ABŞ-dan sonra Fransa da hərbçilərini təlim adı ilə Ermənistana göndərməyə qərar verdi. Fransa müdafiə naziri Sebastyan Lekornu çıxışı zamanı deyib: “Fransa hərbçiləri Ermənistana göndəriləcək”.
O bildirib ki, erməni hərbçilərinə təlim keçmək üçün bu ilin sonu - 2024-cü ilin əvvəlində Fransa əsgərləri Ermənistana yola salınacaq. Yerləşdirilən hərbçilərin sayı isə açıqlanmır.
Fransanın bütün addımları göstərir ki, o, Ermənistanda hərbi baza yaratmaq istəyir. Bu addım reallaşarsa, Azərbaycanın buna reaksiyası necə olmalıdır?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki,
Fransa, ABŞ və ya qeyrisi Ermənistanda hərbi baza yerləşdirməyə cəhd etsə, Rusiya buna kəskin şəkildə reaksiya verəcək:
“Fransa və ya ABŞ-ın real olaraq Ermənistanda hərbi baxımdan kök salmasına gediləcəyi təqdirdə isə Moskva birmənalı olaraq Paşinyanı devirəcək. Bölgəmizdə mövqe savaşı gedir. ABŞ, Fransa, Rusiya və İran hər biri Cənubi Qafqazda öz mövqelərini gücləndirməyə çalışır. Bu mənada, Cənubi Qafqaz xalqlarının gələcək taleyi onlar üçün əhəmiyyət kəsb etmir. Fransa bir sıra keçmiş müstəmləkələrindən qovulur. Paris bu fonda çalışırdı ki, Afrikadan çıxarmağa məcbur olduğu qüvvələrin bir hissəsini Cənubi Qafqazda yerləşdirsin. Bu isə Rusiyaya qarşı sərhədlərin daralması demək olacaqdı. Belə olsaydı, Rusiya birmənalı şəkildə Paşinyan Ermənistanına qarşı ciddi təpki göstərəcəkdi”.
Ekspertin sözlərinə görə, son günlər Fransa Ermənistanın təhlükəsizliyində rolunu artırmaq istiqamətində aktiv addımlar atır: “Qatı anti-Rusiya siyasi xətti götürən rəsmi İrəvan nəinki Kollektiv Təhlükəsizlik Müqaviləsi Təşkilatından (KTMT) çıxmaq, hətta Ermənistandakı Rusiya hərbi bazasından yaxa qurtarmağa çalışır. Ehtimallara görə, rusların fransızlarla əvəzlənməsi planı qətiləşə bilər. Bu baxımdan, “mülki təhlükəsizlik” təlimləri üçün Fransadan gələn hərbi heyətin Ermənistana yerləşdiriləcəyi istisna edilmir. Görünən odur ki, Rusiyaya bağlı KTMT təlimlərindən nümayişkaranə şəkildə imtina edən Ermənistan artıq seçimini edib - KTMT, MDB, Avrasiya İqtisadi İttifaqı (Aİİ) kimi təşkilatlarla əməkdaşlığı minimuma endirmək. Bu qurumların da Rusiyanın himayəsi ilə qurulduğu hər kəsə bəllidir. Özünü Fransa lideri kimi yox, daha çox erməni diasporunun oyuncağı kimi aparan Makronun hədəfi bəllidir - Cənubi Qafqaza girmək üçün Ermənistan və Azərbaycan arasındakı münasibətləri gərginləşdirmək. Cənubi Qafqazı yenidən qarışdırmaq Fransanın əsas prioritetidir. Lakin Fransa Afrikada olduğu kimi, bu dəfə də yanılır. Nə Fransanın, nə də ona dəstək verən Almaniyanın bölgəyə aidiyyəti var, onların burada möhkəmlənməsi perspektivsiz məsələdir. Məğlub Ermənistanı silahlandırıb növbəti müharibəyə sövq etmək cəhdi nəticəsiz başa çatacaq. Təbiidir ki, Azərbaycan da bunu birmənalı qarşılamayacaq və nəticədə Ermənistanla gözlənilən sülh sazişi imzalanmayacaq”.
Məhəmmədəli QƏRİBLİ
