Ermənistanın baş naziri Nikol Paşinyan siyasi spekulyasiyalarla kifayətlənməyib, indi də tarix üzərindən spekulyasiya ilə məşğul olur. Tarixlə bağlı biliyi hədsiz dərəcədə kasad olan Paşinyan elə bir açıqlama verib ki, lap bişmiş toyuğun gülməyi gəlir.
Paşinyan Ermənistanın “12 paytaxt”ından danışıb, iddia edib ki, guya ölkəsinin bu sayda “paytaxtı” olub.
"Əsl Ermənistan tarixi Ermənistana xidmət etməlidir, yoxsa tarixi Ermənistan həqiqi Ermənistana? Bu, cavab verməli olduğumuz siyasi və əbədi sualdır. İstəsək, bu məsələni münaqişəsiz həll edə bilərik, çünki “tarixi Ermənistan”ın 12 “paytaxtından” 6-sı Ermənistan Respublikasının ərazisində yerləşir. Bəs sonuncu dəfə bu “paytaxtlarda” nə vaxt olmusunuz? Onlar hansı vəziyyətdə idilər? Ənənələr və dəyərlər haqqında çox danışın. Bu gün tarixi rəmzlərimiz xarabalıqdadır"-deyə Paşinyan iddia edib.
Paşinyan Ermənistanın hansı “12 paytaxt”ıdan danışır? Halbuki, gerçəkdən belə paytaxtlar mövcud olmayıb.
Ekspertlər hesab edir ki, Paşinyan da erməni xəstəliyindən əziyyət çəkir və onun iddia etdiyi paytaxt söhbəti nağıldan və mifdən, uydurmadan başqa bir şey deyil.
Azərbaycan tarixçiləri qeyd edirlər ki, heç ən qədim dövlətlərin bu qədər paytaxtı yoxdur, bu halda Ermənistanın “12 paytaxtı”nın olması absurddur.
Aydın Quliyev: “…Paşinyan ermənilər üçün 12 paytaxtı hardan icad etdi?!”
“Bakı-Xəbər” media qrupunun rəhbəri Aydın Quliyev rəsmi Feysbuk səhifəsində Paşinyanın yeni iddiasına "Qədim Ermənistanın 12 paytaxtı?- Bu qədər yalan olar?... başlıqlı statusla cavab verib: “Bu Paşinyana tarixi kim öyrədib, bilmirəm. Elə ağılalmaz şeylər danışır hərdən... Məsələn, deyib ki, tarixi Ermənistanın 12 paytaxtının 6-sı bu gün Ermənistan respublikasının ərazisindədir...Yalana bax ey...
Bizim eranın 2 min ili də daxil olmaqla Misirin 5 min illik dövlətçilik tarixində bilgilərim qədim Fiv, Memfis, Nubiyadan başqa paytaxt şəhərlər düşünməyə yetmədi. Qədim Çin də bunun kimi. Qədim Altay və Mərkəzi Asiya türklərinin Qərbə doğru eramızın əvvəllərindən başlanmış 1500 illik yürüş və oturuşma tarixində 20-dən çox türk paytaxtın adını çəkmək olar. Biz böyük və mübahisəsiz dövlətçilik tarixi olan türklərik...
Bəs bu Paşinyan ermənilər üçün 12 paytaxtı hardan icad etdi?! Bir Tiqranakert adlı mifik şəhərdən yapışırlar. Dəqiq yerini də bilmirlər. Gah deyirlər Ağdamın yanında Şahbulaq qalasının həndəvərində olub, gah da deyirlər Tiqranakert elə indiki Diyarbəkir deməkdi. Bir Ani şəhərindən danışırlar, bu da əsasən xristian səlibçi "Tapınaq Şevalyelərinin" qalası kimi məşhurdur.
Eçmiədzindən danışırlar. Bunu da 1447-ci ildə, yəni türklərin Konstantinopolu tutmasından 6 il qabaq Qaraqoyunlu Yusif şah Suriya sərhədlərindən qaçıb gəlmiş ermənilərə gümüş pulla satıb. Yəni kökdən erməni şəhəri deyil. Daha nə qaldı?
Sözü tarixçi tədqiqatçılara buraxdım...”
