Bu gün qanunsuz olaraq Xankəndidə lövbər salan avantürist, cani, separatçı tör-töküntülərinin keçmiş “dövlət naziri” Ruben Vardanyan öz təxribatçı əməllərini davam etdirir. Çoxdan casus, cani ayaması qazanan Rubenin Xankəndidə qarışıqlıq yaratmaq üçün saxlandığı aşkardır.
Qarabağ ermənilərin reinteqrasiyasının aktual olduğu və erməni vətəndaşlarımızın buna meyl etdiyi bir vaxtda Vardanyanın sirk meymunu kimi ortamı qarışdırmaq niyyəti ortadadır.
Özünü separatçıların "para babası" kimi qələmə verməyə çalışan Vardanyan bütün vasitələrlə çalışır ki, ermənilərin reinteqrasiyasının qarşısını alsın.
Vardanyan hissə o qədər qapılıb ki, ağzına və ağlına gələni sərsəmləyib.
O, hansısa qondarma “Artsax Təhlükəsizlik və İnkişaf Cəbhəsi İctimai Hərəkatı" adından "Azərbaycan Artsaxı indiki kimi deyil, tərəf kimi qəbul edərsə, Artsax prezidentinin təslim olmasını və bütün dövlət strukturlarının ləğv edilməsini tələb edərək Azərbaycanla danışıqlara hazırıq.
Belə şəraitdə danışıq apara bilməzsən, çünki bu, itaət etmək deməkdir"-"bəyanat verib".
Bu barədə Panorama.am məlumat yayıb. Təbii ki, Vardanyanın iddiası quru sərsəmləmədən və cəfəngiyatdan başqa bir şey deyil.
Hətta Vardanyan 9 noyabr tarixinə də dil uzadıb, öz aləmində onu 9 mayla müqayisə edib. "9 noyabr və 9 may bizim və Azərbaycan üçün bir-birinə zidd mənaları olan iki fərqli gündür...Təsəvvür edirsinizmi, biz 9 noyabrı Azərbaycanın bir parçası olaraq necə qeyd edəcəyik?”-deyib Vardanyan.
Vardanyanın bu kimi cəfəng iddialar səsləndirməsi Xankəndi ermənilərinin reinteqrasiyasına mane ola bilməyəcək. O bizim torpaqda qanunsuz yaşayan bir canidir və vaxtı çatanda digər separatçı " liderlər" kimi o da cəzasını alacaq. Hələ ki, ağalarının himayəsi altında yaşayan Vardanyan özünü sərbəst hiss edir.
Bu adamın bu qızışdırıcı və reinteqrasiya prosesinə zərbə vuran davranışlarına necə son qoyula bilər?
"Hesab edirəm ki, Vardanyanın bu təxribatları tamamilə təsirsizdir və reinteqrasiya prosesinə mane ola bilməz"
Politoloq Tural İsmayılov "Bakı-Xəbər"ə şərhində bildirdi ki, R.Vardanyan orada Rusiyanın maşası kimi qalıb və təxribatları da bu ölkənin maraqlarını təmin etmək üçün edir. "Nəzərə almaq lazımdır ki, Azərbaycan Ruben Vardanyanın Xankəndidən qovulması (rədd edilməsi ) prosesində istədiyinə nail olub. Təbii ki, ölkəmizin diplomatik gedişləri nəticəsində Vardanyan ordan qovulub, amma Rusiyanın Vardanyandan istifadə etmək niyyətləri heç zaman səngimir. Məhz o, Rusiyanın himayədarlığı ilə orada lövbər salıb. Rusiya bu təxribatçı quldurdan istifadə edərək bölgədə gərginlik yaratmaq və vəziyyəti daha da qızışdırmağa çalışır. Əlbəttə ki, bütün bunlar özəlliklə son zamanlar Azərbaycanın mövqeyinin yüksəlməsinə görə baş verir. Ruben Vardanyandan həm Qaradağda Paşinyana yaxın olan separatçılara təzyiq vasitəsi, həm də Azərbaycan-Ermənistan münasibətlərini provokasiya etmək üçün istifadə olunur. Eyni zamanda Rusiyanın Vardanyanla bağlı digər məqsədi ondan Paşinyana qarşı yeni bir qüvvə kimi istifadə etməkdir. Onunla bağlı bütün xain planlar ifşa olunur və Azərbaycan onu layiq olduğu yerdə otuzdurub. Bu adam etdiyi cinayətlərə görə də Ukrayna tərəfindən beynəlxalq axtarışa verilib.
Bu baxımdan hesab edirəm ki, Vardanyanın bu təxribatları tamamilə təsirsizdir və reinteqrasiya prosesinə mane ola bilməz. Bu proses birbaşa Azərbaycan dövlətinin diqqətindədir və bu istiqamətdə işlər görülür, cücərtilər də var"-deyə T.İsmayılov qeyd etdi.
T.İsmayılov əlavə etdi ki, Vardanyan kimilərinin cəhdlərinə baxmayaraq, Azərbaycan dövləti erməni vətəndaşlarımızın reinteqrasiyası yönündə bütün hədəflərinə nail olacaq.
İradə SARIYEVA
