermənistana təzyiq göstərə bilərmi?
Baki-xeber.com-a məsələ ilə bağlı açıqlama verən pokitoloq Əli Orucov bildirdi ki, Ermənistan-Azərbaycan münasibətlərinin normallaşdırılması və əlaqələrin qurulması istiqamətdə ən yaxşı danışıqlar formatı ikitərəfli formatdır: "Üçüncü tərəfin iştirakı, əksinə, prosesləri əngəlləyir. Təcrübə də göstərdi ki, İrəvanla Bakı arasında birbaşa təmaslar daha uğurlu nəticələr verə bilir. Baş nazir Paşinyan və Prezident İlham Əliyev bəyanatlarında bundan sonrakı danışıqların da vasitəçisiz davam etdirilməsinin əhəmiyyətini vurğulayıblar. Lakin Ermənistan tərəfi, həmişə olduğu kimi, ikiüzlü siyasət yürüdür. Ermənistan birbaşa təmaslara üstünlük verdiyini desə də, prosesə kənar qüvvələrin də cəlb olunmasına cəhd edir. ATƏT qrupunun buraxılması barədə Azərbaycanın haqlı və əsaslandırılmış tələbini yerinə yetirməkdən yayınması da sübut edir ki, İrəvan ikili oyundadır. 2021-ci ildə nəqliyyat kommunikasiya xətlərinin açılması və digər problemlərin həlli ilə bağlı Rusiya-Azərbaycan-Ermənistan baş nazirlərinin müavinlar səviyyəsində "işçi qrup" yaradıldı. Lakin bir-iki görüşdən sonra həmin işçi qrup “yuxuya getdi”. Ermənistan və Rusiya proseslərin axınına həvəs göstərmədilər. Nəticədə Rusiyanın baş nazir müavininin dediyi kimi, işçi qrup yatmış vəziyyətə düşdü. Onu oyandırmaq, fəaliyyətini canlandırmaq İrəvanın və Moskvanın marağında deyil. Kremlin ənənəvi millətlərarası siyasəti var - parçala və hökm sür. Keçmiş sovet məkanında münaqişələrin və gərginliklərin qalması Moskvanın arbitraj rolunu artırmış olur.
Ermənistanla Azərbaycan arasında münasibətlər normallaşsa və mübahisəli məsələlər həllinin tapsa, Rusiyanın mövqeyi hər iki ölkə üzərində zəifləyər və istədiyini diqtə edə bilməz. Təbii ki, Rusiya əlindəki bu vasitələrdən məhrum olmasını istəməz. Məncə, kənar işçi qruplarına, vasitəçilərə və moderatorluğa ehtiyac duymadan Ermənistan və Azərbaycan özləri razılaşıb Qafqazda dayanıqlı sülhə nail olmalıdırlar. Azərbaycanın bu baxımdan mövqeyi aydın və netdir, qalır Ermənistan. İrəvan reallıqları dərk etməlidir və buna uyğun davranmalıdır".
Dəniz NƏSİRLİ
