Fransa ermənipərəstliyin “dozası”nı günü-gündən artırır. Azərbaycanla Ermənistan arasında sülh sazişinin imzalanmasına doğru addımlar atıldığı bir ərəfədə fransızlar daha da aqressivləşiblər və hər vəchlə sülh müqaviləsinin bağlanmasının qarşısını almaq istəyirlər.
Xüsusən də, Ermənistanın baş naziri Nikol Paşinyan, eləcə də parlament sədri Alen Simonyan Ermənistanın Qarabağ da daxil olmaqla Azərbaycanın ərazi bütövlüyünü, suverenliyini tanıdıqlarını bəyan etdikdən sonra Makron hökuməti, fransız parlamenti daha çox “Arsax”ın “müdafiəsi”nə qalxıb. Yenə qondarma iddialar, saxta ittihamlarla çıxıış edən fransızlar Azərbaycanın daxili işlərinə qarışmaqda davam edirlər.
Jerar Larşe, Xavier Bertrand, Valeri Pekres, Loran Vokye, David Lisnar, Bruno Retaio, Olivye Marlet, Fransua-Ksavye Bellami və Erik Şotti də daxil olmaqla 170-dən çox Fransa deputatı Makron hökumətinə çox absurd bir məsələ ilə bağlı çağırış edib. Guya ki, keçmiş “Dağlıq Qarabağ”da yaşayan ermənilərə qarşı Azərbaycan tərəfindən hansısa “təhlükə” var. Fransız deputatların “bəyanat”ında qətiyyən reallığı əks etdirməyən məsələlər yer alıb, guya Qarabağdakı ermənilərin vəziyyəti “kritik”dir, guya onlara qarşı “qırğın risqi”ola bilər. 44 günlük müharibədən sonra Ermənistan və Azərbaycan arasında başlanan sülh danışıqlarına da ləkə yaxan parlamentarilər sülh danışıqları “tamamilə balanssızdır” iddiasında bulunublar. İddia ediblər ki, Rusiyanın de-fakto və de-yure müttəfiqi olan Azərbaycan hakimiyyəti guya Qarabağdakı “120...000 ermənini” “blokada” yolu ilə “acından öldürməyə” və “qovmağa” çalışır (Qarabağda 120 min erməninin yaşamadığı məlumdur, fransızlar yenə də boyat havanı çalırlar).
“Bu kontekstdə biz Fransa Respublikasının Prezidentinə rəsmi müraciət edirik. Fransa müdaxilə edə bilər, Fransa müdaxilə etməlidir”-deyə üzdəniraq bəyanatda vurğulanıb.
İddia ediblər ki, onlar 2005-ci ildə Birləşmiş Millətlər Təşkilatının Baş Assambleyası qarşısında erməniləri müdafiə barədə məsuliyyət götürüblər, ona əməl etməlidirlər (?).
“Biz davam edən danışıqları nəzərdən keçirmək üçün BMT Təhlükəsizlik Şurasını yenidən çağırmaqla müdaxilə edə bilərik və etməliyik.
Ona görə də Təhlükəsizlik Şurası öz qətnaməsi ilə belə bir fakt qoymalıdır ki, bu danışıqlar üçün ilkin şərt “Dağlıq Qarabağ” (Qarabağ İqtisadi zonası-İ.S) ermənilərinə qarşı hər hansı etnik təmizləmə prosesinin istisna edilməsinin mütləq təminatı olmalıdır... (?)”
Əlbəttə, fransız deputatlar yenə də qondarma “etnik təmizləmə” uydurmasını dilə gfətiriblər və bununla da öz niyyətlərini ortaya qoyublar. Onlar bir daha bilməlidir ki, Qarabağda yaşayan ermənilər Azərbaycan vətəndaşlarıdır və onların gələcəyi dövlətimizlə bağlıdır. Erməni vətəndaşlarımızla dövlətimizin qanunlarına görə davranılacaq, Fransanın hansısa üzdəniraq “tələbi”nə uyğun olaraq yox. Fransa ermənilərin “təhlükəsizliyi üçün zəmanət tələb edir”, yenə də ermənilərinin “öz müqəddəratını təyin etmək hüququ”nu yada salır. Əlbəttə, bunlar hamısı boş və mənasız çağırışlardır, heç bir əhəmiyyəti yoxdur.
“BMT-nin Fransa prezidentinin çağırışı ilə “Arsax”la bağlı hansısa qətnamə çıxaracağına inanmıram”
SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev “Bakı-Xəbər”ə şərhində “170 fransız deputatın “Arsax”a çağırış etməsi, yenə qondarma iddialar irəli sürməsi rəsmi Parisin əsl simasını ortaya qoyur”-deyə bildirdi.