Qasım Hacıyev: “Paşinyanın “12 paytaxt”dan bəhs etməsi və onun 6-nın indiki Ermənistan ərazisində olduğunu iddia etməsi onun savadsızlığının nəticəsidir”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev də “Bakı-Xəbər”ə şərhində bildirdi ki, tarixdə XX əsrin məlum dövrünə qədər Ermənistan adlı dövlət olmayıb və Paşinyanın da dedikləri tamamilə yalandır. “Paşinyan siyasəti çox yarıtdı, indi də tarixə meyl edir. Ermənistanın baş nazirinin iddiası tamamilə cəfəngiyatdır. Bilirsiz ki, uzun illərdir erməni tarixçiləri qondarma erməni tarixi yaratmaqla məşğul olub və bu saxta tarix də ermənilərin beyninə yeridilir. Erməni tarixçilərinin yazdıqlarının çox böyük əksəriyyəti vaxtilə uydurduqları əfsanələrdən ibarətdir. O əfsanələrin əsasında da cəfəngiyatlar irəli sürürlər. XIX əsrdən sonra erməni alimləri dırnaqarası mənbələr yaradıblar və tarixlərini də mənbələr əsasında yazıblar. Bizim bölgədə ən çox tarixi saxtalaşdırma işini farslarla ermənilər edib. Çünki qondarma mənbələr yaradıblar. XIX əsrin sonu, XX əsrin əvvəllərində yetişən erməni “alimləri” qrupu var gücü ilə saxtalaşdırma işinə başlayb və məqsəd də Ermənistan adlı dövlətin tarixini yaratmaq olub. Erməni tarixçilərinin uydurduqları “Böyük Ermənistan” kimi, “12 paytaxt” iddiası da əsassızdır. Ermənistan adlı dövlət harada olub ki, onun paytaxtları da olsun? Ermənilərin bizim coğrafiyada XX əsrin əvvəllərinə qədər dövləti olmayıb. Bu bölgədə heç bir tarixi dövlətləri olmadığı halda Paşinyanın “12 paytaxt”dan bəhs etməsi və onun 6-nın indiki Ermənistan ərazisində olduğunu iddia etməsi onun savadsızlığının nəticəsidir. Özünü hökumət başçısı sayan bir adamın bu cür qeyri-real məsələ barədə danışması gülünc görsənir. O, bu gülünc açıqlama ilə “Böyük Ermənistan” xülyasını yenidən gündəmə gətirmək istəyir, amma arxası saxtakarlığa söykənən bir nəsnə heç zaman ayaq tutub yeriyə bilməz. XX əsrin əvvəllərindən başlayaraq Nikita Emin, Haqqanyan, Şahnazaryan, sonrakı dövrlərdə Erimyan və onların yetişdirmələri olan Ayvazyan, Mkrtçyan, Arutunyan və başqaları o qədər yalanlar yazıblar ki, özləri də öz yalanlarının içində itib-batıblar. Erməni tarixçiləri heç zaman yalan yazmaqdan utanmayıblar. Tənqid edilsələr də belə, öz “ənənələr”indən əl çəkməyiblər. Bu baxımdan, Paşinyan da onların yazdıqlarını təkrar edib və onlara “saxtakarlığı davam etdirin” mesajını verir ki, indi də bu yalanla cəmiyyətin başını qatın. Erməni alimləri “ideologiya”nı bu yolla yaradır” - deyə Q.Hacıyev qeyd etdi.
Q.Hacıyevin sözlərinə görə, indiyə qədər nə yazılıblarsa hamısı yalan üzərində yazılıb. O qeyd edir ki, onlar “tarixi paytaxt”larından danışarkən başqa ölkələrin ərazilərini nəzərdə tuturlar. Ermənilərin çürük ideologiya əsasında başqa dövlətlərə qarşı ərazi iddiası irəli sürdüyünü deyən Q.Hacıyev bildirir ki, onlar “qədim paytaxt” iddiası irəli sürüb başqa dövlətlərdən torpaq umurlar.
Dünyanın çox ölkəsinin öz məqsədləri üçün erməniləri ortaya ataraq onların “ermənilik xəstəliyindən” istifadə etdiklərini deyən Q.Hacıyevin qeyd etdiyinə görə, ortada çoxlu qanlar axıdılır. “Ermənilər ən azından üç-dörd ölkənin ərazisində “Tiqranakert” “tapıb”lar. Bu nə deməkdir? Bu saxtakarlıqdır. Belə bir şəhər olmayıb. Ermənilər tarixi də, qədim əlyazmaları da, arxeoloji tapıntıları da saxtalaşdıra bilirlər. Onlar üçün sınır yoxdur. Paşinyan hansı şəhərləri nəzərdə tutub bilmirəm, amma onun dedikləri yalandan başqa bir şey deyil”-deyə Q.Hacıyev vurğuladı.
İradə SARIYEVA
