Məlum olduğu kimi, Ermənistan və Fransa müdafiə nazirləri görüşüb. Görüş Ermənistan müdafiə naziri Suren Papikyanın Parisə işgüzar səfəri çərçivəsində baş tutub.
Papikyan fransız həmkarı Sebastyan Lekornyu ilə regional təhlükəsizlik məsələlərini və sentyabrda əldə olunmuş birgə razılaşmaların həyata keçirilməsini müzakirə edib. Görüşün sonunda müdafiə naziri Suren Papikyan Fransaya zəngin işgüzar səfərə və səmimi qəbula görə Fransa Silahlı Qüvvələrinin naziri Sebastyan Lekornuya təşəkkür edib.
O da məlumdur ki, Ermənistanla Fransa nə qədər bir-birinə yaxın olsalar da, əks hərbi bloklarda təmsil olunurlar. Fransa NATO-nun, Ermənistan isə KTMT-nin üzvüdür. Üstəlik, Ukraynada Qərb-Rusiya qarşıdurması fonunda, bu iki ölkənin müdafiə nazirlərinin əməkdaşlığı dərinləşdirməsi Kremlin maraqlarına qarşı olan bir addımdır. Qəribədir ki, bütün bunları Rusiya sakit formada izləyir.
Maraqlıdır, Rusiya bu fakta nə əcəb soyuqqanlı yanaşdı? Cənubi Qafqazda təhlükəsizlik məsələsinin Fransaya nə dəxli var?
“Hər məsələyə münasibət bildirən Mariya Zaxarova, nədənsə, Papikyanın Paris səfərinə bir kəlmə münasibət bildirmədi”
Sözügedən məsələni “Bakı-Xəbər”ə şərh edən “Yeni Xətt” Müstəqil Siyasi Tədqiqatlar Mərkəzinin rəhbəri Ramil Hüseynov hesab edir ki, Rusiyanın bütün bunları sakit izləməsi anlaşılan deyil: “Ən azından ona görə ki, Ermənistanla Fransanın hərbi əməkdaşlığı genişləndirməsi KTMT nizamnaməsinə ziddir. Bununla bağlı hərbi blokda məhdudiyyət var. Digər tərəfdən, Ukrayna müharibəsi ilə əlaqədar Fransa-Rusiya münasibətləri psləşib. Müharibənin ilk dövrlərində Fransa bir qədər tərəfsiz mövqedən çıxış edirdisə, sonra Rusiyaya qarşı mövqeyini sərtləşdirdi. Xüsusən də Fransanın Ukraynanın silahlanmasında birbaşa iştirak etməsi Kremldə ciddi narazılığa səbəb oldu. Halbuki, Rusiya rəsmiləri bunu gözləmirdilər. Yəni ən azından, Fransanın Ukraynaya silah verəcəyini güman etmirdilər. Ancaq bu, belə olmadı. Başqa bir tərəfdən, bilavasitə Fransanın təşəbbüsü və birbaşa dəstəyi ilə Avropa İttifaqı KTMT üzvü olan Ermənistan sərhədinə müşahidə missiyasını göndərdi. Aydın məsələdir ki, bütün bunlar Rusiyanın Ermənistandan sıxışdırılıb çıxarılmasına hesablanmış bir addımdır. Həm Ermənistanda anti-Rusiya ovqatın xeyli güclənməsi, həm də Ukrayna müharibəsinin uzanması Kremlin mövqelərini zəiflədir. Belədə hər məsələyə münasibət bildirən Mariya Zaxarova, nədənsə, Papikyanın Paris səfərinə bir kəlmə münasibət bildirmədi. 10 noyabr 2020-ci il razılaşmasının müəllifi Rusiya olduğu halda, bölgədə Türkiyə mövcud olduğu halda Kremldə soruşan yoxdur ki, Fransanın regionda nə işi var. Rusiya nə İranın, nə də Fransanın sülhlə bağlı pozuculuq fəaliyyətinə qarşı sərt mövqe ortaya qoyur. Kremlin məqsədi odur ki, regionda hakimi-mütləq olsun, amma bu da mümkün olan iş deyil”.
Vidadi ORDAHALLI
