Son günlər Ermənistan silahlı qüvvələrinin Azərbaycan ordusuna qarşı təxribatları intensivləşib. Rusiya mediası və politoloqları belə təbliğat aparır ki, Nikol Paşinyanın Ermənistanın Qarabağı Azərbaycanın tərkib hissəsi kimi tanıması ilə bağlı bəyanatı sərhəddə təxribatlara və daxili iğtişaşlara səbəb olmalı idi.
Bu da onun nəticəsidir: “Belə bir sual ortaya çıxa bilər ki, sülh prosesində olan ölkələr üçün hərbi toqquşmaları kim yaradır? Daha doğrusu, hansı qüvvələr sülhün qarşısını kəsir və təxribatlarda maraqlıdır?”
Bu suallara cavab verən Rusiya mediası yazır ki, bu işdə Paşinyanın və onun ətrafının rolunun olduğu inandırıcı deyil. Onların versiyasına görə, bunu edən həm də təkcə “Qarabağ klanı” deyil: “Bunun arxasında regiona daxil olmaq, Rusiya hərbçilərini əvəz etmək istəyən ABŞ-ın dayanması, Qarabağla bağlı təhlükəli oyuna başlaması kifayət qədər realdır”
Rusiya mediası və politoloqlarının Ermənistan ordusunun Azərbaycan Silahlı Qüvvələrinə qarşı son hərbi təxribatlarının arxasında ABŞ-ın dayanması ilə bağlı versiyaları həqiqətdir, yoxsa Rusiya izi özündən azdırır?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Rusiya mediası və politoloqların bu barədə nə deməyindən asılı olmayaraq, bizim öz səhnəmizdə baş verən hadisələr bu məsələnin arxasında hansı qüvvələrin dayandığını göstərir: “Burda heç bir gizli kontur yoxdur. Rusiya sülhməramlılarının Azərbaycan ərazisində yerləşən qanunsuz erməni silahlı birləşmələrinə silah keçirməsi, eyni zamanda onların mühafizəsi, müdafiəsi - hamısı bir faktdır. Bu faktın özü ermənilərin azərbaycanlılara qarşı revanşist qüvvələrinin canlanmasında, ərazilərimizə keçib minaların basdırılmasında az rol oynamayıb. Burda əsas məsələ maraqları toqquşan ölkələrin mübarizəsindən ibarətdir. Cənubi Qafqazda Amerika ilə Rusiyanın maraqları qətiyyən üst-üstə düşmür. Amerika öz nüfuz dairəsini Cənubi Qafqazda genişləndirməyə çalışır, Rusiya isə öz monopoliyasını itirmək niyyətində deyil. Yəni burada hər iki dövlət eyni səviyyədə mübarizə aparır. Konkret olaraq nüfuz davası gedir. Hər kəs öz nüfuzunu artırmağa, monopoliyasını genişləndirməyə çalışır. İndi Rusiyanın Amerikanı günahkar tutması düzgün deyil. Çünki bunu eyni səviyyədə Rusiya haqqında da demək olar. Bir daha təkrar edirəm. Burda əsas söhbət Amerika və Rusiyanın maraqlarından gedir. Onların üst - üstə düşməyən maraqları var. Onlar öz maraqlarını təmin etmək üçün müxtəlif təxribatlara əl atırlar və revanşistlərə dəstək verirlər. Ona görə də, mən Rusiya politoloqlarının, Rusiya mediasının səmimiyyətinə qətiyyən inanmıram. Əgər həqiqəti bilmək istəyiriksə, həqiqət bundan ibarətdir ki, erməni qanunsuz silahlı birləşmələrinin Azərbaycana qarşı törətdiyi təxribat hallarının qarşısında Amerika nə qədər dayanırsa, Rusiya da o qədər dayanır. Onlar istəyirlər ki, özlərinin Ermənistanda olan nüfuzlarını artırsınlar, etibarlarını gücləndirsinlər. Eyni səviyyədə mübarizə gedir. Burda kim udacaq, kim uduzacaq, onu demək çox çətindir. Bir ölçü vahidi də yoxdur ki, deyəsən, Amerika Rusiyadan daha öndədir. Yəni bu, qeyri - səmimi bir bəyanatdır. Burada Fransanın da, İranın da barmağı var. Bir sözlə, Cənubi Qafqazda maraqları toqquşan bütün ölkələrin niyyəti budur ki, Qarabağ problemini daim aktiv saxlasınlar, erməniləri zülmə məruz qalmış xalq kimi təqdim etsinlər. O qədər axmaq bir vəziyyət yaradıblar ki, sanki 30 il Ermənistan yox, Azərbaycan Ermənistan ərasizini işğal altında saxlayıb. 30 il ərzində sanki ermənilərin dinc əhalisi genosid faktına, hərbi təcavüzə məruz qalıb. Ona görə də, onların nə düşünməsindən asılı olmayaraq, biz ordumuzu hər gün daha çox gücləndirməli, ölkəmizin başçısı cənab Ali Baş Komamdan İlham Əliyevin ətrafında birləşib, yumruq kimi olmalıyıq”.
Məhəmmədəli QƏRİBLİ
