Biz bu ana qədər hər vaxt Belarus prezidenti Lukaşenkonu Azərbaycana münasibətdə obyektiv və ədalətli mövqelərdə görmüşük. Zatən bunun Prezident İlham Əliyevin Belarusa və onun prezidentinə dostluq münasibətlərinə qarşılıq olduğuna dair çoxlu faktlar gətirmək olar.
Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
A.Quliyev daha sonra yazır:
Xatırlayaq. Tək bir fakt. İllər öncə Putin Lukaşenkonu yanar qaz borcuna görə sıxıb "divara dirəyəndə" onun köməyinə kim çatmışdı? İlham Əliyev ona bir neçə yüz milyonluq əlverişli şərtlərlə dövlət krediti verməsəydi, nə baş verərdi?! İlham Əliyevin dost və müttəfiq dediyi ölkə başçılarına sadiqlik jestlərinə görə Lukaşenko ön sıralarda gəlir, necə deyərlər, onun İlham Əliyevdən narazı qalmasına əsas qəti yoxdur. İnsafən indiyədək xüsusən Ermənistana, onun təcavüzünə münasibətdə Lukaşenko Azərbaycanla ədalətli və obyektiv davranıb. Vətən müharibəsi günlərini xatırlamaq kifayətdir...
Bəs birdən-birə nə oldu ki, Lukaşenko döndü, dəyişdi və artıq Ermənistanın "qanunsuz mənafelərinə" təəssübkeş münasibət sərgiləməyə başlayıb. Bu günlərdə cənab Lukaşenkonun KTMT XİN başçılarının görüşündə dediyi sözləri başqa cür necə başa düşmək olar? Lukaşenko deyib ki, Ermənistan bu alyans qarşısında əsaslı tələblər qoyur, Qırğızıstanla Tacikistanın münaqişəsini həll etməliyik, Ermənistan da əsaslı tələblər qoyur...
Baxaq görək, Ermənistanın KTMT qarşısında son illərin hansı tələbləri olub ki, cənab Lukaşenko onları "əsaslı" sayır? Paşinyan KTMT-dən 44 günlük müharibə vaxtı tələb edirdi ki, Ermənistanı öz məsuliyyət zonası kimi tanısın və kömək etsin, Paşinyanın tələbi başqa formalarda bu günədək davam etdirilir, əsaslı tələb budurmu? Paşinyanın KTMT qarşısında bütün tələbləri Azərbaycana qarşı çevrilməyibmi? 10 noyabr sənədindən sonra Ermənistan törətdiyi bütün sərhəd təxribatlarına KTMT-ni cəlb etmək üçün çabalar göstərmədimi ? Belə də Lukaşenko bu tələbləri hansı əsaslarla "əsaslı" hesab edir?
Tahir TAĞIYEV
