Məlum olduğu kimi, erməni təxribatı üzündən Laçın sərhəd-keçid məntəqəsindən avtomobillərin keçidi dayandırılıb. Baş verənlərlə bağlı hərtərəfli təhqiqat aparılmayınca, Ermənistan təxribata görə bütün məsuliyyəti öz üzərinə götürməyənə qədər məntəqənin işləməyəcəyi də qarşı tərəfin diqqətinə çatdırılıb. Buna paralel olaraq Azərbaycan bəyan edir ki, Qarabağda qalan ermənilərin ehtiyaclarını ödəməyə də hazırdır.
Hələlik bu xüsusda erməni tərəfinin mövqeyi bəlli deyil. Amma Ermənistanın “İravunk” nəşri yazır ki, hazırda Qarabağın rus sülhməramlıların müvəqqəti məsuliyyət zonasında olan erməni əhalisinin ərzaq ehtiyatları kifayət qədərdir, acından heç kəs ölməyəcək. Bildirilib ki, Azərbaycan rus sülhməramlılara təklif də verib: “Azərbaycan rus sülhməramlılara təklif verib ki, ehtiyac varsa, Ağdamdan ürəkləri istəyən qədər ərzaq ala bilərlər”. Nəşrin məlumatına görə, Bakının bu təklifinə yaxın zamanda müsbət cavab verilmə ehtimalı böyükdür. Bu arada separatçıların qondarma “dövlət naziri” Qurgen Nersisyan mağazalarda yeni rejimin tətbiq edildiyini bildirib. Belə ki, bir alıcı bir maldan çox sayda ala bilməyəcək: “Bunu təşvişə səbəb olmaq üçün demirəm. Lakin balanslı yanaşıb, istehlakda ehtiyatlı davranmalıyıq. Bundan sonra fərdi avtomobillərin yanacaqla təmin edilməsi prosesi dayandırılır, xidməti avtomobillərin yanacaqdan istifadəsi də ya dayandırılacaq, ya da minimuma endiriləcək”. Bununla yanaşı, erməni mediasında fikirlər səslənir ki, əslində, baş verən hadisənin günahkarı elə onlar özləridir. “Qraparak” nəşri yazır ki, iyunun 15-də yaşanan insidentin baş verdiyi Həkəri körpüsünü Azərbaycan tikəndə və post qoyanda Ermənistan sərhədin hardan keçdiyi haqda dəqiqləşmə aparmayıb: “İkincisi, həmin hadisə ilə bağlı videoda aydın görünür ki, Ermənistanın çəkdiyi yol ilə körpü arasında bir neçə metr asfaltlanmamış torpaq sahəsi var. Sanki ikitərəfli qəbul edilən neytral zonadır. Azərbaycan tərəfi də həmin neytral zonaya çatmamış öz tikdiyi körpünün başlanğıcında bayraq sancırdı. Azərbaycanlıları müşayiət edən rus sülhməramlılar buna görə ərazinin Azərbaycana aid olduğunu bildiriblər. Azərbaycanlılar gözləri önündə körpü tikdi, Ermənistan səsini çıxarmadı. Bəs, Nikol fikirləşmirdi ki, azərbaycanlılar körpü tikdikdən sonra tikdirdikləri körpünün başına Azərbaycan bayrağını da sancacaqlar?”. “Ermənistanın səsi” qəzeti isə yazır ki, Azərbaycan Laçın sərhəd-keçid məntəqəsi ilə bağlı tutduğu mövqeyində qətidir: “Azərbaycan sərhəddən buraxılışı dayandırıb. Qarabağda qənaət rejiminə keçilib, sosial şəbəkə istifadəçiləri ərzaq və zəruri malların piştaxtalardan yoxa çıxmasından yazır. Nəqliyyat dayanıb, kənd camaatı məhsullarını şəhərə gətirə bilmir, özləri də yeməksiz qalmaqdan qorxurlar. Əldə olanlar çılğın qiymətə satılır, amma bu, ümumiyyətlə, sualları çox olan Qarabağdakı ermənilərin rəhbərliyi üçün ayrıca məsələdir. Dünya susur. Bu isə prinsipcə başadüşüləndir: regionda baş verənlərlə maraqlanan dünyanın qavrayışında ermənilər Qarabağın Azərbaycanın bir hissəsi olması ilə bağlı öz hakimiyyətləri ilə tam razılaşırlar. Ermənilər susur və buna etiraz etmədiklərindən, deməli, onların özləri üçün də Qarabağ məsələsi önəmli deyil. Onda niyə dünya etiraz etməlidir? Ermənistan susur, əhalinin düşünən hissəsi vəziyyətin bütün təfərrüatını mükəmməl başa düşür. Görünən odur ki, insanların küçələrə çıxıb döyüşmək həvəsini qırmaq üçün hər şeyi edən müxalifətdən insanların əksəriyyəti məyusdur. Aydındır ki, ziyalı adlanan təbəqə çox rahat dəvəquşu mövqeyini tutub, “mən siyasətə qarışmıram” ifadəsi ilə baş verənləri inkar edib, reallığa səylə məhəl qoymadan normal və ölçülüb-biçilmiş həyat tərzini davam etdirir”. Bildirilir ki, bu şərtlər daxilində Azərbaycan Qarabağda qalan ermənilərin gələcəyi ilə bağlı məqsədinə çatacaq.
Qeyd edək ki, bu məsələ Avropa Şurası Parlament Assambleyasında (AŞPA) da diqqət mərkəzində olub. Azərbaycan nümayəndə heyətinin rəhbəri Səməd Seyidov Ermənistan təmsilçilərinin bu xüsusda iddialarına cavab olaraq qeyd edib: “Bir-birimizə çox yaxınıq. Azərbaycan prezidenti İlham Əliyev və Ermənistanın baş naziri Nikol Paşinyan arasında danışıqlar davam edir. Yaxın vaxtlarda danışıqların növbəti mərhələsi gözlənilir. Ancaq burada erməni həmkarlarımızın ritorikasını görürsünüz. Hələ də keçmiş terminologiyanı təkrarlayırlar. Onlar gələcək haqqında düşünməyə qadir deyillər. “Blokada” deyirlər, halbuki belə bir şey yoxdur, “genosid” dedikləri isə ümumiyyətlə mövcud deyil. Laçın dəhlizinin bağlı olmasına dair söylədikləri tamamilə səhv fikirdir. Provokasiyaya gəldikdə isə, Ermənistan tərəfindən çoxlu sayda təxribatlar törədilir. Azərbaycan təxribatdan uzaqdır. Təəssüf ki, Ermənistan tərəfi düşmənçiliyi davam etdirir. O, mövcud vəziyyəti anlamalı, hansı istiqamətdə irəliləmək haqqında düşünməlidir. Azərbaycanlılar və ermənilər birlikdə gələcək haqqında düşünməlidirlər. Ancaq onlar bunun əvəzinə beynəlxalq təşkilatlara yalvarır, Azərbaycanla bağlı yanlış məlumatlar təqdim etməyə çalışırlar. Bu, düzgün münasibət deyil. Belə davranışla sülhə nail olmaq çətindir. Azərbaycana, Qafqaza gəlin, əsl qafqazlı olun, kiçik bir cəsarət tapıb yeni reallıqları anlayın”. Xatırladaq ki, rəsmi Bakı erməni əhalisinin bütün təhlükəsizliyini təmin edə biləcəyini elan edib, separatçılar da təslim olub amnistiya imkanından yararlana bilər.
Samirə SƏFƏROVA
