“Məmnunam ki, Ermənistanla sülh sazişi üzərində artıq danışıqlar gedir. Bildiyiniz kimi, Pakistan Ermənistanla diplomatik münasibətlər qurmayan bir neçə ölkədən biridir və bu, bizim mənəvi öhdəliyimizdir. Siz yalnız Ermənistanla sülh sazişini imzalayandan sonra bizə bir mesaj versəniz, bu məsələyə yenidən baxa bilərik. Bu məsələdə də biz birmənalı olaraq Azərbaycanı dəstəkləyirik”.
Bu fikirləri Pakistanın Baş naziri Məhəmməd Şahbaz Şərif iyunun 15-də Prezident İlham Əliyevlə mətbuata bəyanatında səsləndirib.
Qeyd edək ki, sözügedən bəyanatda Prezident İlham Əliyev də “Pakistan Ermənistanla diplomatik münasibətlər qurmayıb və bu, qardaş ölkə mövqeydir” fikrini ifadə edib.
“Pakistanın tutduğu mövqe İrana da dərs olmalıdır...”
Pakistanın Baş nazirinin fikrlərinə şərh verən “Alyans” Siyasi araşdırmalar mərkəzinin sədri Abutalıb Səmədov “Bakı-Xəbər”ə “Pakistan Azərbaycan müstəqilliyini bərpa etdiyi ilk gündən ona ən yaxın münasibət sərgiləyən dövlətlərdən biridir, müstəqilliyimizi Türkiyədən sonra tanıyan ikinci dövlətdir. Pakistan elə həmin vaxtdan Ermənistanla diplomatik münasibətlər qurmayan, onu bir dövlət kimi tanımayan qardaş dövlətdir. 44 günlük müharibə dövründə Türkiyə ilə birlikdə Azərbaycanın yanında duran və Azərbaycana təkcə hər cür kömək göstərməyə hazır olduğunu bəyan etməyən, eyni zamanda bizim bütün istəklərimizi yerinə yerinə dövlətdir. İkinco Qarabağ müharibəsi dövründə Pakistanın baş naziri (sabiq) İmran Xan verdiyi bəyanatlarla, tutduğu mövqe ilə Azərbaycanın, azərbaycanlıların sevgisini qazanan insandır. Sonradan İmran Xan hakimiyyətdən uzaqlaşdırıldı və onu Şahbaz Şərif əvəz etdi. Ancaq münasibətlər dəyişmədi və dəyişə də bilməz. Şahbaz Şərifin Azərbaycana səfəri zamanı səsləndiriyi bəyanat təbiidir ki, bizi qürurlandırmaqla yanaşı erməniləri bir daha şok vəziyyətinə saldı. Sirr deyil ki, Ermənistan həmişə bu məsələdə Azərbaycanın paxıllığını çəkən bir dövlət olub, onlar da həmişə arzulayıblar ki, Türkiyə kimi, Pakistan kimi birmənalı mövqe tutan qardaş dövlətlərə malik olsunlar”- deyə bildirdi.
A.Səmədovun sözlərinə görə, bir Fransadan başqa Ermənistana bu cür münasibət göstərən başqa dövlət olmayıb, Fransanın münasibəti də daha çox hay-küylü fikirlərdən, bəyanatlardan o tərəfə keçməyib. O vurğuladı ki, reallıqda Fransa da Ermənistana ciddi kömək etməyib: “Xüsusən də İkinci Qarabağ müharibəsində Ermənistan Fransadan gözlədiyi köməyi ala bilmədi, Fransa Ermənistan üçün Türkiyə ola bilmədi. Yalnız sülh sazişi imzalanarsa, Ermənistan-Azərbaycan münaqişəsi başa çatarsa, Pakistan Azərbaycanın razılığından sonra Ermənistanla diplomatik münasibətlər quracağını bəyan edib. Əslinə qalsa, sülh sazişinin imzalanması o qədər də çətin deyil, Ermənistan sadəcə olaraq süni problemlər yaradır. Bu səbəbdən Azərbaycan Prezidenti açıq şəkildə bəyan etdi ki, Ermənistan rəhbərliyi siyasi iradə nümayiş etdirə bilsə, sülh sazişini imzalamaq o qədər də çətin deyil. Bu günlərdə Ermənistan Parlamentinin rəhbəri Simonyan da açıq şəkildə dedi ki, Ermənistan Qarabağ ermənilərinin hüquq və təhlükəsizliyinin beynəlxalq mexanizmlərlə təmin olunmasını tələb etməsə sülh sazişi indiyə qədər üç-dörd dəfə imzalanardı. Yəni əslinə qalsa, süni bir bəhanə uydurub bu bəhanə ilə sülh sazişinin imzalanmasını ləngidir. Bir tərəfdən, Azərbaycanın ərazi bütövlüyünü və suverenliyini qəbul etdiyini həm Praqada, həm Soçidə bəyan edir, digər tərəfdən tələb edir ki, Qarabağ ermənilərinin hüquq və təhlükəsizliyi beynəlxalq mexanizmlər vasitəsilə təmin olunsun. Bunu Azərbaycan, təbiidir ki, qəbul edə bilməz. Ancaq ermənilər bu süründürməçiliyi uzada da bilməzlər. Çünki dünya da başa düşür ki, sülh sazişinin imzalanması realdır, elə ciddi maneə yoxdur, ermənilərə ciddi təzyiq göstərilsə, sülh sazişi imzalanacaq. Çox güman ki, yaxın danışıqlarda bu mövqe sərgilənəcək və Ermənistan bu sülh sazişini imzalamaq məcburiyyətində qalacaq. Təbiidir ki, Azərbaycan bölgəni sülh, əməkdaşlıq bölgəsinə çevirmək istəyir. Bundan sonra Pakistanla Ermənistan arasında diplomatik münasibətlərin qurulmasına qətiyyən etiraz etməyəcək. Şahbaz Şərifin verdiyi mesaj Pakistana göndəriləcək və Pakistan Ermənistanı tanıyan, onunla diplomatik münasibət quran dövlətlərdən biri olacaq. Yeri gəlmişkən, Pakistanın tutduğu mövqe İrana da dərs olmalıdır ki, müsəlman dövləti necə davranmalıdır, islam dəyərlərini necə qorumalıdır və sözdə yox, əməldə islam qardaşlığını necə təmin etməlidir. Bütün bu məsələləri İran Pakistandan öyrənsə pis olmazdı”.
İradə SARIYEVA
