Sabiq millət vəkili, ən səmimi Heydər Əliyevçilərin biri kimi tanıdığım, əslən Qərbi Azərbaycanımızdan (bunu xüsusi qeyd etməyimin səbəbini az sonra biləcəksiniz) olan Musa Musayevin bu gün səhərki statusunu oxuyandan sonra bunları yazmağı qərara aldım. Dostum Musa müəllimlə 1991-ci ilin hadisələrinə söykənən münasibətlərimiz olduğu üçün hər şeyi ictimailəşdirmədən, öz aramızda da müzakirə edə bilərdik. Lakin mövzu hər bir Azərbaycan vətəndaşına və dünya azərbaycanlılarına aid olduğu üçün onun ictimailəşdirilməsini ümumi marağımıza uyğun bildim....
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Musa müəllim Qərbi Azərbaycan İcmasının tədbirlərində öz ifadəsi ilə desəm "Qərbi azərbaycanlılara heç bir aidiyyatı, bağlılığı olmayan insanları" görməkdən narahat olduğunu yazır və məntiqi olaraq onların bu sıralarda olmasını düzgün saymır...
Bəzi dostlarımız yanlış olaraq belə qənaətə gəlir ki, Musa müəllimi qeyzləndirən mətləb guya "qeyri-Qərbi azərbaycanlı şəxslərin" bu sıralarda görünməsidir, yəni belə bir yanlış qənaət var ki, Musa Musayev əslən Qərbi Azərbaycandan olmayan şəxslərin bu icmada təmsil olunmasını düzgün saymır. Əgər həqiqətən belə desəydi, onun fikirlərinə qarşı ən aqressiv barışmazlığı özüm nümayiş etdirər, deyərdim ki, yanlış yoldasan, Qərbi Azərbaycan təkcə Qərbi azərbaycanlıların yox, bütün azərbaycanlıların problemidir, şəkili, bakılı, təbrizli, gəncəli, fərq etməz, biz qürur duymalıyıq ki, tarixi torpaqlarımız olan Qərbi Azərbaycan uğrunda mübarizəyə hətta əslən Qərbi Azərbaycan mahallarından olmayanlar da qoşulublar, zatən bu təkcə Qərbi Azərbaycandan çıxmış insanların icması anlamını vermir ki... əksinə, Azərbaycanın hər yerindən olanların Qərbi Azərbaycan uğrunda mübarizə icmasıdır, indi hamımız Qərbi azərbaycanlıyıq və olmalıyıq, yalnız bu halda Qərbi Azərbaycanla bağlı böyük mübarizəmizin böyük hədəfinə qovuşa bilərik.
Mən Musa müəllimin statusunu təkrar-təkrar oxudum. Qənaətim bundan ibarətdir ki, Musa dostum belə düşüncədən uzaqdır ki, kökən etibarilə Qərbi Azərbaycandan olmayanlar bu icmanın tədbirlərində görünə, təmsil oluna bilməzlər. Musa müəllim belə demir. Dostumun məntiqi və yanaşması Azərbaycanın ictimai-siyasi fəaliyyət arenasının az qala əbədi sızlar yarasına çevrilmiş bir məlum dərdə, problemə söykənir. O problemə ki, bir sıra dinsiz, imansız, əqidəsiz, vətənsiz insanların təminatlı yaşam və özünütəsdiq üsuluna çevrilib. Bu yolda pul-para, yaxşı yaşayış, saxta da olsa "hörmət-ehtiram" qazanır, özü kimilərin çevrəsində "beş kişinin birinə" çevrilir, vicdandan və şərəfdən başqa hər şeyin dalınca yorulmadan yürüyür. Siyasətdə mənfəətpərəstlər, qoşulmaq üçün ən perspektivli mənfəət qruplarının axtarışında olanlar, milli-siyasi dəyərləri öz şəxsi mənafelərinin əyninə ən dəbli paltar