Pakistan-Azərbaycan münasibətləri yalnız indi və 44 günlük Vətən müharibəsi zamanı deyil, həmişə yüksək səviyyədə olub. Hər iki ölkə istər beynəlxalq təşkilatlar səviyyəsində, istərsə də ikitərəfli münasibətlərdə bu vaxta qədər nümunəvi münasibətlər sərgiləyib.
Azərbaycan Pakistana, İslamabad isə rəsmi Bakıya bütün məsələlərdə dəstək olub. Yalnız ərazi bütövlüyü deyil, istənilən sahədə bu dəstəyi sezmişik, xüsusən də ötən illər ərzində beynəlxalq təşkilatlarda iki qardaş ölkə bir-birinə açıq dəstəyini nümayiş etdirib. Buna paralel olaraq Pakistan-Azərbaycan münasibətləri, həm də İslam Əməkdaşlığı Təşkilatında nümunəvi münasibətlərdən biri kimi qiymətləndirilib.
Pakistanın Baş naziri Məhəmməd Şahbaz Şərifin Bakıya səfəri həm ikitərəfli münasibətlər, həm də bütövlükdə Avrasiyada proseslərin inkişafı baxımından əhəmiyyətlidir.
Azərbaycan-Pakistan əlaqələri yüksələn xətt üzrə davam edir. Bu, hərbi sahədən tutmuş energetika, iqtisadiyyat, mədəniyyət, siyasət də daxil olmaqla bütün istiqamətlərdə müşahidə edilir. Bu əlaqələr təkcə dövlətlər yox, həm də xalqlar arasında güclənir.
Pakistanın Baş nazirinin Azərbaycana səfəri münasibətlərin yeni mərhələdə inkişafına zəmin yaradacaq.
Türkiyə Prezidenti Rəcəb Tayyib Ərdoğanın səfərinin ardınca Pakistanın Baş nazirinin də Azərbaycana gəlməsi Türkiyə-Azərbaycan-Pakistan tərəfdaşlığının daha da güclənəcəyi və Avrasiyada həlledici rola malik olacağı gözləntisini artırır.
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov “Bakı-Xəbər”ə açıqlamasında bildirdi ki, Pakistan və Azərbaycan arasında əlaqələrin tarixi çox qədimdir: “Amma hər halda son dövrlər bu proseslər daha sürətli, daha geniş formada özünü göstərdi. Ayın 14 - ü və 15 - i Pakistan baş naziri Məhəmməd Şərifin Azərbaycana səfəri də diqqətimizi çəkdi. Düzdür, əvvəldən bu görüşdə siyasi-iqtisadi, mədəni sahədə əməkdaşlığın dərinləşdirilməsi proqramlaşdırılmışdı. Amma gördük ki, daha çox formalar qeyd olundu. Ticarət dövriyyəsinin artırılması, aviareyslərin artırılması məsələsi və digər bir çox mövzular müzakirə olundu. Eyni zamanda, Pakistan baş nazirinin mətbuat konfrasında enerji ilə bağlı Azərbaycan Prezidentindən xahiş etməsi ondan xəbər verir ki, Pakistanın enerjiyə tələbatı, ehtiyacı var. Pakistan baş nazirinin bildirdiyinə görə, onlar enerjiyə ildə 27 milyard dollar pul xərcləyirlər. Bu onu göstərir ki, Azərbaycanla Pakistan arasında bir sıra sahələrdə daha ciddi əməkdaşlığa ehtiyac var. Düzdür, Pakistanla münasibətlərimiz yaxşı olsa da, ticarət dövriyyəmiz o qədər böyük deyil. Amma hesab edirəm ki, yaxın zamanlarda ticarət dövriyyəsini 10 qat, 15 qat da artıra bilərik. İndiki halda 35 milyon dollar həcmində ticarət dövriyyəmiz varsa, bunu yaxın müddət ərzində daha da qaldıra bilərik. Pakistanda zaman - zaman iqtisadi, hərbi böhranlar yaranır. Bunlar hamısı keçicidi. Bu baxımdan hesab edirəm ki, Azərbaycanla əməkdaşlıq etməsi Pakistanın xeyrinə olan bir məsələdir. Həm də Pakistanın baş nazirinin Azərbaycan prezidentini ölkəsinə dəvət etməsi ondan xəbər verir ki, yaxın gələcəkdə bu proseslər yekunlaşacaq və əlaqələr daha geniş səviyyədə yayılacaq. Təbii ki, aramızda hərbi əməkdaşlıq var. Eyni zamanda hərbi - texniki sahədə əməkdaşlıq mövcuddur. Bütün bunlar da genişləndiriləcək. Təlimlərin keçirilməsi də mümkündür. Yəni bir çox sahələrdə qarşılıqlı faydalı əməkdaşlıq gözlənilir və bu da baş tutacaq”.
Məhəmmədəli QƏRİBLİ
