Ermənistan ordusunun bütün sərhədboyu ərazilərdə 1 nömrəli hazırlıq vəziyyətinə gətirildiyinə dair məlumatlar var. Ermənilər iddia edir ki, 1 nömrəli hazırlıq vəziyyəti Azərbaycan ordusunun hərəkətliliyinə görə elan edilib. Hərçənd, onların məlumatlarını analiz etdikdə hücumun Azərbaycan yox, Ermənistan tərəfindən hazırlandığı aydın görünür.
Ermənilər Azərbaycan Ordusunun “Kəlbəcər, Laçın və Naxçıvan istiqamətində cəmləndiyini” iddia edir. Kəlbəcər və Laçın istiqamətində Ordumuz strateji yüksəkliklərə sahibdir, Naxçıvan istiqamətində Zəngəzur dəhlizinin hərbi yolla açılması versiyası bölgədə üçüncü ölkələrin də qoşula biləcəyi hərbi eskalasiya risqi yaratdığı üçün bu ehtimal az görünür.
Ermənistanın rəsmi qurumları eyni zamanda sosial şəbəkələtdə müharibəyə hazırlıqla bağlı xüsusi çarxlar fırladır və əhaliyə çağırış edirlər ki, hərbi maşınların dislokasiyası ilə bağlı heç bir məlumat paylaşmasınlar.
Bütün bunlar onu deməyə əsas verirmi ki, Ermənistan genişmiqyaslı müharibəyə hazırlaşır?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, son bir ayda Ermənistan ordusu tərəfindən Azərbaycanla şərti sərhəddə atəşkəs pozulur: “Eyni zamanda, Qarabağdakı qeyri-qanuni erməni silahlı birləşmələri Azərbaycan Ordusunun mövqelərini atəşə tuturlar. Məsələn, bir neçə gün əvvəl Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstələrinin üzvləri tərəfindən Azərbaycan Ordusunun Xocavənd rayonu istiqamətində yerləşən mövqeləri atıcı silahlardan atəşə tutulub. Azərbaycan Müdafiə Nazirliyinin məlumatına görə, ordumuzun bölmələri tərəfindən qeyd olunan istiqamətdə adekvat cavab tədbirləri görülüb. Danışıqlar adı altında Ermənistan və separatçılar zaman qazanmaqdadırlar. Ötən müddət ərzində Ermənistan da, separatçılar da müəyyən hazırlıq işləri görüblər. 2020-ci ildə ordusu tamamilə dağılan Ermənistan indi ordusunun gücündən danışır. 2023-cü ildə Fransa vasitəsilə Ermənistan ordusu üçün Hindistandan artilleriya qurğuları tədarük olundu. Birmənalı şəkildə bilməliyik ki, ermənilər revanşa hazırlaşırlar. Üç il müddətində Rusiya bir dəfə də olsun Paşinyana Qarabağdan qoşunlarını çəkmək əmri verməyib. Çünki Moskva bunu istəmir. Bundan sonra da istəmək niyyəti yoxdur. Erməni silahlıları Qarabağdan çıxarılsa, sülhməramlı adlandırılan qoşunların Azərbaycan ərazisində hansısa bir işi qalmayacaq. Rusiya isə Qarabağı tərk etmək niyyətində deyil. Ona görə də hesab edirəm ki, yeganə çıxış yolu hərbi toqquşmadır”.
Ekspertin sözlərinə görə, Ermənistan təxribatlarını davam etdirərsə, genişmiqyaslı eskalasiyanın başlaması mümkündür: “Bu, Ermənistan-Azərbaycan müharibəsi olacaq. Qarşı tərəf bizi savaşa məcbur edir. Ermənistan indi sadəcə olaraq eyforiyadadır. Qarşı tərəf başa düşməlidir ki, sabotaj cəhdlərinin sonunda genişmiqyaslı müharibənin başlama ehtimalı onlar üçün yaxşı nəsə vəd etmir. Heç Fransa da Ermənistana kömək etməyəcək. Odur ki, müharibə düşmən üçün arzuolunmaz ssenaridir. Düşünürəm ki, müharibə başlamasa belə, lokal əməliyyatlara start verilməsi mümkündür. Reallıq ondan ibarətdir ki, nə üçüncü qüvvələr, nə Ermənistan hərbi-siyasi hakimiyyəti sülh istəyir. Nikol Paşinyan üçüncü tərəflərə müqavimət göstərə biləcək siyasi iradəyə sahib deyil”.
Məhəmmədəli QƏRİBLİ
