Fransanın Azərbaycana qarşı təxribat xarakterli bəyanatlarına yenisi əlavə edilib. Bu ölkənin mədəniyyat naziri Rima Əbdül Mələk Ermənistana səfəri zamanı Qarabağ bölgəsindəki tarixi və mədəni abidələrin təhlükə altına düşməsi ilə bağlı iddialar qaldırıb və onları qorumaq üçün müxtəlif mexanizmlərin yaradılmasına çağırış edib.
Qeyd edək ki, Fransanın başqa xalqlara məxsus tarixi və mədəniyyət sərvətlərini müsadirə etmiş ölkə olaraq belə iddialar qaldırmağa heç bir mənəvi haqqı yoxdur. Azərbaycan bugünə qədər, Fransa da daxil olmaqla, bir çox ölkələrin, dinlərin abidələrini qoruyub, saxlayıb, yenidən bərpa edib. Hazırda Azərbaycan Respublikasında 10-dan çox erməni kilsəsi və digər dinlərə mənsub müqəddəs məbədlər mövcuddur.
“Azərbaycandakı heç bir mədəniyyət abidəsi təhlükə altında olmayıb, başqa xalqların dini abidələrinə hörmətlə yanaşılıb”
Fransanın Azərbaycanı etnik-mədəni irsin məhv edilməsində ittiham etməsi barədə fikir bildirən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi icmalçı Faiq Ələkbərli “Bakı-Xəbər”ə bildirdi ki, Fransa Respublikasının mədəniyyət nazirinin belə bir açıqlama verməsi qətiyyən qəbuledilməzdi. Çünki Azərbaycan heç vaxt tarixi mədəniyyət abidələrinə zərər verməyib. Əksinə, bunu Ermənistan edib: “Azərbaycana qarşı belə iddia ilə Fransa, Ermənistan, İran çıxış edir. Azərbaycan tək İslam dəyərlərinə deyil, xristian, buddist və digər xalqların inanclarına hörmətlə yanaşıb. Bu səbəbdən də məlum fikir qəbulolunmazdır. Ümid edirəm ki, bu kimi açıqlamalara hökumət rəsmiləri müvafiq münasibət bildirməlidir”.
Həmsöhbətimiz xüsusi olaraq vurğuladı ki, Azərbaycandakı heç bir mədəniyyət abidəsi təhlükə altında olmayıb. Başqa xalqların dini abidələrinə hörmətlə yanaşılıb: “Hətta təhlükə altında olan, dağılmaq üzrə olan tarixi abidələr yenidən restavrasiya olunub. Bu səbəbdən də mədəniyyət naziri Rima Əbdül Mələkin açıqlaması həqiqəti özündə əks etdirmir. Yaxşı olar ki, Fransa bu kimi məsələrlə bağlı Ermənistana xəbərdarlıq etsin. Ümumiyyətlə, Fransa Azərbaycana qarşı qərəzli mövqeyindən əl çəkməlidir. Fransa tərəfi Azərbaycanın daxili işlərinə qarışmamalı və bu cür təxribat xarakterli bəyanatlara son qoymalıdır”.
Günel CƏLİLOVA