kimi geyindirənlər, bu paltarın cırılıb süzülməməsi naminə nəinki Qərbi azərbaycanlı, hətta azərbaycanlı olduğunu yeri gələndə danmağa hazır olanlar, 90-cı illərin əvvəllərində Heydər Əliyevin öz böyük mübarizə hərəkatında hər cür sağlam dəstəyə ehtiyac duyduğu vaxtlarda sakit şəkildə "suyun şırıltısına" qulaq verərək kimin kimi məğlub edəcəyini gözləyənlər, milli vicdanın səsini yox, qarnının qırıltısını daha yaxşı eşidənlər... daha kimlər, kimlər… Musa müəllimin qeyzləndiyi sıralarda kimləri bu kateqoriyada gördüyünü bilmirəm, zatən bu sarıdan mənim özümün də düz 90-cı illərdən başlayaraq Heydər Əliyevin adı və özü ətrafında cərəyan edənlərdən az-çox xəbəri olan şəxs kimi bildiklərim, tanıdıqlarım var. Belələri Musa müəllimdən fərqli olaraq mənim yadıma təkcə Qərbi azərbaycanlıların tədbirlərinə baxanda düşmür, elə naxçıvanlıların, bakılıların, Şamaxı və qaxlıların, adını çəkmədiyim bütün bölgələrimizdən olanların hərəkətlərinə baxanda da onlar yadıma düşür. Vicdanın, qeyrətin, milli təəssübkeşliyin tək vətəni insanların ürəyi və təfəkkürüdür. Bunlar başqa heç harada, olmur. Vicdansızlığın, milli təəssübsüzlüyün, mənfəətpərəstliyin də beşiyi nə bölgələrdir, nə də toplumlardır, yenə də tək-tək insanların başı, ürəyi və düşüncəsidir... Bunlar da başqa heç harda olmur...
Ancaq dostum Musa müəllimin bilməsini çox vacib saydığım bir nüans var. Böyük Qərbi Azərbaycan hərəkatımızın uğur qazanması onun bütövlüyünü qoruya bilməyimizdən asılı olacaq. Bu hərəkatda hər cür adamlar olacaq, əqidəli, ideologiya daşıyıcıları ilə bərabər siyasi "vezdexodlar", rəng dəyişənlər, haqlının yox, həmişə qaliblərin yanında özünə yer axtaranlar, bunu böyük məharətlə icra edənlər olacaq. Bizim işimiz onları saf-çürük, çıxdaş etmək yox, saysız fərqlilikləri bir bayraq altına yığmaqdır. Bu bayrağın altına vicdanlı, namuslu, sadiq, vətənpərvər bakılını, şəkilini, naxçıvanlını və s. toplamağı bacarmalıyıq. Onu əqidəsizlərdən, şəxsi mənafe düşkünlərindən, çətinə düşəndə başını kirpi kimi gizlədənlərdən, satqınlardan qorumağın da öz üsulu var. Azərbaycanın bütün bölgələrini bu bayrağın altına nə qədər sıx toplaya bilsək, Musa müəllimi öz murdar xislətləri ilə qeyzləndirənləri bir o qədər rahat və ziyansız şəkildə zərərsizləşdirmək olar. Başa düşürəm ki, "onlar" çox haqları yeyiblər, hələ yeyəcəklər də... Musa dostumun dediyi kimi, Heydər Əliyevin "yaş senzi aksiyalarından kənarda" gizlənərək sonradan onun yanında, bu gün isə Qərbi Azərbaycan hərəkatının ön vitrinində peyda olanlar hətta İrəvana qədər gedib çıxa biləcəklər, üstəlik Musa kimiləri "yandırıb-yaxmağa" çalışacaqlar da...
Dözməliyik... Vətən, xalq, el-oba sevgisini daşımaq asan iş deyil ki... Asan olsaydı, hər şeyi ala bilənlər onu da alardılar...
Dostum Musaya sayqılarla...
Tahir TAĞIYEV
