Qlobal Bakı Forumu Trampa müraciət etdi - "təşəbbüsə qoşulun"...
Vüqar Bayramov: “Süni zəkanın inkişafı üçün inkişaf etmiş ölkələr tərəfindən daha ciddi nümayişə ehtiyac var”
“XII Qlobal Bakı Forumunda texnologiyaların etik şəkildə istifadəsi müzakirə olunan ən vacib məsələlərdəndir. Düşünürəm ki, yeni texnologiyalar, həmçinin süni zəka (AI) elmə və insanlara xidmət etməli, bəşəriyyətə yalnız fayda verməlidir".
Bu barədə Bolqarıstanın sabiq Prezidenti Rosen Plevneliyev XII Qlobal Bakı Forumunda “Yeni dünya üçün yeni texnologiyalar” mövzusunda panel iclasında çıxışında deyib. O bildirib ki, aparılan araşdırmaya əsasən, hazırda inkişaf etmiş ölkələrdə 62 faiz gənc süni zəkadan istifadə edir. Dünya şirkətlərinin 82 faizi süni zəkadan istifadə edəcəyini bəyan edib: 'Çox şadam ki, Avropa İttifaqı bu məsələləri düşünür. Silikon Vadisində bir sıra böyük şirkətlər bu məsələləri darıxdırıcı hesab edir. Lakin biz texnologiyalardan etik şəkildə istifadəsinin tərəfdarıyıq. Buradan ABŞ-ın Prezidentinə müraciət edib deyirəm ki, gəlin, Avropa İttifaqının bu təşəbbüsünə və fəaliyyətinə qoşulun, bu sahədə bütün dünya üçün ümumi qaydalar yaradaq ki, rahat yaşayaq”.
“Bəzi hallarda inkişaf etməkdə olan ölkələrin süni zəkadan istifadə ilə bağlı imkanları yüksək deyil, bu da onların maliyyə resurslarının azlığı ilə bağlıdır”
Mövzu ilə bağlı fikir bildirən millət vəkili Vüqar Bayramov “Bakı-Xəbər”ə şərhində bildirdi ki, süni intelektdən istifadə artıq qloballaşmaqdadır. Bu gün əksər ölkələr süni zəkadan istifadə edir: “Süni zəkadan istifadə diskriminasiya baxımından vacibdir. Mövcud standartlara və etik qaydalara uyğun olaraq süni zəkadan istifadəyə ehtiyac var. Xüsusən də inkişaf etməkdə olan ölkələr üçün məlum imkanın yaradılması və bu istiqamətdə işlərin sürətləndirilməsi çox vacibdir. Bəzi hallarda inkişaf etməkdə olan ölkələrin süni zəkadan istifadə ilə bağlı imkanları yüksək deyil, bu da onların maliyyə resurslarının azlığı ilə bağlıdır. Ona görə məlum təşəbbüsün qlobal səviyyədə dəstəklənməsinə ehtiyac var”.
Həmsöhbətimiz onu da əlavə etdi ki, süni zəkadan istifadə məşğulluğun təmini baxımından da vacibdir. Bu səbəbdən də standartların tətbiqi və ona uyğun olaraq işlərin həyata keçirilməsi vacibdir. Bütövlükdə texnologiyanın inkişafı baxımından işlər daha da aktivləşdirilməlidir. Süni zəkanın inkişafı üçün inkişaf etmiş ölkələr tərəfindən daha ciddi nümayişə ehtiyac var.
Günel CƏLİLOVA