Media Qrupu rəhbərinin sözlərinə görə, Fransa ermənilərin çoxluq təşkil etdiyi ölkələrdən biridir. Hətta erməni lobbisinin Fransada dövlət strukturlarına və hakimiyyətin müxtəlif nümayəndələrinə belə təsir etmək imkanlarının olması bəlli bir məsələdir: “Bütün beynəlxalq sənədlərdə təsdiq olunur ki, Qarabağ əzəli Azərbaycan ərazisidir və dünya dövlətləri də Azərbaycanın ərazi bütövlüyünü tanıyır. Fransanın müəyyən rəsmi dairələrindən isə Azərbaycanın suverenliyinə, ərazi bütövlüyünə təhdid xarakteri daşıyan sərsəm fikirlərin səsləndirilməsi, sadəcə, təəssüf doğurur. Düşünürəm ki, Fransa öz tarixi keçmişinə nəzər salsa, daha məntiqli olar, çünki bu ölkə əli milyonlarla insanın qanına batmış, ayrı-ayrı xalqlara qarşı soyqırımı törətmiş bir ölkədir”.
Bəhruz Quliyev deyib ki, bu gün Fransa və İranın Ermənistanla bağlı mövqeyi bəllidir: “Rəsmi Paris aşkar şəkildə İrəvanın işğalçı siyasətini dəstəkləyir, Tehran isə üzdə özünü bitərəf göstərməyə çalışsa da, əslində ermənilərin mövqeyindən çıxış edir, Ermənistan hakimiyyətinin siyasi tezislərini alqışlayır. İkinci Qarabağ müharibəsindən sonra əzəli düşmənlər - Fransa və İran Azərbaycana qarşı münasibətdə oxşar cinahda yer alırlar. Hər iki ölkə Ermənistanın yanında, Azərbaycanın isə qarşısında dayanmaqla əsl simalarını ortaya qoyublar. Proseslər onu deməyə əsas verir ki, Fransa Azərbaycan və Ermənistan arasında sülh sazişinin olmasını istəmir, İran isə bölgənin iqtisadi mənzərəsini dəyişəcək Zəngəzur dəhlizinin açılmasını əngəlləməyə çalışır.
Biz ATƏT-in həmsədri kimi Fransanın 30 il ərzində göstərdiyi fəaliyyəti bəyənmədik. Ümumiyyətlə, ATƏT-in özünü fəaliyyətsizliyinə görə qəbul etmirik. 44 günlük Vətən müharibəsi zamanı Fransada aşağı və yuxarı palata özbaşına Dağlıq Qarabağın "müstəqilliyini" qəbul etdi. İndi yenə Fransanın 5-6 deputatı “Arsax”a çağırış edilməsi ilə bağlı ortaya düşüb. Hazırda Fransanın özünün kifayət qədər daxili problemləri var. Makron hakimiyyətə gələndən Fransanın üzü gülmür. Fransanın daxilində iğtişaşlar, problemlər olduğu halda onların bu prosesə qarışması heç bir məntiqə sığmır”.
Baş redaktor əlavə edib ki, 44 günlük müharibədəki məğlubiyyətdən sonra isə Ermənistanın daha dərin iqtisadi tənəzzülə uğraması və ölkənin iqtisadi-sosial inkişaf göstəricilərinin hələ uzun müddət ən aşağı səviyyədə olacağı labüddür: “Belə bir şəraitdə Ermənistanın yeganə çıxış yolu bütöv bir əsr ərzində inadla izlədiyi düşmənçilik yolundan imtina etmək, qonşu dövlətlərə qarşı əsassız iddialarını kənara qoyub səmimi regional əməkdaşlığa qoşulmaqdır. Əks təqdirdə gələcəkdə bu bölgədə Ermənistan adlı dövlətin mövcudluğu belə sual altında qalacaq”.
Fransız parlamentarilərin Makrondan tələbinə gəlincə, B.Quliyev bunu absurd hesab edir: “Fransız deputatların Fransa prezidentindən tələbi heç cür anlaşılan deyil. Onlar Makrondan tələb edirlər ki, BMT Təhlükəsizlik Şurasına təsir etsin və “Arsax”la bağlı qətnamə çıxartdırsın. Bu absurd bir məsələdir və mümkün deyil. BMT Təhlükəsizlik Şurasının Qarabağla bağlı çıxardığı dörd qətnamənin icra taleyi hər kəsə məlumdur. BMT o vaxt Ermənistandan o dörd qətnamənin icrasını tələb etməli idi. Amma etmədi, o qətnaməni Azərbaycan dövləti özü icra etdi. BMT-nin Fransa prezidentinin çağırışı ilə “Arsax”la bağlı hansısa qətnamə çıxaracağına inanmıram. Çünki BMT özü də Qarabağı Azərbaycan ərazisi kimi qəbul edib, bu, sənədlərdə əks olunub”-deyə B.Quliyev qeyd etdi.
İradə SARIYEVA
