Məlum olduğu kimi, Ermənistan hərbiçiləri “Laçın” sərhəd-buraxılış məntəqəsini atəşə tutduqdan sonra "Laçın" sərhəd-buraxılış məntəqəsində keçid tam dayandırılıb. Baş verənlərlə bağlı hərtərəfli təhqiqat aparılmayınca, yaxud Ermənistan təxribata görə bütün məsuliyyəti öz üzərinə götürməyənə qədər keçidin açılmayacağı bildirilir. Bu çox maraqlı məqamdır ki, Ermənistan baş verənlərin məsuliyyətini öz üzərinə götürməyənə qədər sərhəd-keçid məntəqəsində hərəkət, keçid bərpa edilməyəcək. Azərbaycan rəsmən Ermənistan qarşısında rəsmən şərt qoyub ki, insident tam araşdırılana və günahkarlar cəzalandırılana qədər keçid məntəqəsinin açılmasından söhbət gedə bilməz, bu o halda baş verə bilər ki, təxribatı törədən tərəf məsuliyyəti öz üzərinə götürsün.
Xatırladaq ki,15 iyun 2023-cü il tarixdə saat 08:45-də Ermənistan Respublikası ərazisindən açılmış atəş nəticəsində Laçın dövlət sərhədindən buraxılış məntəqəsində xidmət aparan Dövlət Sərhəd Xidmətinin (DSX) hərbi qulluqçusu yaralanıb.
“Ermənistan Azərbaycanın şərtinə əməl etməzsə o yoldan gediş-gəliş birdəfəlik dayandırılacaq”
Siyasi şərhçi Azər Həsrət baki-xeber.com-a bildirdi ki, bu məsələdə Azərbaycanın heç bir günahı yoxdur, baş verənlər hamısı göz qabağındadır: “Hətta ermənilərin yaydığı videolardan da açıq görsənir ki, Azərbaycan tərəfi öz ərazisində hərəkət edib orada bayraq qaldırır. Azərbaycanın öz ərazisində bayraq qaldırmasının Ermənistana isti-soyuğu olmamalıdır. Yəni sərhədin bu tayında öz ərazimizdə nə istəyiriksə edirik. Biz bayraq yüksəltməklə onlara qarşı hər hansı bir təhlükə də törətməmişik ki, “ermənilər təhlükənin qarşısını almaq üçün müdafiə məqsədilə atəş açıblar” deyələr. Belə bir durum yoxdur. Bu baxımdan Azərbaycanın Ermənistandan bu hadisə ilə bağlı günahkarların tapılıb cəzalandırılmasını, eləcə də baş verənlərin məsuliyyətini Ermənistanın öz üzərinə götürməsini tələb etməsi tam doğrudur. Ermənistan da Azərbaycanın tələblərini tam yerinə yetirməli, cinayətkarları cəzalandımalı, məsuliyyəti öz üzərinə götürüb dövlətimizdən üzr istəməlidir. Belə olacağı təqdirdə biz Ermənistanın doğrudan da sülhyaratma istiqamətində xoş məramına inana biləcəyik. Amma biz görürük ki, hələlik Ermənistan tərəfi, bütövlükdə erməni təbliğat maşını hadisənin günahını Azərbaycanın üzərinə yıxmaq üçün dəridən-qabıqdan çıxır. Əlbəttə, belə olan təqdirdə Azərbaycan da haqlı şəkildə Laçın yolunu bağlı tutacaq. Ermənistan Azərbaycanın şərtinə əməl etməzsə o yoldan gediş-gəliş birdəfəlik dayandırılacaq. Zatən, Azərbaycan Respublikasının bütün quru sərhədləri giriş-çıxış üçün bağlıdır. Ermənilərə hər hansı bir istisnanın tanınması əslinə qalanda onlara münasibətdə bir xoş məram nümayişi idi. Təəssüflər olsun ki, onlar bunu dəyərləndirə bilmədilər, üstəlik də belə bir təxribata yol verdilər. Əlbəttə, sual yaranacaq ki, bəs Qarabağdakı erməni vətəndaşlarımızın vəziyyəti necə olacaq, onların bu və ya digər təcili ehtiyacları necə həll ediləcək? Onun da çıxış yolu çox asandır. Azərbaycan dövləti onların bütün problemlərini zatən həll etməyə hazır olduğunu hər zaman deyib. İndi də deyəcək. Beynəlxalq Qızıl Xaç-ın onlarla təmaslarının bərpa və davam edilməsinin heç bir problemi yoxdur. Qızıl Xaç-ın Bakıdakı nümyəndəliyi gedib Qarabağdakı ermənilərlə görüşə, onların ehtiyaclarını öyrənə bilər. Yaxud tibbi cəhətdən problemləri olarsa onlar Azərbaycanın digər yaxın şəhərlərinə və Bakıya müraciət edə bilərlər. Təcili yardıma da ehtiyacları olarsa bu da problem deyil”.
A.Həsrət təəssüflə vurğuladı ki, Ermənistan humanitar məqsədlərlə fəaliyyət göstərən yolu öz təxribatları ilə bağladılar. A.Həsrətin sözlərinə görə, Ermənisan hökuməti yenidən hərəkətin bərpa edilməsini istəyirsə, məsuliyyəti öz üzərinə götürsün və Azərbaycandan üzrxahlıq etsin.
İradə SARIYEVA
