Kanada xarici işlər naziri Melani Colini sosial səhifədəki hesabında Aİ müşahidə missiyasının Cermukdakı ofisinə səfəri barədə yazıb: “Burada, Ermənistanda biz Aİ-nin müşahidə missiyasının ofisində olduq.
Kanadanın üçüncü tərəf kimi töhfəsi sayəsində Aİ-nin Ermənistandakı missiyası (EUMA) Ermənistan və Azərbaycan arasında sərhədə nəzarət edir. Cənubi Qafqazda sabitlik və təhlükəsizliyi təmin edir”.
Xarici işlər naziri Ermənistanda vətəndaş cəmiyyəti nümayəndələri ilə görüşdən fotonu da dərc edib və bunları qeyd edib: “Regionda davamlı sülh və təhlükəsizliyin təmin edilməsi, demokratiyanın gücləndirilməsi və Ermənistanın səsinin gücləndirilməsi görüşdə müzakirə olunan əsas prinsiplərdir”.
Kanadalı nazir nə özündən müştəbehlik edir? Bölgədə hansı sabitliyi və təhlükəsizliyi Aİ missiyası təmin edə bilər? Aİ missiyası Cənubi Qafqazda sabitlik və təhlükəsizliyin necə qarantı ola bilər? Olsa-olsa, ancaq Paşinyan hakimiyyətinin təhıükəsizliyini təmin edə bilər.
“Kanada bu qeyri-sağlam addımları ilə Fransanın maraqlarına oynayır və məqsəd gələcəkdə Ermənistanda hərbi baza qurmaqdır”
Sözügedən məsələni “Bakı-Xəbər”ə şərh edən siyasi ekspert Elşad Həsənov hesab edir ki, Kanada açıq şəkildə ermənipərəst mövqedən çıxış edir: “Antiterror tədbirlərindən, bizim ərazi bütövlüyümüz tam təmin olunandan, əli azərbaycanlıların qanına batmış şəxslər çıxıb gedəndən sonra anti-Azərbaycan ritorikası artıb. Avropa qurumlarında vaxtaşırı ölkəmizə yönəlik olmazın iftiralar atılır. Əfsuslar olsun ki, 44 günlük Vətən müharibəsi zamanı və ondan sonrakı dövrdə Kanada aşırı ermənipərəst mövqe sərgiləyir. Məsələlərin mahiyyətini bilmədən erməni lobbisinin çaldığı havaya oynayır. Kanada uzaq Amerkadan gələrək Aİ müşahidə missiyasında təmsil olunur. Halbuki, Kanada Avroittifaqın üzvü deyil. Bunlardan soruşan yoxdur orada nə işiniz var? Kanada xarici işlər naziri Melani Colinin Ermənistanın Azərbaycanla şərti sərhədində döyüş mövqeyinə gələrək binoklla Azərbaycanı müşahidə etməsi də onu göstərir ki, o, regionda gərginliyi tətikləyir. Əslində isə Colinin Azərbaycan ərazilərini müşahidə etməsi onun diplomatik davranış və normalardan nə qədər uzaq olduğunu göstərir. Hazırda Aİ missiyasının tərkibi 100 nəfərdir. Onların da 70 nəfəri fransızlardan, 30 nəfəri almanlardan ibarətdir. İndi bunların sayını 400 nəfərə çatdırmaq istəyirlər. Erməni lobbisinin maraqlarından çıxış edən Kanada missiyanın genişlənməsindən faydalanmaq istəyir. Əslində Aİ missiyasının əsas məqsədi müşahidəçi çətiri altında Rusiya və İrana qarşı iş aparmaqdır. Kanada bu qeyri-sağlam addımları ilə həm də Fransanın maraqlarına oynayır. Çünki Fransanın məqsədi gələcəkdə Ermənistanda hərbi baza qurmaqdır. Rusiyanı Cənubi Qafqazdan çıxarmaq bunların qarşısında duran əsas məsələdir. Buna da Ermənistan rəhbərliyi yaşıl işıq yandırıb. Həm də bu səbəbdən Kanada xarici işlər naziri Ermənistana gəlib qızışdırıcı bəyanat verir. Belə təxribatlar həm də sülh müqaviləsini əngəlləmək məqsədi daşıyır. Ancaq Paşinyan da artıq anlayır ki, tezliklə sülh sazişi imzalanmasa, bu onun hakimiyyətinə ciddi problem yaradacaq. Bu səbəbdən son vaxtlar sülh müqaviləsindən tez-tez danışır”.
Vidadi ORDAHALLI
